რატომ დაგჭირდებათ 108 ცალი მანდარინი და ფორთოხალი ახალი წლის ღამეს - ფენ-შუის მიხედვით, წელს საახალწლო სუფრაზე საცივი და გოჭი არ უნდა იყოს

ტრადიციულად, მთელი სამყარო ახალი წლის შემოსვლას 31 დეკემბერს აღნიშნავს, თუმცა რეალურად, ვირთხის წელიწადი 4 თებერვალს დადგება.

საინტერესოა, რა უნდა გავითვალისწინოთ ახალი წლის ღამეს, რომ წარმატებული წელი დაგვიდგეს და რა უნდა გავაკეთოთ აუცილებლად - ამ საკითხებზე AMBEBI.GE-ს ფენ-შუის მასტერი თიკა ქოქაშვილი ესაუბრა:

- თიკა, რით უნდა გავუმასპინძლდეთ სტუმრებს ახალი წლის ღამეს?

- ძალიან კარგი იქნება, თუ ახალ წელს ოჯახთან ერთად შეხვდებით, რადგან ვირთხა მეოჯახე ცხოველია. წელს საახალწლო სუფრა გააწყვეთ მსუბუქი სალათებით, აუცილებლად უნდა იდოს მაგიდაზე ხილი, ყველი, სხვადასხვა სახეობის თხილეული, ტკბილეული... აკრძალვაა ძირითადად ცხიმიან საკვებზე.

ყველაზე მნიშვნელოვანია ლამაზად იყოს გაპრანჭული სუფრა, ბრჭყვიალებით და ბევრი ოქროსფერით. საერთოდ არ არის საჭირო, რომ წელს საცივი და გოჭი გქონდეთ სუფრაზე, რადგან როგორც ზევით მოგახსენეთ, ცხიმიანი საჭმელი სასურველი არ არის.

- რა რიტუალი უნდა შევასრულოთ ახალი წლის ღამეს, რომ მთელი წელი ბარაქიანი და საინტერესო გვქონდეს?

- ეს რიტუალი არის უძველესი და მისი გაკეთება შეგიძლიათ ახალი წლის დადგომამადე. აიღეთ 108 ცალი (ეს ფენ-შუის მიხედვით, ბარაქის ციფრია) ფორთოხალი და მანდარინი, რომლებსაც სახლის მთავარი შემოსასვლელიდან დააგორებთ ახალი წლის ღამეს ოთახებში ან თქვენ მეკვლეს სთხოვთ ამის გაკეთებას.

სამი დღე დატოვეთ ძირს დაგორებული ციტრუსი, შემდეგ გაფუჭებულები გადაყარეთ და რაც დაგრჩებათ მიირთვით, დაურიგეთ მეზობლებს ან უცხოებს ქუჩაში. დაზიანებულ ფორთოხლებზე ამბობენ, რომ ნეგატივს გაიტანენ ოჯახიდან.

- ნაძვის ხე რა ადგილას უნდა დავდგათ სახლში?

- დასავლეთით ან აღმოსავლეთით თუ დგამთ - ნაძვის ხის ფერს არ აქვს მნიშვნელობა, გამოიყენეთ თეთრი, ვერცხლისფერი, ოქროსფერი დეკორები, ასევე დაშვებულია განათება. ვერცხლისფერი და ოქროსფერი დეკორაციებით მორთეთ სამხრეთით მდგარი ნაძვის ხე, ოღონდ არ გამოიყენოთ განათება.

სამხრეთ-დასავლეთით დადგით თეთრი ან მწვანე ნაძვის ხე, განათების გარეშე, გამოიყენეთ თეთრი, ვერცხლისფერი ან ოქროსფერი. ჩრდილოეთ მხარეს განათებების გარეშე დადგით ნაძვის ხე მწვანე და ცისფერი დეკორაციებით.

ჩრდილო-აღმოსავლეთით ვერცხლისფერი ნაძვის ხე - მწვანე, თეთრი, ცისფერი დეკორაციებით. აქაც იკრძალება განათება და სანთლები. განათებები აკრძალულია სამხრეთით და ჩრდილოეთით, რომ არ გავააქტიუროთ უარყოფით ენერგიები.

- 4 თებერვლიდან, როდესაც ვირთხის წელი შემოვა, რა უნდა გავაკეთოთ აუცილებლად?

- ფენ-შუის სპეციალისტები აღმოსავლური რუკით ვხელმძღვანელობთ და 4 თებერვლიდან, როდესაც ყველა ენერგია გააქტიურდება, რეკომენდაციაა, რომ სტომატოლოგთან დაგეგმოთ ვიზიტი და გაიკეთოთ სიახლის ანალიზი, ეს იმიტომ რომ შემდეგ არ შეგექმნათ პრობლემები. წელს ზუსტად რომ სამედიცინო პრობლემები წამოიწევს წინ, განსაკუთრებით პირის ღრუსთან დაკავშირებული.

საერთოდ, ვირთხას აღიზიანებს ღალატი და სიძუნწე. წელს ყველა ფარული ურთიერთობა გამჟღავნდება, ძუნწ ადამაიანებს მაინც დაახარჯინებს ფულს, იმდენ პრობლემას გამოუჩენს. ძალიან კარგია თუ ახალ წლამდე ორი დღით ადრე მაინც სახლში გამოცვლით ნათურებს, ასევე გაწმენდთ ფანჯრებს, რადგან ამ გზით ენერგია შემოდის.

წელს სასურველია ბევრი ოქროსფერის გამოყენება - ახალი წლის ღამეს გაიკეთეთ ძვირფასი სამკაულები, სუფრა გააწყეთ ძვირფასი ჭურჭლით

საახალწლოდ აანთეთ 8 ოქროსფერი სანთელი, ასევე სასურველია წითელიც შეურიოთ. იმათ კი ვისაც ოქროსფერი არ გიყვართ, შეგიძლიათ თეთრითა და ვერცხლისფერით ჩაანაცვლოთ.

4 თებერვალს შემოდის ვირთხა და აუცილებლად აღნიშნეთ ეს დღეც, თხილით, სასუნავით, ტკბილეულით...

- სურვილების ასრულება თუ შეიძლება ჩავუთქვათ ახალი წლის ღამეს?

- ახალი წლის ღამეს, აიღეთ თეთრი თაბახის ფურცელი, წითელი ფერის ახალი კალამი. დაწერეთ სამი სურვილი, ასრულებული ფორმით, აწყმო დროში და დაუწერეთ თარიღები, როდის გინდათ რომ აგისრულდეთ. ქაღალდზე დადეთ შაქრის ნატეხი, პატარა პურის ნაჭერი, ვარდის ფურცლები და ფული, დაკეცეთ და ჩადეთ წითელ კონვერტში.

შვიდი ღამის განმავლობაში დაიდეთ ბალიშის ქვეშ, მერვე დღეს აიღეთ, დალუქეთ სანთლით და შეინახეთ ერთი წლის მანძილზე, სახლში ყველაზე მაღალ ადგილას. ეს რიტუალი ზუსტად იმ დროს გააკეთეთ, როდესაც სამყაროში ყველაზე დიდი ენერგიაა და ახალი დამდგარია ახალი წელი. ერთი წლის შემდეგ ჩამოიღეთ, გახსნით და ნახავთ, რა ასრულდა და რა - არა. შემდეგ დაწვით და ქარს გაატანეთ...