მდიდრულ ვილაში ცხოვრება, მოგზაურობა, გართობა და ბევრი ფული - ოცნების სამსახური იბიცაზე წყვილებისთვის

ესპანეთი, იბიცა ადამიანებისთვის დასასვენებლად, სამოგზაუროდ ერთ-ერთი ყველაზე საყვარელი მიმართულებაა, მაგრამ ბევრისთვის იქ მოხვედრა აუხდენელი ოცნებაა, რადგანაც ყოველივე საკმაოდ დიდ თანხასთანაა დაკავშირებული.

თუკი იბიცაზე ცხოვრება თქვენი ოცნებაა, მდიდრული ვილის მფლობელები შესანიშნავ შესაძლებლობას გაძლევენ.

ისინი ეძებენ წყვილს, რომელიც საცხოვრებლად იბიცაზე გადავა და მეპატრონეებს ვილის მენეჯმენტში დაეხმარება. ამის შესახებ Business Insider წერს.

წყვილს დაევალება სახლის მოვლა და ვილის სტუმრებისთვის მასპინძლობის გაწევა. აუცილებელია, რომ კანდიდატს ჰქონდეს მართვის მოწმობა. ასევე, როგორც განცხადებაშია აღნიშნული, წყვილს ერთ გუნდად მუშაობა და ეფექტური კომუნიკაცია უნდა შეეძლოს.

მენეჯერები სურვილის შემთხვევაში ვილაში იცხოვრებენ, მაგრამ თუ განმარტოება და მყუდრო გარემოში ყოფნა მოუნდებათ, მათთვის ვილასთან ახლოს მდიდრული აპარტამენტია განთავსებული.

მენეჯერების განკარგულებაში იქნება აუზი, საუნა, ასევე შეეძლებათ ისარგებლონ სხვადასხვა სპა პროცედურებით.

განცხადებაში ისიც აღნიშნულია, რომ წყვილს შეეძლება ქალაქის ღამის ცხოვრებით დატკბეს, გართობის ხარჯებს კი ვილის მეპატრონე გადაიხდის. მენეჯერებს ექნებათ შვებულებაც, ასევე სამოგზაუროდ ვილის მეპატრონეებიც დაპატიჟებენ.

ხელფასის სახით ყოველ თვეში, თითოეული მათგანი 2600 დოლარს მიიღებს და თანხის მთლიანად დაზოგვას შეძლებენ, რადგანაც ყველანაირ ხარჯებს მეპატრონეები დაფარავენ - მოგზაურობის, ტრანსპორტის, ჩაცმისა და კვების ჩათვლით.