შსს ლავას ოღლიზე გავრცელებულ ინფორმაციას პასუხობს

ტელეკომპანია "რუსთავი2"-სა და ლავას ოღლის უფლებადამცველის მიერ გავრცელებული ინფორმაცია არის სიცრუე, სახელმწიფო ინტიტუტების დისკრედიტაცია და საზოგადოების შეცდომაში შეყვანის მიზანმიმართული მცდელობა, - აღნიშნული განცხადება შს სამინისტროში გამართულ სპეციალურ ბრიფინგზე შს სამინისტროს ცენტრალური კრიმინალური პოლიციის დეპარტამენტის დირექტირმა ვლადიმერ ბორცვაძემ გააკეთა.

ბორცვაძემ ხაზგასმით აღნიშნა, რომ თურქი სამართალდამცველების მიერ მოწოდებული ინფორმაციით, ლავას ოღლი, იგივე მინდია გორაძე თურქეთში საექსტრადიციო პატიმრობაში რჩება და ის მეზობელი ქვეყნის საპატიმროში იმყოფება.

“შინაგან საქმეთა სამინისტრომ მიმდინარე წლის 18 ივლისს აჭარაში “ქურდული სამყაროს“ წევრობის ბრალდებით 10 პირი დააკავა, “კანონიერ ქურდს” მინდია გორაძეს კი ბრალი დაუსწრებლად წარედგინა. შინაგან საქმეთა სამინისტროს ინიციატივით ლავას ოღლი ინტერპოლის წითელი ცირკულარით იძებნება. თურქმა სამართალდამცველებმა ლავას ოღლი მიმდინარე წლის ოქტომბერში, ტრაბზონში დააკავეს. მინდია ლავას ოღლი 2018 წლის 20 ივნისის ქუთაისის საქალაქო სასამართლოს განაჩენით ასევე ცნობილი იქნა დამნაშავედ საქართველოს სისხლის სამართლის კოდექსის 223-ე პრიმა მუხლის 2 ნაწილით, რაც გულისხმობს კანონიერ ქურდობას და მას დაუსწრებლად მიესაჯა თავისუფლების აღკვეთა 12 წლის ვადით“, - განაცხადა ვლადიმერ ბორცვაძემ.

მისივე თქმით, შინაგან საქმეთა სამინისტროს ერთ-ერთი მთავარი პრიორიტეტი ორგანიზებულ დანაშაულთან ბრძოლაა. “ქურდული სამყაროსა და მასთან დაკავშირებული კრიმინალური მენტალიტეტის აღმოფხვრის მიზნით, შინაგან საქმეთა სამინისტროს ინიციატივით სისხლის სამართლის კოდექსში განხორციელებული ცვლილებების საფუძველზე, „ქურდულ სამყაროსთან“ დაკავშირებული დანაშაულებრივი ქმედებების წრე გაფართოვდა. კერძოდ, მიმდინარე წლის აპრილის თვიდან, „კანონიერ ქურდობასა“ და „ქურდული სამყაროს წევრობასთან“ ერთად, სისხლის სამართლის წესით დასჯადი გახდა „ქურდულ შეკრებაში მონაწილეობა“, „ქურდული სამყაროს საქმიანობის მხარდაჭერა“ და „ქურდული სამყაროს წევრისთვის ან კანონიერი ქურდისთვის მიმართვა“, - აღნიშნა ვლადიმერ ბორცვაძემ.