8 სკანდალი კორონავირუსის ჟამს, რომელშიც ცნობილი ქართველები გაეხვნენ
უკვე 5 თვეა მსოფლიო ახალი კორონავირუსის პანდემიას ებრძვის. როგორც სატელევიზიო, ასევე ინტერნეტსივრცეში ყოველდღიურად საუბრის და განხილვის მთავარი თემაა COVID-19. პანდემიას ჰყავს თავისი გმირები და ანტიგმირები, რომელთა მიმართაც საზოგადოება ნაკლებად შემწყნარებელია. ამ მხრივ გამონაკლისს არც საქართველო წარმოადგენს.
მოდით, თვალი გადავავლოთ ყველაზე ხმაურიან განცხადებებს და სკანდალებს, რომელშიც ცნობილი სახეები კორონავირუსთან დაკავშირებით გაეხვნენ:
2 მაისს ხელნაწერთა ეროვნული ცენტრის დირექტორმა ზაზა აბაშიძემ "ფეისბუქზე" კომენტარი დაწერა, რის გამოც, მისი თანამდებობიდან მოხსნა მოითხოვეს. "უნდა ჩაკეტო სოფელში და ამოიხოცონ к ебённой матери!" - წერდა აბაშიძე მარნეული-ბოლნისის საკარანტინო ზონაში, სოფელ მუშევანში მომხდარ დაპირისპირებასთან დაკავშირებით, რა დროსაც ადგილობრივებმა პოლიციის და სასწრაფოს მანქანებს ქვები დაუშინეს.
მოგვიანებით, მეორე კომენტარიც მოაყოლა: "არ ემორჩილებიან სახელმწიფოს კანონებს?! პოტენციურ გამავრცელებლად და მკვლელებად იქცევიან? მაშინ გამოკეტონ იმ სივრცეში და პატრონი მოს...ვნიათ! გინდა აზერი იყოს იყოს, გინდ ქართველი, გინდ რუსი..."
აღნიშნული კომენტარების გამო, აბაშიძეს სოციალურ ქსელში ქსენოფობი უწოდეს და სიძულვილის ენის გავრცელებაში დაადანაშაულეს. სამოქალაქო პლატფორმამ "არა-ფობიას" კულტურის სამინისტროს მისი თანამდებობიდან მოხსნაც მოსთხოვა.
აბაშიძემ ფბ-ინციდენტის გამო ბოდიშიც მოიხადა სოციალურ ქსელში:
"მეგობრებო, დიდი აჟიოტაჟი გამოიწვია ჩემმა მიმოწერამ ჩემს მეგობრებთან, ამიტომ, უპირველესად, მინდა ბოდიში მოვუხადო საზოგადოებას უცენზურო სიტყვების გამო. მაგრამ, თავს ვალდებულად ვრაცხ განვმარტო ჩემი პოზიცია: ჩემი სიტყვები მუშევანის ამბებთან დაკავშირებით აიტაცეს ვაი-პოლიტიკოსებმა, ჟურნალისტების ნაწილმა და რეზულტატიც: ვარ მკვლელი, ფაშისტი, უვიცი, გაუნათლებელი მეცნიერუშკა, აგენტი და, რაც მთავარია, ეროვნული შუღლის გამღვივებელი!
ეს ცილისწამებაა (თუმცა, ამის დამწერნი სხვას რას აკეთებენ!?). არც ერთი შეურაცხმყოფელი სიტყვა, არც ერთ ერზე ჩემს მეგობრებთან მიმოწერაში არ არის! პირიქით, აღნიშნულია, რომ ეს ეხება ყველას - აზერბაიჯანელს, ქართველს, რუსს - საქართველოს ყველა მოქალაქეს!
ყველას, ვინც შეგნებულად თუ შეუგნებლად არღვევს საგანგებო რეჟიმს და ამით საფრთხეს უქმნის სხვას, იქცევა ვირუსის გამავრცელებლად და პრაქტიკულად მკვლელად! ზუსტად იგივეს დავწერდი, მსგავსი ფაქტი რომ მომხდარიყო საქართველოს ნებისმიერ კუთხესა თუ სოფელში" - დაწერა აბაშიძემ.
"მივმართავ საქართველოს პარლამენტს, თბილისის მერს და ყველა დეპუტატს - ევროპის ყველა დედაქალაქში გაგზავნეთ თვითმფრინავები მოქალაქეების ჩამოსაყვანად. ჩვენც ვართ აქ, ვცხოვრობთ საქართველოს მოქალაქეები და წაგვიყვანეთ აქედან, გამოგვიგზავნეთ ერთი თვითმფრინავი. გვინდა, რომ საქართველოში დავბრუნდეთ, აღარ გვინდა ამ რუსეთში, წაგვიყვანეთ!" - ამ სიტყვებით მიმართა მომღერალმა თეონა კონტრიძემ საქართველოს ხელისუფლებას "ინსტაგრამზე" ლაივ-ჩართვის დროს.
მართალია, მომღერლის თხოვნას ხელისუფლება არ გამოხმაურებია, თუმცა ყველაზე დიდი კრიტიკა კონტრიძემ ხალხისგან დაიმსახურა, რომლებიც კომენტარებში მოუწოდებდნენ, დარჩეს "თავის რუსეთში, სადაც ამდენი წელი მოღვაწეობდა". ასევე მომღერალს შეახსენეს, 2008 წელს გადახდილი ქორწილი - "რა ექორწილებოდა, როცა რუსეთი ბომბავდა საქართველოს".
კრიტიკულ კომენტარებს თავად მომღერალიც გამოეხმაურა:
"ამაზრზენი, შემაძრწუნებელი კომენტარები ვნახე... მე რუსეთში 1994 წელს წამოვედი, როცა ბევრი ქართველი წამოვიდა. ვიღაცა დარჩა, ვიღაცა წამოვიდა. ისე განვითარდა ჩემი ცხოვრება, დაიძრა ჩემი კარიერა... მაშინ როცა, საქართველოში იყო სამოქალაქო ომი, არავის ეცალა მუსიკოსებისთვის, მათთვის დღესაც ცოტას სცალია საქართველოში. ადამიანი მგონი უნდა ცხოვრობდეს იქ, სადაც მუშაობს და სადაც შეუძლია ხალხისთვის რამის გაკეთება, თუნდაც საქართველოსთვის რუსეთიდან მეტის გაკეთება შევძელი, ვიდრე საქართველოში შევძლებდი.
მე რუსეთში არც ერთ სახელმწიფო კონცერტში არ ვმონაწილეობ, კატეგორიულ უარს ვამბობ, ჩემი 25-წლიანი ცხოვრების განმავლობაში. ვამბობ უარს ყირიმში კონცერტზე, სადაც 14 კონცერტზე ვთქვი შარშან უარი.
საქართველოში მე ვერ ვიცხოვრებ, ბევრჯერ გადავწყვიტე ეს, მაგრამ კორონავირუსით მოვკვდები რუსეთში, თუ საქართველოში ბულინგით რა მნიშვნელობა აქვს? ზუსტად, თქვენნაირმა ტუტუცმა ხალხმა ათიათასჯერ გადამაწყვეტინა საქართველოში არჩამოსვლა" - თქვა კონტრიძემ საპასუხო განცხადებაში (იხილეთ ვიდეო).
- ლალი მოროშკინა - "უშიში, ვითარცა უხორცო..."
"მე და ჩემი 5 მეგობარი მზად ვართ შევიდეთ კოვიდით დაინფიცირებულ ადამიანებთან და დაგიმტკიცოთ, რომ ლაღებს ვირუსი არ ემართებათ. ის ემართებათ მშიშრებს და მხდალებს" - ეს ერთ-ერთი გახლავთ ლალი მოროშკინას კორონავირუსთან დაკავშირებულ განცხადებებიდან, რომლის გამოც, საზოგადოებამ მისი მისამართით კრიტიკა არ დაიშურა.
ერთ-ერთ განცხადებაში კი მოროშკინამ 5G ანტენების დამონტაჟებასთან დააკავშირა ვირუსის გავრცელება:
"რა კარგია, რომ ინტელექტდაქვეითებულები ვეღარ შეიტანენ ეჭვს იმ ფაქტში, რომ ახალ კოსმიურ ერაში შევდივართ! ცხადია, ვერც ილონ მასკი და ვერც ბილ გეითსი ვერ შეაჩერებდნენ ფრენებს, ახალი სატელიტური ანტენების დასამონტაჟებლად, რადგან ნავიგაციური სისტემები ხელს უშლის ცაში სატელიტური ბადეების განთავსებას, რაც გუშინ თვალნათლივ ვიხილეთ.
ახლა უკვე მშვენივრად ჯდება ლოგიკაში, რატომ გამოკეტეს კაცობრიობა სახლებში, რატომ ზაფრავდნენ გაათკეცებული ავადმყოფობის ციფრებით, რატომ დაახრიგინებდნენ კუბოებს... მე არ ვამტკიცებ, იმ ფაქტს მავნეა თუ არა ეს ახალი ერა ჯანმრთელობისთვის, ამაზე მხოლოდ ერთი წლის თავზე შევძლებთ მსჯელობას, როდესაც შევადარებთ ლეიკემიის და სიმსივნეების შედეგებს! დღეს კი ეს რეალობაა, ცა ახალი სატელიტებით სავსე, გული კი სიცარიელით... მილიონობით დაკარგული სამუშაო ადგილი, შეშინებული ხალხი, დაპაუზებული ეკონომიკა. განა ასეთი გაბითურების ღირსი იყო კაცობრიობა?" - დაწერა მოროშკინამ "ფეისბუქზე".
მწერალს ასევე სჯერა, რომ კორონავირუსის გავრცელების ერთ-ერთი მიზეზი ჰილარი კლინტონისა და დონალდ ტრამპის დაპირისპირება და ამერიკაში კარსმომდგარი არჩევნებია.
ცნობილი ასტროლოგის ავტორიტეტი მის ერთგულ თაყვანისმცემლებშიც კი შეირყა, მას შემდეგ, რაც "კავკასიის" ეთერში მაყურებელს კორონავირუსთან აპოკალიფსური სცენარი დაუხატა, რომელშიც მთავარ როლებს ცნობილი მილიარდერები - ბილ გეითსი და ილონ მასკი თამაშობენ.
ასტროლოგმა 5G ინტერნეტის შესახებაც ისაუბრა და გეითსი და მასკი სამომავლოდ პანდემიებისა და დაავადებების გამოწვევაში დაადანაშაულა, რათა მსოფლიოში მილიონობით ადამიანი დაიხოცოს, ვაქცინაციების მეშვეობით კი გადარჩენილების, "ჩიპიზაცია" და "რობოტიზაცია" განხორციელდეს. მიხეილ ცაგარელის თეორიის თანახმად, ამ ყველაფრის მიზანი ყველა რელიგიის მოსპობა და ახალი რელიგიის შექმნაა, რასაც ახალი ჰოლოგრამული და ლაზერული ტექნოლოგიების საშუალებით განახორციელებენ და ადამიანებს საბოლოოდ დაიმორჩილებენ.
ცაგარელი კრიტიკის ობიექტი კოლეგებისგანაც გახდა. მის გამოსვლას გაემიჯნა ტელეკომპანია "კავკასია". მათ ღიად მოუწოდეს ასტროლოგს, რომ შეთქმულების თეორიების გავრცელებისგან თავი შეიკავოს. საზოგადოების დიდმა ნაწილმა კი ასტროლოგი პანიკის დათესვაში და რუსული ნარატივის გავრცელებაში დაადანაშაულა.
- როდესაც ბიძინა ივანიშვილის შვილი ხარ...
მარტში საგანგებო რეისით საფრანგეთიდან ჩამოყვანილ საქართველოს მოქალაქეებს შორის, საზოგადოებისთვის ცნობილი ადამიანების შვილებიც იყვნენ. ტელეწამყვან ნანუკა ჟორჟოლიანის შვილი მარიამ გეგუჩაძე აეროპორტიდან პირდაპირ კახეთის საკარანტინო ზონაში მოხვდა, თუმცა როგორც ამბობენ, ბიძინა ივანიშვილის ვაჟი უტა ივანიშვილი ტრაპიდან "გააქრეს" და არცერთ საკარანტინე ზონაში არ წასულა.
მედიის კითხვაზე, სად გაქრა უტა ივანიშვილი, პაატა იმნაძემ განაცხადა, რომ ვისაც თვითიზოლაციის საშუალება აქვს, კარანტინში აღარ უშვებენ.
"წინასწარ მიმდინარეობს ჩამომსვლელის საცხოვრებელი პირობების შესწავლა. თუ იქ არსებობს თვითიზოლაციის საშუალება, წინააღმდეგ შემთხვევაში მოქალაქეები თავად ითხოვენ კარანტინში მოთავსებას. კარანტინიდან თვითიზოლაციაში გადასვლის მსურველებს შეუძლიათ დაწერონ განცხადება, კვლავ მოხდება მათი საცხოვრებელი პირობების შესწავლა და გადაწყვეტილების მიღება" - განაცხადა იმნაძემ კითხვაზე საპასუხოდ.
არსებული ინფორმაციით, სწორედ ამის შემდეგ დართეს მგზავრებს უფლება რომ თვითიზოლაციისთვის მიემართათ, რათა უტა ივანიშვილის შემთხვევა ერთადერთი არ ყოფილიყო.
უტა ივანიშვილთან დაკავშირებული ინციდენტი ივანიშვილების ერთადერთი სკანდალი არ ყოფილა - მამა-შვილმა ბიძინა და ბერა ივანიშვილებმა ვიდეოპლატფორმა TikTok-ზე გამოქვეყნებული ვიდეოს გამოც დაიმსახურეს საზოგადოების კრიტიკა.
21 აპრილს გამოქვეყნებულ ვიდეოში მამა-შვილი მუსიკალურად ესალმება ერთმანეთს. ვიდეოს პოლიტიკური განცხადებები მოყვა.
ექს-პრეზიდენტმა მიხეილ სააკაშვილმა ცინიზმის დემონსტრირება უწოდა მას: "უმუშევრად და სრულიად უიმედოდ, ჩვენს თანამემამულეთა სასოწარკვეთილი უმრავლესობა, სახლებშია გამოკეტილი იმის შიშით, შვილებს რა აჭამონ და ამ დროს ხელმწიფე და თავის უფლისწული ვიდეოტინგიცით პასუხობენ ერს. ოჯახი, რომელიც ბოლო 8 წელია თავის ხოშზე და კაპრიზებზე მართავს ჩვენ სიმწრით ნაშენებ გაუბედურებულ ქვეყანას" - დაწერა სააკაშვილმა.
ევროპული საქართველოს ლიდერის გიგა ბოკერიას თქმით კი, ივანიშვილმა "ამ უმძიმესი კრიზისის დროს ყველას უთხრა, ფეხებზე მკიდიხართო".
აგორებულ სკანდალზე განმარტების გაკეთება მოუხდა "ქართულ ოცნებას". პარტიის განცხადების მიხედვით, ვალდებულებად მიიჩნიეს საზოგადოებისთვის ეცნობებინათ, თუ რით არის დაკავებული ბიძინა ივანიშვილი პანდემიასთან ბრძოლის კონტექსტში:
"მაგალითისთვის, ამ ვიდეოს განთავსებამდე, ბიძინა ივანიშვილმა ჩაატარა რამდენიმე თათბირი. პირველ თათბირს, რომელიც დილის ათ საათზე დაიწყო, პარტიაში ფუნქციონირებადი ანტიკრიზისული საბჭოს ფორმატში და რომელმაც სამ სააათზე მეტ ხანს გასტანა... ამ თათბირზე განხილულ იქნა ყველა ის საჭირბოროტო საკითხი, რაც აწუხებს ხალხს და ქვეყანას პანდემიასთან ბრძოლის კონტექსტში....
ამის შემდეგ, პარტიის თავმჯდომარემ, კიდევ ორი თათბირი გამართა პარტიაში მოქმედ პროფილურ საბჭოებთან, რომლებიც ბიძინა ივანიშვილის პარტიის თავმჯდომარედ დაბრუნების შემდეგ დაფუძნდა მისივე ინიციატივით და რომლებიც კი არ დუბლირებენ ან ენაცვლებიან შესაბამის ინსტიტუტებს და სახელისუფლო შტოებს, არამედ ეხმარებიან მათ კოორდინაციის და ეფექტურობის გაზრდის თვალსაზრისით.
ამ რეჟიმში მუშაობს ბიძინა ივანიშვილი და ასე მუშაობდა ყოველთვის, რაც პოლიტიკაში დაბრუნდა. უბრალოდ ახლა, შექმნილ ვითარებაში, გაცილებით მეტი მუშაობა უწევს და კიდევ უფრო ინტენსიურ კომუნიკაციაში იმყოფება გუნდთან" - ნათქვამი იყო განცხადებაში.
- ექიმი ტელევიზიის დირექტორის წინააღმდეგ
პულმონოლოგმა დავით ნანობაშვილი შალვა რამიშვილთან ეთერში სტუმრობისას განაცხადა, რომ ის "მთავარი არხის " გენერალურ დირექტორს ნიკა გვარამიას არ უმკურნალებდა, იმ შემთხვევაში თუ მას კორონავირუსი დაემართებოდა, რის მიზეზადაც გვარამიას პოლიტიკური შეხედულებები დაასახელა.
ექიმმა "პოსტივის" ეთერში თქვა, რომ არანაირი ვალდებულება არ აქვს გვარამიას უმკურნალოს თუ ის დაინფიცირდება. "ყველა ექიმი გამწარებულია გვარამიაზე, 30 ოყნა გამოწერილი აქვს დღეში" - თქვა ნანობაშვილმა.
აღნიშნულ გაცხადებაზე მოგვიანებით კომენტარი გააკეთეს ექიმებმა ლევან რატიანმა და მარინა ეზუგბაიამ, რომლებმაც განაცხადეს, რომ პოლიტიკური ნიშნით არ ირჩევენ პაციენტს.
სკანდალს განცხადებით გამოეხმაურა ტელეკომპანია "postv", ის გაემიჯნა სტუმრის კომენტარს და განმარტა, რომ "გადაცემის წამყვანებმა მაშინვე დააფიქსირეს მკვეთრი უარყოფითი დამოკიდებულება აღნიშნული განცხადების მიმართ".
სამების საკათედრო ტაძრის ეზოში გაკეთებული არქიმანდრიტ იაკობის განცხადებამ ამირან გამყრელიძისა და პაატა იმნაძის წინააღმდეგ, მრევლის ნაწილის გულისწყრომა გამოიწვია. ნაწყენები დარჩნენ ქვეყნის მთავარი ეპიდემიოლოგებიც.
"ბატონ ამირან გამყრელიძეს და პაატა იმნაძეს... რომ გაჰკივიან ახლა და რომ გვიყვირიან, არავინ არ ვართ მაგათგან ისე დავალებული, რომ ასე გვიყვირონ, ტონს არ იცავენ, როდესაც კუბოებზე ლაპარაკობენ. იქნებ, ჩვენ არ ვიცით და ძალიან ბევრია დაინფიცირებული, გვითხრან მაინც…
თავს თუ ვერ იკავებენ, სანამ გამოვლენ, ჯერ ფსიქოანალიტიკოსებთან გაიარონ ისა, მერე მოვიდნენ და დაგველაპარაკონ. ჭკუა აქვს იმ ადამიანს, რომელიც იძახის, რომ აღდგომას არ მიხვიდეთო? ამ ორ ადამიანზე ვლაპარაკობ. სხვა ექიმები გულიანი ადამიანები არიან და სხვანაირად იქცევიან. ამათი საქციელი, ვფიქრობ, რომ უნდა გამოვიდნენ და ბოდიში მოიხადონ, რათა ღირსება შერჩეთ" - განაცხადა მეუფე იაკობმა.
დაავადებათა კონტროლის ცენტრის დირექტორის მოადგილემ ბოდბელი მიტროპოლიტის მეუფე იაკობის განცხადებას, თითქოს ქვეყანაში რეალურად მეტი ინფიცირებულია, მცირე კომენტარით უპასუხა. "უფალი განსჯის..." - განუცხადა AMBEBI.GE-ს იმნაძემ.
ხოლო ამირან გამყრელიძემ სასულიერო პირს ასაკი შეახსენა:
"თქვენ წარმოგიდგენიათ, რომ მე ეკლესიაზე შეტევა შეიძლება განვახორციელო? მეუფე იაკობი ასაკით ჩემზე უმცროსია, ამიტომ ვთხოვ, მეტად მორიდებული იყოს, როცა ასაკით უფროს ადამიანებს ესაუბრება. ექიმი ვარ და ჩემი განცხადებები გამომდინარეობს ჩემი საექიმო მრწამსიდან" - განაცხადა დაავადებათა კონტროლის ცენტრის დირექტორმა ბოდბელი ეპისკოპოსის პასუხად.
მოსალოდნელია წვიმა, ძლიერი ქარი და სეტყვა - უახლოესი დღეების ამინდის პროგნოზი
ეთერ ხაზარაძემ ,,ლოტო 6/42-ში’’ 282 402 ლარი მოიგო!
