აუტისტური სპექტრის მქონე ბავშვებს მანქანით გადაადგილების შეზღუდვა არ შეეხებათ - რას წერს ბაია დავითაია

ბიზნესლედი და ცნობილი ბიზნესმენის თემურ უგულავას ყოფილი მეუღლე ბაია დავითაია წერს, რომ საგანგებო მდგომარეობის პირობებში ავტომანქანებით გადაადგილების აკრძალვა არ შეეხებათ აუტისტური სპექტრის მქონე ბავშვებსა და მათ ოჯახებს.

დავითაიას ვაჟი ლუკა უგულავა აუტისტია და როგორც დედა წერს, ასეთი ბავშვებისთვის ძალიან მნიშვნელოვანია გადაადგილების შეუზღუდავობა:

"მეგობრებო, რამდენიმე დღის წინ დავწერე, რომ მანქანით გადაადგილების შეზღუდვა არ უნდა შეხებოდათ აუტისტური სპექტრის მქონე ბავშვებს. ჩვენი წუხილი ჯანდაცვის სამინისტრომდე მივიდა და შინაგან საქმეთა სამინისტროს დაერთო ნება აუტისტური სპექტრის მქონე ბავშვების მანქანით გადაადგილების შესახებ.

ამისთვის აუცილებელია ფორმა 100 და ორგანიზაციის მიერ გაცემული ცნობა, რომელშიც აღნიშნულია რატომაა საჭირო მანქანით სიარული ბავშვისთვის (ორგანიზაცია, სადაც ბავშვი თერაპიებს იღებს). დამატებითი ინფორმაციის ნახვა შეგიძლიათ UNIQUE community-ში.

მადლობა ჯანდაცვის სამინისტროს და შინაგან საქმეთა სამინისტროს, ჩვენი თხოვნის გათვალისწინებისთვის" - წერს ბაია დავითაია.