რა წერილი დატოვა თავდამსხმელმა, რომელმაც გერმანიის ბარში 9 ადამიანი მოკლა და თავი მოიკლა

გერმანიის ქალაქ ჰანაუში, რომელიც ფრანკფურტთან ახლოს მდებარეობს, შეიარაღებული პირი ორ სხვადასხვა ადგილას ჩილიმ ბარებს დაესხა თავს. თავდასხმის შედეგად, ბოლო ინფორმაციით გარდაცვლილია, ცხრა და დაშავებულია 6 ადამიანი.

გერმანული მედია ავრცელებს ინფორმაციას, რომ შემთხვევიდან რამდენიმე საათში თავდასხმაში ეჭვმიტანილი, 43 წლის ტობიას რ.საკუთარ სახლში გარდაცვლილი იპოვეს. სახლში კიდევ ერთი ადამიანის ცხედარი იყო, რომელიც სავარაუდოდ, თავდამსხმელის დედაა.

როგორც BBC წერს, სამართალდამცველები მომხდარს ტერორიზმს უწოდებენ და ოფიციალური პირები მომხდარს ეთნიკურ მოტივებს უკავშირებენ. აღსანიშნავია, რომ ჩილიმ ბარებს, რომელსაც ტობიას რ. თავს დაესხა, ძირითადად თურქები და ქურთები სტუმრობდნენ. არსებული ინფორმაციით, გარდაცვლილთა უმეტესობა ქურთები არიან.

პოლიციელები ამბობენ, რომ 43 წლის ტობიასის გარდაცვალების მიზეზი თვითმკვლელობაა.

BBC გერმანულ გამოცემა Bild-ზე დაყრდნობით წერს, რომ თავდამსხმელი გერმანიის მოქალაქე იყო, რომელსაც ჰქონდა ცეცხლსასროლი იარაღის ტარების ლიცენზია.

Bild-ის ინფორმაციით, თავისი ქმედების მოტივები ტობიას რ-მ წერილში განმარტა, რომელიც მის სახლში იპოვეს. წერილის შინაარსი კი ასეთია - "გარკვეული ადამიანები, რომლებიც გერმანიაში ცხოვრობენ, უნდა მოისპონ, რადგანაც მათი განდევნა ქვეყნიდან სხვაგვარად ვერ ხერხდება“.

აღსანიშნავია, რომ წერილის შესახებ ინფორმაცია ოფიციალურად ჯერჯერობით დადასტურებული არ არის.

თავდამსხმელს მსგავსი შინაარსის ვიდეოები სოციალურ ქსელშიც აქვს შემთხვევამდე რამდენიმე დღით ადრე გამოქვეყნებული.

გამოცემა Daily Mail წერს, რომ ერთ-ერთი ვიდეოს საშუალებით ის ამერიკელებს მიმართავს. აკრიტიკებს მათ და ადანაშაულებს ბავშვებზე სექსუალურ ძალადობასა და მიწისქვეშა შეიარაღებული ბაზების არსებობაში. ის მოუწოდებს ამერიკელებს, გაერთიანდნენ და იბრძოლონ ყოველივეს წინააღმდეგ.