"მძიმე დაავადება ჰქონდა, ბოლო პერიოდში საავადმყოფოში იწვა..." - მსახიობი ლალი ბადურაშვილი გარდაიცვალა

მსახიობი ლალი ბადურაშვილი 81 წლის ასაკში გარდაიცვალა, ინფორმაცია ამის თაობაზე AMBEBI.GE-ს მისმა ნათესავმა, მსახიობმა იმედო კახიანმა დაუდასტურა.

"როგორც იცით, ლალის მძიმე დაავადება ჰქონდა - სიმსივნე. ბოლო პერიოდში საავადმყოფოში იწვა და ორი საათის წინ კლინიკაში გარდაიცვალა", - გვითხრა მსახიობმა.

ლალი ბადურაშვილს სიმსივნის დიაგნოზი გასულ წელს დაუსვეს. მისთვის უმძიმესი დარტყმა იყო ერთადერთი შვილის, რეჟისორ ერეკლე ბადურაშვილის გარდაცვალება. რეჟისორი 2019 წლის მარტში გარდაიცვალა, რის შემდეგაც ლალი ბადურაშვილი რამდენჯერმე მოხვდა საავადმყოფოში. ის შვილის დაკრძალვის დღესაც კლინიკაში გადაიყვანეს, სადაც გარკვეული პერიოდის განმავლობაში მკურნალობდა.

მოგვიანებით, ჟურნალ "სარკესთვის" მიცემულ ინტერვიუში მსახიობი იხსენებდა:

"ძალიან გადაბმული დედა-შვილი ვიყავით. ჯერ ერთი, კინო გვაერთიანებდა, საერთო წრე გვყავდა, სტუდიაში ერთად ვიყავით. სულ სხვაა, როცა დილიდან საღამომდე ერთ სტუდიაში ხართ და გადაღებებიდან დაწყებული ყველაფერი საერთო გაქვთ.

ერეკლე არაჩვეულებრივი, მოსიყვარულე ადამიანი და ასეთივე მამა გახლდათ. ნინის ამიტომაც უჭირს ასე... 40 დღე ყოველდღე სასაფლაოზე ადიოდა და პანაშვიდს უხდიდა მამას. ნინი ამბობს, მის გარეშე მიჭირს, რადგან არამხოლოდ მამა, მეგობარი დავკარგე, ვისაც ყველაფერს ვუყვებოდიო..." - ამბობდა "სარკესთან" ინტერვიუში ლალი ბადურაშვილი.

ბადურაშვილმა დაამთავრა თბილისის ილია ჭავჭავაძის სახელობის უცხო ენათა ინსტიტუტი ფრანგული ენის სპეციალობით. მუშაობდა თბილისის სახელმწიფო უნივერსიტეტის კათედრაზე. 1970 წელს გადაიღეს ფილმში „დიდოსტატის მარჯვენა“, რომელშიც შეასრულა შორენას როლი. ასევე, მონაწილეობდა რამდენიმე ფილმში. იყო „ქართული ფილმის“ რედაქტორი.

2016 წელს მიენიჭა თბილისის საპატიო მოქალაქის წოდება.