საქართველოში წამყვანი ამერიკული უნივერისტეტი, ვებსტერი შემოდის - 2021 წლიდან სტუდენტებს შეეძლებათ, ამერიკული განათლება და დიპლომი საქართველოში, ქვეყნის დატოვების გარეშე მიიღონ

ამერიკული უნივერსიტეტის, ვებსტერის კამპუსის „სილიკონ ველი თბილისის“ ტერიტორიაზე გახსნის შესახებ მემორანდუმი ბიზნესისა და ტექნოლოგიების უნივერსიტეტში გაფორმდა. მემორანდუმს ხელი ვებსტერის უნივერსიტეტის პრეზიდენტმა, ჯულიან შუსტერმა და ბიზნესისა და ტექნოლოგიების უნივერსიტეტის სამეთვალყურეო საბჭოს თავმჯდომარემ, მიხეილ ბატიაშვილმა მოაწერეს.

წამყვანი ამერიკული უნივერსიტეტი, საერთაშორისო განათლების ლიდერი - ვებსტერი (Webster University), რეგიონში პირველ კამპუსს საქართველოში, „სილიკონ ველი თბილისის“ ტერიტორიაზე 2021 წელს გახსნის, სადაც ქვეყნის ყველაზე სწრაფად მზარდი და ინოვაციური უმაღლესი სასწავლო დაწესებულება - ბიზნესისა და ტექნოლოგიების უნივერსიტეტი (BTU) მდებარეობს.

ვებსტერის უნივერსიტეტის პრეზიდენტის, ჯულიან შუსტერის განცხადებით, ვებსტერის უნივერსიტეტის კამპუსის გახსნა საუკეთესო შესაძლებლობაა როგორც ვებსტერის უნივერსიტეტისთვის, ასევე პარტნიორი უნვიერსიტეტისთვისაც საქართველოში.

„მიზანი არის ის, რომ მივყვეთ ჩვენს ღირებულებებს და ხედვას. აქ ვართ იმისთვის, რომ საქართველოსა და რეგიონს საუკეთესო ხარისხის განათლება მივაწოდოთ. ჩვენ ამ მიზნის ერთგულები ვართ და ჩვენი მიზანია, შემოვიყვანოთ მსოფლიო საქართველოში, ისევე, როგორც განვავრცოთ საქართველო მსოფლიოში. კამპუსის გახსნა დიდ შანსებს მისცემს ქართველ და ასევე, მეზობელო ქვეყნების სტუდენტებს, მიიღონ ამერიკული განათლება. ჩვენთვის ეს თანამშრომლობა საინტერესოა იმ მხრივ, რომ ამ რეგიონში პირველად ვართ, ჩვენი პარტნიორობა ახლა იწყება და ვფიქრობ, რომ იგი ძალიან წარმატებული იქნება“, - განაცხადა შუსტერმა.

ბიზნესისა და ტექნოლოგიების უნივერსიტეტის სამეთვალყურეო საბჭოს თავმჯდომარემ, მიხეილ ბატიაშვილმა აღნიშნა, რომ ვებსტერის უნივერსიტეტის საქართველოში სწორედ „სილიკონ ველი თბილისში“ შემოსვლა იმაზე მიანიშნებს, რომ „სილიკონ ველის“, ბიზნესისა და ტექნოლოგიების პროექტი წარმატებით ხორციელდება.

„დღეევანდელი დღე განსაკუთრებული და ძალიან მნიშვნელოვანი დღეა, ხელი მოეწერა შეთანხმებას და გაიხსნა რეგიონში პირველი, ამერიკული ვებსტერის უნივერსიტეტი, რომელიც მოგეხსენებათ, რომ მსოფლიოს ლიდერი უნივერსიტეტია, აქვს თავისი კამპუსები არა მარტო ამერიკაში, არამედ ჰოლანდიაში, შვეიცარიაში, ავსტრიაში და ასეთი ქვეყნების შემდეგ რეგიონში რომ სწორედ საქართველოზე გაკეთდა აქცენტი, ეს არის ძალიან მნიშვნელოვნი. ასევე ძალიან მოხარულები ვართ, რომ სილიკონ ველის პროექტი აღმოჩნდა ის პროექტი, სადაც მოხდება მათი კამპუსის განვითარება. ეს იმას ნიშნავს, რომ ფაქტობრივად, სტუდენტებს აღარ მოუწევთ უცხოეთში სწავლა, არამედ საქართველოში შეეძლებათ, მიიღონ ამერიკული განათლება, ამერიკელი პროფესორებისგან. რა თქმა უნდა, ეს ყველაფერი ემსახურება იმას, რომ საქართველოში რაც შეიძლება, მაღალი ხარისხის განათლება მიიღონ და ამერიკული დიპ-ლომი მიიღონ საქართველოში, ამერიკაში წაუსვლელად“, - აღნიშნა მიხეილ ბატიაშვილმა.

მისივე თქმით, ვებსტერთან დაკავშირებით გეგმები მრავალი მიმართულებით არსებობს და თავდაპირველად, 2021 წელს როგორც ბაკალავრიატზე, ისე მაგისტრატურაზე სამი პროგრამის სწავლება დაიწყება: მედია კომუნიკაციების, ბიზნეს ადმინისტრირებისა და საერთაშორისო ურთიერთობების პროგრამები. მისივე თქმით, დანარჩენი პროგრამები ეტაპობრივად ამოქმედდება. როგორც ბატიაშვილმა აღნიშნა, გეგმებში შედის, რომ ქართველი სტუდენტები საქართველოში სწავლასთან პარალელურად, გაცვლით პროგრამებში იღებდნენ მონაწილეობას და სემესტრებს სხვა ქვეყნებში, ვებსტერის სხვა კამპუსებში გადიოდნენ.

ღონისძიებას ესწრებოდა ამერიკის შეერთებული შტატების ელჩის მოადგილე, ელიზაბეთ რუდიც, რომელმაც აღნიშნა, რომ ამერიკის შეერთებული შტატების საელჩო მოხარულია, დაესწროს მემორანდუმის ხელმოწერის პროცედურას ბიზნესისა და ტექნოლოგიების უნივერსიტეტსა და ვებსტერის უნივერსიტეტს შორის.

„დღევანდელი დღე ნამდვილად ბედნიერი და გამორჩეული დღეა ამერიკა-საქართველოს თანამშრომლობასა და პარტნიორობაში განათლების სფეროს მიმართულებით. ნამდვილად საოცარია იმის დანახვა, თუ როგორ შემოჰყავს ბიზნესისა და ტექნოლოგიების უნივერსიტეტს საქართველოში ამერიკული უნივერსიტეტის, ვებსტერის პროგრამები. ეს პარტნიორობაა, რომელიც ამერიკისა და საქართველოს განათლების საუკეთესო ნაწილს ერთად აქცევს და ამის დასაწყისის შემყურენი ძალიან ვამაყობთ. 2021 წლიდან საქართველოსა და რეგიონის სტუდენტებს შეეძლებათ, მიიღონ ამერიკული განათლება და დიპლომი ვებსტერის უნივერსიტეტში. ამერიკის შეერთებული შტატები ყოველთვის ძალიან ამაყობს ჩვენს ქართველ პარტნიორებთან თანამშრომლობით განათლების მიმართულებით“, - განაცხადა რუდმა.

ასევე, ღონისძიებაზე ისაუბრა ვებსტერის უნივერსიტეტის კურსდამთავრებულმა ირინა მირიანაშვილმა, რომელიც ვებსტერის კამპუსში ავსტრიაში, დედაქალაქ ვენაში სწავლობდა.

„დიდი პატივია, რომ მეძლევა საშუალება, ვიყო თქვენთან ერთად და გაგიზიაროთ ის გამოცდილება, რაც ვებსტერის უნივერსიტეტის ვენის კამპუსში მივიღე. 2012 წელს სწავლა ვენაში, ვებსტერის უნივერსიტეტში გავაგრძელე და ეს უნივერსიტეტი სწორედ იმიტომ ავირჩიე, რომ ამერიკული განათლების მიღება მსურდა. ის დრო, რაც იქ გავატარე, ჩემი ცხოვრების ერთ-ერთი უმნიშვნელოვანესი პერიოდი იყო, როდესაც დამოუკიდებლად ცხოვრება ვსიწავლე. ვებსტერის უნივერსიტეტში სწავლამ მომცა უდიდესი თეორიული ცოდნა, მაგრამ ასევე, აღმჭურვა ისეთი უნარებითაც, რომელიც მეხმარება თითოეული შემხვედრი გამოწვევის დაძლევაში. ვებსტერი რომ არა, ახლა იქ არ ვიქნებოდი, სადაც ვარ. მინდა, ხაზი გავუსვა აქ, „სილიკონ ველი თბილისში“ ვებსტერის კამპუსის გახსნის მნიშვნელობას. დღეს, როდესაც ვებსტერის უნივერსიტეტის კამპუსი თბილისში უნდა გაიხსნას, საოცრად ამაყი ვარ, რომ ამ უნივერსიტეტში მიღებული განათლება მაქვს და ვიცი, რომ ჩვენი სტუდენტები, მომავალი თაობა მიიღებს იმავე დონის განათლებას აქ, საქართველოში. ეს უდიდესი წინსვლაა ჩვენი განათლების სექტორში“, - აღნიშნა ვებსტერის უნივერსიტეტის კურსდამთავრებულმა.

ბიზნესისა და ტექნოლოგიების უნივერსიტეტში აღნიშნავენ, რომ ვებსტერის უნივერსიტეტის რეგიონში შემოსვლა ახალგაზრდებს მისცემს შესაძლებლობას, 2021 წლიდან ამერიკული განათლება და დიპლომი საქართველოში, ქვეყნის დატოვების გარეშე მიიღონ. ვებსტერი საქართველოში საბაკალავრო, სამაგისტრო და სატრენინგო პროგრამებს განახორციელებს, კერძოდ:

საბაკალავრო პროგრამები: ბიზნესის ადმინისტრირება - მენეჯმენტი; საერთაშორისო ურთიერთობები, მედიაკომუნიკაცია.

სამაგისტრო პროგრამები: ბიზნესის ადმინისტრირება - მენეჯმენტი; საერთაშორისო ურთიერთობები; მედიაკომუნიკაცია.

პროგრამის განმახორციელებლები ვებსტერის უნივერსიტეტის პროფესორები და ადგილობრივი დარგის სპეციალისტები იქნებიან.

ბიზნესისა და ტექნოლოგიების უნივერსიტეტის ინოვაციური პროგრამები და საერთაშორისო სტანდარტების შესაბამისი გადამზადების პროგრამა, მაღალი ხარისხი და მნიშვნელოვანი პარტნიორები, ძლიერი ტექნოლოგიური ბაზა, მაღალტექნოლოგიური ლაბორატორიები, შექმნილი ეკო სისტემა - ეს იმ მიზეზების ნაწილია, რის გამოც ამერიკულმა უნივერსიტეტმა არჩევანი ბიზნესისა და ტექნოლოგიების უნივერსიტეტსა და სილიკონ ველი თბილისზე გააკეთა.

ვებსტერის უნივერსიტეტი 2000-მდე კვადრატული მეტრის ფართობზე “სილიკონ ველი თბილისის” ტერიტორიაზე განთავსება, სადაც ასევე მოეწყობა ლაბორატორიები, აუდიტორიები, ბიბლიოთეკა და სამუშაო სივრცეები.

ფორბსის უნივერსიტეტების 2019 წლის ტოპ რეიტინგში შესული ვებსტერის უნივერსიტეტი დაარსების დღიდან, 1915 წლიდან ლიდერობს და დღეს ფლობს კამპუსებს ჩრდილოეთ ამერიკის, ევროპის, აზიისა და აფრიკის კონტინენტებზე. ვებსტერის კამპუსები მსოფლიოს სხვადასხვა ქვეყანაში, მათ შორის - ჰოლანდიაში, ავსტრიაში, შვეიცარიაში, საბერძნეთში მდებარეობს.

2018 წელს, საზღვარგარეთ განხორციელებული პროგრამებით, ვებსტერი აშშ-ს #4 სასწავლებელი გახდა ,,ამერიკის საუკეთესო უნივერსიტეტების’’ რეიტინგში, სადაც აშშ-ს 1500 სასწავლებლიდან მხოლოდ 44 მოხვდა.

ვებსტერის რეპუტაციას განაპირობებს მრავალი გავლენიანი სარეიტინგო სისტემების მიერ მისი, როგორც აშშ-ს ერთ - ერთი საუკეთესო სასწავლების წარმოჩენა. ესენია: Washington Monthly, College NET, National Council for Accreditation of Teacher Education (NCATE), College Choice, AccreditedSchoolsOnline.org, Military Times დასხვა.