ვინ არის რუსი ჟურნალისტი, რომელიც საქართველოს მთავრობას თავშესაფარს სთხოვს

რუსი ჟურნალისტი და სამოქალაქო აქტივისტი იური იზოტოვი საქართველოს ხელისუფლებას თავშესაფრის თხოვნით მიმართავს. ამის შესახებ ინფორმაციას Крым.Реалии ავრცელებს.

ეკატერინბურგელი ჟურნალისტის ინფორმაციით, მას რუსეთში დევნიან.

"რუსი ძალოვნები აწარმოებდნენ ჩემი ელექტრონული ფოსტისა და სოციალური ქსელების თვალთვალს. მათ შეუძლიათ ნებისმიერ დროს გააყალბონ საქმე ჩემს წინააღმდეგ და ძებნილთა სიაში შემიყვანონ" - ამბობს იზოტოვი.

ახალგაზრდა მამაკაცი ФСБ-ს ყურადღების ცენტრში 2016 წელს მოექცა. სპეცსამსახურები მისით მას შემდეგ დაინტერესდნენ, რაც იზოტოვი ლუგანსკის ოლქში იმყოფებოდა და მოხალისეობრივად ეხმარებოდა ადგილობრივებს ომისგან დაზიანებული სახლების აღდგენაში. უკვე მაშინ, 20 წლის აქტივისტის წინააღმდეგ მუქარები დაიწყო.

"რადიო თავისუფლების" ინფორმაციით, რუსმა ჟურნალისტმა ქვეყანა 2016 წლის დეკემბერში დატოვა. იზოტოვი ირწმუნება, რომ კიევში გამართულ ანტისაომარ აქციებში მონაწილეობის გამო, შესაძლოა პოლიტიკური დევნისა და სისხლის სამართლის საქმის მსხვერპლი გახდეს.

მიუხედავად იძულებითი ემიგრაციისა, იზოტოვი აგრძელებს საზოგადოებრივ-პოლიტიკურ აქტივობას და აპროტესტებს რუსეთის ქმედებებს უკრაინაში.

აღსანიშნავია რომ, ცოტა ხნის წინ, იზოტოვს თავშესაფრის მინიჭებაზე უკრაინის ხელისუფლებამ უარი უთხრა.