"ბანკი გაძარცვა, ქუჩაში უცნობებს ფულებს გვაყრიდა და ყვიროდა, შობას გილოცავთ", - უჩვეულო დანაშაული აშშ-ში

კოლორადოში წვერიანმა, ჭაღარა მამაკაცმა ბანკი გაძარცვა, ფული უცნობებს დაურიგა და ქუჩაში ყვიროდა, „შობას გილოცავთ.“

კოლორადოს პოლიციის დეპარტამენტის ცნობით, მამაკაცი შეიარაღებული იყო. მან იარაღის მუქარით ბანკიდან დიდი რაოდენობის თანხა წაიღო.

CBS-ის ცნობით, მამაკაცმა ფული ქუჩებში მიმოაბნია. "ის ჩანთიდან ფულებს ყრიდა და ყვიროდა, შობას გილოცავთ“, - ყვება ერთ-ერთი თვითმხილველი.

გამვლელებმა ფული შეაგროვეს და ბანკში დააბრუნეს. თავად მოხუცი მამაკაცი კი, „სტარბაქსის“ ახლომდებარე შენობასთან მივიდა და პოლიციას ელოდებოდა.

პოლიციელების ცნობით, დამნაშავე 65 წლის მამაკაცი, დევიდ უეინ ოლივერია, რომელიც სამართალდამცველებს ყოველგვარი ძალისხმევის გარეშე დაემორჩილა.

დანაშაულის ჩადენის მოტივი უცნობია.

ამ ინციდენტს ადამიანები 1927 წლის 23 დეკემბერს ტეხასში მომხდარ შემთხვევას ადარებენ. მაშინ სანტა კლაუსის ფორმაში ჩაცმულმა მამაკაცმა ბანკიდან 12 ათასი დოლარი მოიპარა და პოლიციის გამოჩენამდე გამვლელებს ურიგებდა.