ირანელი ფეხბურთელი, რომელიც კორონავირუსის მსხვერპლი ეგონათ, გარდაცვალების შესახებ ინფორმაციას უარყოფს

ელჰამ შეიხი 23 წლის ირანელი ფეხბურთელი გოგონაა. ის ფუტსალს პროფესიულ დონეზე თამაშობს. რამდენიმე დღის უკან ირანულმა მედიასაშუალებებმა გოგონას გარდაცვალების შესახებ გაავრცელეს ინფორმაცია. ელჰამის გარდაცვალებაზე წერდა Al Arabiya-ც.

აღნიშნული ცნობა ირანელმა ოფიციალურმა პირებმაც დაადასტურეს. ინფორმაცია სხვადასხვა ქვეყნების მედიასაშუალებებმა გააშუქეს და წერდნენ , რომ ელჰამ შეიხი კორონავირუსის მსხვერპლი პირველი სპორტსმენი იყო.

ყოველივე ყალბი ინფორმაცია აღმოჩნდა. როგორც გაირკვა, გოგონა ცოცხალი და ჯანმრთელია. ილჰამ შეიხმა თავად გაავრცელა სოციალურ ქსელში ვიდეომიმართვა, სადაც ამბობს, რომ ცნობას გარდაცვალების შესახებ არ ადასტურებს და რომ ცოცხალია (ნახეთ ვიდეო).

გოგონას თქმით, შეცდომა იმან გამოიწვია, რომ ირანის ქალაქ ყუმში, სადაც კორონავირუსით ინფიცირებულთა რაოდენობა ყველაზე დიდია, გარდაიცვალა მისივე ასაკისა და სახელის მქონე გოგონა.

ირანში კორონავირუსით ინფიცირებულთა რაოდენობა დღითი დღე იზრდება და ხელისუფლება ჯერჯერობით ვერ ახერხებს მასთან ეფექტურად ბრძოლას. ოფიციალური ინფორმაციით, ვირუსით ირანში 50 ადამიანია გარდაცვლილი, თუმცა როგორც სხვადასხვა ავტორიტეტული გამოცემები, მათ შორის, BBC წერენ, გარდაცვლილთა რაოდენობა გაცილებით მეტია. BBC წყაროზე დაყრდნობით წერს, რომ ირანში კორონავირუსმა 200-ზე მეტი ადამიანი იმსხვერპლა.