მოძრაობა "სამეგრელო" გია ჯაჯანიძის გადაცემას ეხმაურება
მოძრაობა "სამეგრელო" ტელეკომპანია "იმედზე" გასულ გია ჯაჯანიძის საავტორო გადაცემა "სხვა რაკურსს" ეხმაურება, სადაც საუბარი 1991-92 წლებში განვითარებულ მოვლენებს, აფხაზეთის ომს, მხედრიონის ქმედებებს სამეგრელოში შეეხო. გადაცემის სტუმარი ამ პროცესების მონაწილე ადამიანები, მათ შორის ყოფილი "მხედრიონელი" დოდო გუგეშაშვილი იყო, რომელმაც მის მიმართ გამოთქმული ბრალდებები უარყო.
"გია ჯაჯანიძის საავტორო გადაცემაში თურმე შეკრებილან მავანნი და უმსჯელიათ 1991-92 წლების პუტჩზე და მისგან გამომდინარე მოვლენებზე! ამ საღამოს მომეცა შესაძლებლობა მენახა იმ გადაცემის ვიდეოჩანაწერი. ახლა რა მინდა განვაცხადო: მე, ზურაბ კვარაცხელია გახლავართ ის პიროვნება, რომელმაც, როგორც ეროვნული დაუმორჩილებლობის კომიტეტის წევრმა, თავის დროზე მოვაწერე ხელი იმ განკარგულებას, რომელზეც ამ ე.წ. თოქ-შოუში აპელირება გააკეთა სამხედრო-კრიმინალური გადატრიალების ერთ-ერთმა აქტიურმა მონაწილემ და სამეგრელოს მოსახლეობის ხოცვა-ჟლეტაში არცთუ უსაფუძლოდ ეჭვმიტანილმა დოდო გუგეშაშვილმა! სრული პასუხისმგებლობით ვაცხადებ: რა თქმა უნდა, "თეთრ მაგნოლიად" წოდებულმა კრიმინალმა ბანოვანმა განკარგულების ტექსტი კონტექსტიდან ამოგლეჯილად წარუდგინა საზოგადოებას! რა თქმა უნდა, ის განკარგულება სრულიად შეესაბამებოდა მოცემულ სიტუაციას და მიმაჩნია, რომ იყო აბსოლუტურად გამართლებული ყველა თვალსაზრისით! კატეგორიულად ვაცხადებ, რომ მაშინ მე ვიყავი ერთ-ერთი ინიციატორი იმ განგარგულებისა, რომელიც მივიღეთ ეროვნული დაუმორჩილებლობის კომიტეტმა და კანონიერი ხელისუფლების მომხრე შეიარაღებულმა ძალებმა ერთობლივად! ასე რომ, კატეგორიულად მიუღებელია ჩვენთვის საქართველოში მიმდინარე ტრაგიკულ პროცესებზე პასუხისმგებლობის აკიდება! საქართველოში მომხდარ პუტჩზე და მისგან გამომდინარე სავალალო შედეგებზე პასუხისმგებლობა მთლიანად ეკისრება ე.წ. დემოკრატიულ ოპოზიციას და მისგან სტიმულირებულ შეიარაღებულ ბანდიტურ ფორმირებებს, რომლის წევრიც ასპროცენტიანი ალბათობით გახლდათ ზემოთხსენებულ თოქ-შოუში მონაწილე აწ უკვე "ბანდერისტკა" ქალბატონიც!
თუ რა სავალალო შედეგები მოიტანა მამათელი "დიდი პოლიტიკოსის" სახელისუფლებო შეიარაღებული ბანდების თარეშმა სამეგრელოში და სრულიად საქართველოში - სრულიად აშკარაა და თუ ვინმეს ეჭვი ეპარება ამაში, მაშინ პირდაპირ ვეტყვი ამ კატეგორიის ადამიანებს, რომ კარგად გაახილონ თვალი და შეხედონ გავერანებულ ქვეყანას!
აშკარაა, რომ გარკვეული ძალები ცდილობენ გასული საუკუნის 90-იან წლებში მომხდარი გადატრიალების და სამეგრელოში ჩადენილი დანაშაულობების სამარცხვინო ლაქა მოწმინდონ პუტჩისტურ ელემენტებს! აშკარაა, რომ ამგვარი დამოკიდებულება არანაირად არ შეუწყობს ხელს ეროვნული სხეულის გამთლიანებას! აშკარაა, რომ ასეთი მიდგომით კიდევ უფრო მეტად ღრმავდება დაპირისპირება!
იმერეთის გუბერნატორის ხელფასი გაორმაგდა
ორი ობლისა და ორი ბებიას შემზარავი გასაჭირი გურიაში
