როდის გამოიგონებენ კორონავირუსის საწინააღმდეგო ვაქცინას - ფარმაცევტული კომპანიები მის შესაქმნელად მილიონებს ხარჯავენ

მსოფლიოს ახალი ტიპის კორონავირუსი უტევს. დაავადების ოფიციალური სახელია COVID-19. ის პირველად ჩინეთის ქალაქ უხანში გაჩნდა, სადაც 23 იანვრიდან დღემდე კარანტინია გამოცხადებული.

ვირუსი ჩინეთიდან მსოფლიოს არაერთ ქვეყანაში გავრცელდა. ამ ეტაპზე განსაკუთრებით მძიმე ვითარებაა ირანსა და იტალიაში. ვირუსის შემთხვევები გამოვლინდა დიდ ბრიტანეთში, რუსეთში, ავსტრალიაში, აშშ-სა და გერმანიაში.

ჯერჯერობით არ არსებობს ვაქცინა, რომელიც ადამიანს ახალი ტიპის კორონავირუსისგან დაიცავს, თუმცა ბაზარზე არსებული ფარმაკოლოგიური კომპანიები ინტენსიურად მუშაობენ მის შესაქმნელად.

ბიოტექნოლოგიების უმსხვილესი კომპანიის Moderna-სა და ფარმაკოლოგიურ ბაზარზე გიგანტი კომპანიის, Johnson & Johnson-ის წარმომადგენლები ამბობენ, რომ ბევრს მუშაობენ ვაქცინის გამოსაგონებლად, მაგრამ ამავდროულად დასძენენ, რომ მისი შექმნა მალე ვერ მოხერხდება. ამის შესახებ გამოცემა Forbes წერს.

რამდენ ხანში შეძლებენ მეცნიერები კორონავირუსის საწინააღმდეგო ვაქცინის გამოგონებას?

აშშ-ის ალერგიისა და ინფექციური დაავადებების ეროვნული ინსტიტუტის დირექტორი, ენტონი ფაუსი ამბობს, რომ ვაქცინის გამოგონებას, დაახლოებით, ერთი წელი დასჭირდება. მისივე განმარტებით, მოხმარებაში ჩაშვებამდე რამდენიმე ეტაპის გავლაა საჭირო.

ჯერ უნდა ჩატარდეს საცდელი კვლევები, იმის დასადგენად, თუ რამდენად უსაფრთხოა ის და ხომ არ იწვევს რაიმე დაავადებას, ხომ არ აქვს უკუჩვენებები.

რატომ სჭირდება ვაქცინის გამოგონებას დიდი დრო?

ჩვეულებრივ პირობებში ვაქცინის გამოგონებას დაახლოებით 10-15 წელი სჭირდება, რადგანაც მკვლევარებსა და ექიმებს სურთ დარწმუნდნენ, რომ ისინი აწვდიან ადამიანებს სამკურნალო საშუალებას, რომელიც ყოველმხრივ უსაფრთხოა. სანამ აშშ-ში ვაქცინას დაამტკიცებენ და მოხმარებაში ჩაუშვებენ, ის განვითარების რამდენიმე საფეხურს გადის. ეს საფეხურები მოიცავს ცხოველებზე გატესტვას, ადამიანზე გატესტვას, ხარისხის კონტროლს და ა.შ.

კეტლინ ნეუზილი, აშშ-ის ვაქცინის განვითარების ცენტრის ხელმძღვანელი ამბობს, რომ ძალიან ბევრი ფაქტორია, რომელიც განაპირობებს იმას, თუ რა დრო დასჭირდება ვაქცინის გამოგონებას - მათ შორის, დაავადების სირთულე, ის, თუ როგორ მოქმედებს ადამიანის იმუნური სისტემა კონკრეტულ დაავადებაზე და ა.შ.

მისივე განმარტებით, რესპირატორული დაავადებების საწინააღმდეგო ვაქცინის გამოგონება უფრო რთულია, ვინაიდან ასეთ დროს კიდევ უფრო მეტი ფაქტორია გასათვალისწინებელი. კორონავირუსი კი სწორედ რესპირატორული დაავადებაა.

აღსანიშნავია ისიც, რომ ვაქცინის გამოგონება დიდ თანხასთანაა დაკავშირებული. საერთო ჯამში, წარმატებული ვაქცინის შექმნას შეიძლება ასობით მილიონი დოლარი დასჭირდეს.

ვინ მუშაობს ვაქცინის შექმნაზე?

კორონავირუსის საწინააღმდეგო ვაქცინის შესაქმნელად სხვადასხვა მსხვილი ფარმაცევტული კომპანიები დამოუკიდებლად მუშაობენ. მათ შორის ყველაზე დიდი მოლოდინი Johnson & Johnson-სგან აქვთ.

ვაქცინის გამოგონებაზე Forbes-ის ინფორმაციით, მუშაობს პენსილვანიის ბიოტექნოლოგიური კომპანია Inovia, ასევე, მასაჩუსეტსის ბიოტექნოლოგიური კომპანია Moderna.

Inovio-მ ვაქცინის გამოსაგონებლად 9 მილიონი დოლარის ოდენობის გრანტი მიიღო. კომპანიის აღმასრულებელი დირექტორი ჯოზეფ კიმი ვარაუდობს, რომ კორონავირუსის საწინააღმდეგო ვაქცინის გამოყენებას ადამიანები 7 თვეში შეძლებენ, რადგანაც მეცნიერები დაჩქარებული ტემპით მუშაობენ.

კომპანია Moderna-ში ამბობენ, რომ ვაქცინის პირველი, ე.წ. კლინიკური, დასამუშავებელი ვერსიის შექმნა 7 თებერვლისთვის დასრულდა და რაც შეიძლება მალე უნდა გადავიდნენ მისი განვითარების შემდეგ საფეხურზე, თუმცა, ჯერჯერობით კონკრეტულ თარიღს ვერ ასახელებენ.

რაც შეეხება Johnson & Johnson-ს, სწორედ აქ მომუშავე მეცნიერებმა შექმნეს ებოლასა და ზიკას საწინააღმდეგო ვაქცინები და აქაური მკვლევარები ამბობენ, რომ დაახლოებით 8-დან 12 თვემდეა საჭირო იმისთვის, რომ ვაქცინა ადამიანებისთვის ხელმისაწვდომი იყოს.