ბაღდათში სახლში, სადაც 6 ადამიანი დაიწვა, ხანძარი სავარაუდოდ, ბუხრიდან გაჩნდა
ბაღდათის მუნიციპალიტეტში ხანძრის ადგილზე, სადაც ექვსი ადამიანი დაიწვა, პოლიცია და მაშველები ამ დრომდე მუშაობენ.
ადგილზე თბილისიდან ელოდებიან ექსპერტ-კრიმინალისტებს, რომ მოხდეს გამომწვევი მიზეზის დადგენა.
მეზობლების ინფორმაციით, მიტოვებულ სახლში, სადაც გორგოძეების ოჯახი ცხოვრობდა, ელექტროენერგია და ბუნებრივი აირი არ იყო და ხანძარი, სავარაუდოდ, ბუხარში დანთებულმა ცეცხლმა გამოიწვია.
ხანძარს შემთხვევით გადაურჩნენ დაღუპული ოთხი ბავშვის მამა და ბებია, ისინი შემთხვევის დროს მაღაზიაში იყვნენ წასული, უკან დაბრუნებულებმა კი ოჯახის წევრების გადარჩენა ვერ მოახერხეს, რადგან ხის სახლს ცეცხლი წამებში მოედო.
ადგილობრივების ინფორმაციით, გორგოძეების ოჯახი ბაღდათში, წერეთლის ქუჩაზე მდებარე მიტოვებულ სახლში რამდენიმე დღის წინ შესახლდა. არსებული ინფორმაციით, მათ ერთი კვირის წინ ოჯახის წევრი გარდაეცვალათ.
ბაღდათის მერია არ ადასტურებს გავრცელებულ ინფორმაციას იმის შესახებ, რომ სოციალურად დაუცველ ოჯახს მოხსნილი ჰქონდა სოციალური დახმარება. ქალაქის მერის არჩილ გოქსაძის თქმით, ოჯახს შემოწმების მიზნით ერთი თვით ჰქონდა დახმარება შეჩერებული და თანხა დეკემბერში სრულად დაერიცხათ. ამასთან, გორგოძეები მრავალშვილიანი ოჯახის დახმარებასაც იღებდნენ.
წუხელ ბაღდათში მომხდარ ტრაგედიას 6 ადამიანი ემსხვერპლა. დაღუპულია ორსული ქალი ოთხ მცირეწლოვან შვილთან ერთად და ოჯახის ახლობელი შუახნის ქალი.
მარტყოფში მომხდარ მკვლელობაში ბრალდებული, წარსულში 18-წლიან სასჯელს იხდიდა - რას ყვება მონასტრის წინამძღვარი
"მასალა სიმაღლეზე კუსტარულად დამზადებული მექანიზმით აჰქონდათ" - რა დარღვევები იყო სამშენებლო ობიექტზე, საიდანაც ორი მუშა გადმოვარდა
