"ორგანიზმმა აპარატი ვერ მიიღო, ფილტვებში გამოიწვია სისხლდენა" - ანიტა ფაცაციას მდგომარეობაზე ოჯახის ახლობლები ახალ ინფორმაციას ავრცელებენ

პატარა ანიტა ფაცაციასთვის, რომელსაც მთელი საქართველო გულშემატკივრობს, წუხანდელი ღამე რთული აღმოჩნდა. როგორც გოგონას ოჯახის ახლობლები სოციალურ ქსელში წერენ, ანიტასთვის სპეციალური აპარატის ჩაყენება გადაწყდა, რომელიც გულს მუშაობაში დაეხმარებოდა, თუმცა ორგანიზმმა აპარატი ვერ მიიღო.

"ანიტას ორგანიზმმა აპარატი ვერ მიიღო, ფილტვებში გამოიწვია სისხლდენა. შეიყვანეს საოპერაციოში, ამბობენ, რომ 4-6 საათი გაგრძელდება ოპერაცია, ამჯერად შიგნიდან უნდა ჩადგეს აპარატი. წუხანდელი ღამე მედიკოსების თქმით სასწაული იყო, 0% იყო შანსიო, ხელის მასაჟით ავამუშავეთ გულიო...გავაგრძელოთ გულმხურვალე ლოცვა" - წერს გოგონას ახლობელი "ფეისბუქის" ჯგუფში, რომელიც ანიტასთვის შეიქმნა და სადაც გოგონას მდგომარეობის შესახებ ინდოეთიდან ინფორმაციას მუდმივად აწვდის საზოგადოებას.

ოჯახის კიდევ ერთი ახლობელი ანიტას წუხანდელი (გოგონას ოპერაციამდე შეყვანის დრო) მდგომარეობის შესახებ წერს:

"ანიტა ოპერაციაზე შეყავთ!მარიკომ ძალიან გთხოვათ ყველას, რომ ილოცოთ ანიტასთვის!

ცოტახნის წინ დაფიქსირდა გულის გაჩერება.

როგორც ექიმებმა აცნობეს ოჯახს, გადაწყდა ეკმოს აპარატის ჩაყენება (ეს აპარატი გულს დაეხმარება მუშაობაში და მოგვაგებინებს 3-4 კვირას)ამ წუთებში ელოდებიან ექიმ ბალაკრიშნანის მისვლას კლინიკაში.

ძალიან გთხოვთ გაითვალისწინოთ ჩვენი მდგომარეობა, ამაზე მეტი არაფრის თქმა ამ დროისთვის არ შეგვიძლია!

ყველას გთხოვთ ვისაც როგორ შეგიძლიათ ისე ინატრეთ ანიტას კარგად ყოფნა!".

2 წლის ანიტა ფაცაციას უმძიმესი დაავადება - დილატაციური კარდიომიოპათია დაუდგინდა. მას ესაჭიროება მსოფლიოში ერთ-ერთი ურთულესი ოპერაცია - გულის გადანერგვა. პატარა გოგონას ოჯახს რამდენიმე ქვეყანამ უარი უთხრა ოპერაციის გაკეთებაზე. ამჟამად ის ინდოეთის ერთ-ერთ კლინიკაში იმყოფება.