შესაძლოა თუ არა ნიკოტინმა COVID-19-ისგან დაგიცვათ? - რას ამბობს საფრანგეთში მოღვაწე ქართველი ექიმი ფრანგი მეცნიერების ახალ მიგნებაზე

საფრანგეთის ხელისუფლებამ ნიკოტინის შემცველი პროდუქტების ონლაინ გაყიდვა აკრძალა. ამ ინფორმაციას BBC ავრცელებს. გამოცემის ცნობით, მას შემდეგ რაც მეცნიერების გარკვეულმა ჯგუფმა დაადგინა, რომ თამბაქოს მწეველები კორონავირუსს უკეთესად უმკლავდებიან, მოსახლეობამ თამბაქოს ჭარბი რაოდენობით შეძენა დაიწყო, რის გამოც მის გაყიდვაზე ზომების მიღება აუცილებელი გახდა.

საფრანგეთის ხელისუფლება განმარტავს, რომ ახლა მათი მიზანია დამატებითი კვლევები ჩაატარონ და საბოლოოდ დაადგინონ შესაძლებელია თუ არა თამბაქოს მეშვეობით კორონავირუსის დამარცხება.

შეგახსენებთ, გასულ კვირას პარიზის საავადმყოფოს მეცნიერების ჯგუფმა განაცხადა, რომ პაციენტები, რომლებიც თამბაქოს მოიხმარენ კორონავირუსს უკეთესად უმკლავდებიან

როგორც გაირკვა, საუბარია ნიკოტინის პლასტერზე, რომელსაც ზოგადად სიგარეტისთვის თავის დასანებებლად იყენებენ. როგორც AMBEBI.GE-ს საფრანგეთში მოღვაწე ქართველმა ექიმმა რევაზ ბოჭორიშვილმა განუცხადა, ნიკოტინის პლასტირის გამოყენებით კორონავირუსით ინფიცირებულებზე პარიზში კვლევას მალე დაიწყებენ.

- თამბაქოს შესახებ ეს კვლევა მეც ვნახე... დაკვირვებაა, რომ დაავადებულთა შორის მწეველი ცოტაა. მაგრამ ისიც წერია იქვე, რომ მწეველებში კორონავირუსი მძიმე ფორმებით მიმდინარეობს. რატომ "იცავს" მწეველებს? ამაზე პასუხი გაურკვეველია. ახლა იწყებენ კვლევას პარიზში, ნიკოტინის პლასტირის გამოყენებით. ისევ და ისევ მხოლოდ ჰიპოთეზაა. და ბოლოს, არ დაგვავიწყდეს რომ მოწევასთან დაკავშირებული დაავადებები წელიწადში 75 000 ადამიანს კლავს (საფრანგეთში).

- ნიკოტინის პლასტირი კორონასგან დასაცავად?

- დიახ, დასაცავად ან სამკურნალოდ... ჯანმრთელებზე, საშუალო და მძიმე რეანიმაციაში მყოფ პაციენტებზე იწყება კვლევა პიტიე სალპეტრიერის კლინიკაში. ბოლო დროს იმდენი რამე იცადა სამკურნალოდ და ჯერჯერობით არაფერია რეალური. წყალწაღებულისა და ხავსის ამბავი მახსენდება. ვნახოთ რა იქნება.

- ბატონო რეზო, აქვე გკითხავთ, თქვენს მიერ გამოქვეყნებულ დღევანდელ პოსტზეც, სადაც ეწერა, რომ კორონავირუსის დროს თვალის ლინზების ტარება სახიფათოა...

- ზოგადად, როგორც ბოლო კვლევებით აღმოჩნდა, თვალების დაცვა სავალდებულო უნდა იყოს ყველასთვის, მათ შორის ექიმებისთვის, მოლარეებისთვის და იმ ადამიანებისთვის, ვისაც ბევრ ადამიანთან აქვს კავშირი.. სიფრთხილეა საჭირო როდესაც ვინმეს კონიუქტივიტი აქვს. შესაძლებელია იმან დააინფიციროს სხვა. რაც შეეხება ლინზებს, ლინზის მუდმივი მოხსნა-გაკეთების დროს ხდება ინფიცირება. უბრალოდ, რაც ნაკლებად მიიტან სახესთან ხელს, მით უკეთესი.