კიდევ ერთი პირი, რომელსაც წყალტუბოში კორონავირუსი დაუდასტურდა, სათნოების სახლის ბენეფიციარია

წყალტუბოს სათნოების სახლის ბენეფიციარს ანტისხეულებით კორონავირუსი დაუდასტურდა. შუახნის ქალი ინფიცირებული მამაკაცის კონტაქტია. ის კარანტინში იყო გადაყვანილი და ვირუსზე შემოწმება ადგილზე ჩაუტარდა.

დაავადებათა კონტროლის ინფორმაციით, პაციენტს ვირუსი მსუბუქი ფორმებით აქვს.

არსებული ინფორმაციით, პაციენტი სათნოების სახლის სერვისით სარგებლობდა, თუმცა მისი დაინფიცირების შესახებ ამ დროისთვის ინფორმაცია არ აქვს სათნოების სახლის დირექტორს. მისი თქმით, მას ჯერ პასუხი არ მიუღია, თუმცა ადასტურებს, რომ სათნოების სახლში ეპიდემიოლოგები ორი დღის წინ მუშაობდნენ, ანალიზები აუღეს მის თანამშრომლებს და მოხალისეებს და მათ ვირუსი არ დაუდასტურდათ.

მისი ინფორმაციით, ანალიზებს უღებენ ბენეფიციარებსაც.

სათნოების სახლი 180-მდე ბენეფიციარს ემსახურება.