"ევექსი" - კორონავირუსი ჩვენ სათაო ოფისში მომუშავე ადამიანს დაუფიქსირდა

5 პირიდან ერთ-ერთი, რომლებსაც გუშინ კორონავირუსის ახალი შემთხვევა დაუფიქსირდა, სამედიცინო ცენტრ "ევექსის" სათაო ოფისში მუშაობდა და არა ჰოსპიტალში. ამის შესახებ "ფეისბუქზე" "ევექსის" საზოგადოებასთან ურთიერთობის ხელმძღვანელი გიორგი ნიორაძე წერს.

"ძალიან ბევრი ჟურნალისტი მირეკავს და მინდა აქაც გაგცეთ ყველას პასუხი: "ევექსი ჰოსპიტლების" არცერთ თანამშრომელს კორონა ვირუსი არ აქვს დადასტურებული! ჩვენ სათავო ოფისში, სადაც რამდენიმე სხვა კომპანიაც ფუნქციონირებს დადასტურდა 1 შემთხვევა, რომლის დაინფიცირებაც იტალიაში მოხდა. მთლიან ოფისს, რომელიც 4 სართულიანია, ყოველდღიურ რეჟიმში უტარდება დეზინფექცია, იდენტიფიცირებულია დაინფიცირებულ ადამიანთან კონტაქტში მყოფი ყველა პირი და ისინი თვითიზოლაციის რეჟიმში იმყოფებიან. არაფერი განსაკუთრებული არ ხდება !!!" - წერს ნიორაძე.

ამ დროის მონაცემებით, საქართველოში კორონავურის 9 შემთხვევაა დაფიქსირებული.