ბათუმში დააჯილდოვეს მოქალაქე, რომელმაც პოლიციელი სიკვდილს გადაარჩინა

ბათუმის საკრებულომ მოქალაქე რაულ თებიძე პოლიციელის სიცოცხლის გადარჩენისთვის დააჯილდოვა.

დღევანდელ საკრებულოს სხდომაზე რაულ თებიძე საპატიო სტუმრად იყო მიწვეული. ექიმების თქმით, რომ არა მისი დახმარება პოლიციელი ოთარ თავართქილაძე ვერ გადარჩებოდა.

თავართქილაძე ბათუმში 18 დეკემბერს დაჭრეს. მას თავდამსხმელმა ყელის არეში მიაყენა ჭრილობა. დაჭრილს პირველადი დახმარება შემთხვევის ადგილზევე გაუწია რაულ თებიძემ - სისხლდენა შეუჩერა და რესპუბლიკურ საავადმყოფოში გადაყვანამდე დაჭრილ პოლიციელს დაეხმარა.

თებიძე 41 წლისაა, იგი ხელოსანია და ბათუმში მშენებლობაზე მუშაობს.

პოლიციელის გადამრჩენელს აჭარის მთავრობის სარეზერვო ფონდიდან 2000 ლარი და სიგელი გადაეცა საჩუქრად.

რაც შეეხება დაჭრილ პოლიციელს, იგი ამ დრომდე კლინიკაში რჩება და მკურნალობას გადი, მის სიცოცხლეს საფრთხე არ ემუქრება.

შეგახსენებთ, ბათუმში, ჭავჭავაძის ქუჩაზე 18 დეკემბრის ღამით პოლიციელი დაჭრეს. შემთხვევა მაშინ მოხდა, როდესაც საპატრულო პოლიციის თანამშრომელი ოთარ თავართქილაძე სამსახურებრივ მოვალეობას ასრულებდა.

ეკიპაჟი მანქანით გადაადგილდებოდა, როდესაც უცნობმა პირმა ისინი გააჩერა და ერთ-ერთ სამართალდამცველს ყელის არეში მძიმე ჭრილობა მიაყენა. ბრალდებული დაჭრილის მეწყვილემ ადგილზე დააკავა.

პოლიციელის დაჭრაში ბრალდებულ გელა ჭაღალიძეს კი ბათუმის საქალაქო სასამართლომ პატიმრობა შეუფარდა.