"მე ჩემი თავის იმედი მაქვს და საკუთარ თავს ვგულშემატკივრობ" - "საქართველოს ვარსკვლავის" 4 ფინალისტის პროგნოზები შოუს ფინალზე

"საქართველოს ვარსკვლავის" გრანდიოზულ ფინალამდე ზუსტად ერთი კვირა გვაშორებს. 31 დეკემბერს შოუს გამარჯვებული გამოვლინდება, რომელიც ავტომატურად მიიღებს საგზურს "ევროვიზიის" კონკურსზე.

როგორც ჟიურის წევრები და გულშემატკივრები აღნიშნავენ, წელს ძალიან ძლიერი მონაწილეები ჰყავს "საქართველოს ვარსკვლავს", რაც თითოეულმა არაერთხელ დაამტკიცა.

AMBEBI.GE ფინალამდე ესაუბრა შოუში დარჩენილ 4 კონკურსანტს. საინტერესოა, რას ფიქრობენ კონკურსზე, ერთმანეთზე და რა შანსები აქვთ ფინალში?

ბარბარა სამხარაძე:

- სიმართლე გითხარათ, არ გამკვირვებია, რომ ფინალში ვარ, ჩემი მაყურებლის იმედი სულ მქონდა და ადამიანების მხარდაჭერას ყველა ლაივზე ვგრძნობდი. ყოველ ჯერზე სულ პირველ სამეულში ვიყავი. მოკლედ, ძალიან გამიხარდა და ბედნიერი ვარ, ფინალში რომ ვიმღერებ. ყველა კონკურსანტი ღირსეულია და ასევე დგას სცენაზე.

ამ პროექტში ვაკეთებ ჩემი შესაძლებლობის მაქსიმუმს და ხალხს კიდევ ერთხელ დიდ მადლობას ვეუბნები.

ეს პროექტი ჩემთვის ახალი შესაძლებლობაა იმისთვის, რომ ხალხს გავაცნო, დავანახო, რომ სცენაზე დასადგომად არც ზომაა საჭირო და არც წონა, მთავარია თავი! ერთი გამოთქმაა - "სცენამ მას მერე დაკარგა ფასი, რაც იქ მახინჯებს აუკრძალეს დგომაო“ - ზუსტად ასეა. ადამიანები როდესაც გრძნობენ, რომ მათი ადგილი სცენაზეა, ადიან იქ. ყოველთვის მაყურებლის პოზიციიდან ვაფასებ ყველაფერს - ვისაც არც ჭკუა და უნარები არ აქვს, რომ სცენაზე იდგეს, არ უნდა იდგეს.

მარიამ გოგიბერიძე:

- ჩემთვის ეს პროექტი მხოლოდ ერთი რამ ვერ იქნება, რაღაცების ჯამია. პირველ რიგში, არის გზა წარმატებისკენ, მან შემძინა ადამიანები - ბევრი კარგი პიროვნება, ასევე - დიდი გამოცდილება.

- შესარჩევ ტურზე ოჯახის წევრებს გამოეპარე და მათგან ჩუმად მოხვედი პროექტში. რატომ? ახლა რას გეუბნებიან ისინი?

- მეუბნებიან, რომ ჩემი შესაძლებლობები მაქსიმალურად გამოვავლინო, თუმცა კრიტიკულებიც არიან და ყოველთვის ვცდილობ, მათ კრიტიკას მოვუსმინო. საბოლოოდ, ყოველთვის მართლები აღმოჩნდებიან ხოლმე. მათ რჩევებს სულ ვითვალისწინებ.

რაც შეეხება სახლიდან ჩემს ამ კონკურსზე გამოპარვას, არ ვიყავი დარწმუნებული, პროექტში, თუნდაც კასტინგზე მოსული, რას მივაღწევდი, ცოტა შეშინებულიც ვიყავი. ამიტომ, თუ ჟიურის მოვეწონებოდი, ოჯახის წევრებისთვის სიურპრიზის გაკეთებაც მინდოდა, მაგრამ რომ გამიმართლა, ეს საიდუმლო დიდხანს ვერ შევინახე და ვუთხარი, ყველა გავახარე.

თამარ კაკალაშვილი:

- ჩემთვის „საქართველოს ვარსკვლავი“ მეორე ოჯახივითაა. ამდენი ხანია აქ ვარ, ყოველ კვირა რეპეტიციებს გავდივართ, ძალიან მიყვარს ყოველი მონაწილე. აქ ყოფნა ჩემი პროფესიული, მუსიკალური განვითარებისთვისაც ერთ-ერთი მთავარი წყაროა.

- ნებისმიერ შემთხვევაში აქედან რას წაიღებ?

- დიდ გამოცდილებას, ბევრ კარგ მუსიკოს მეგობარს. ფინალში ვართ ოთხი კონკურსანტი - მე ჩემი თავის დიდი იმედი მაქვს და საკუთარ თავს ვგულშემატკივრობ, მჯერა თამარ კაკალაშვილის.

თორნიკე ყიფიანი:

- ამ სეზონზე ისე აღმოჩნდა, რომ ათეულშივე ყველა კარგი კონკურსანტი მოხვდა. ამიტომ დარწმუნებული ვარ, ძალიან მაგარი ფინალი იქნება!