2023 წლის ასტროლოგიური პროგნოზი ქალი და მამაკაცი სასწორებისთვის

საინტერესო და დასამახსოვრებელი მოვლენებით, ნაცნობობით აღსავსე წელი გელოდებათ. ცვლილებები მოსალოდნელია სოციალურ, პირად და საზოგადო ცხოვრებაში. ამასთან, თავიდანვე უნდა გაგაფრთხილოთ, რომ იოლად არაფერი მოგვარება. ზოგიერთი ახალი ნაცნობი სასიკეთო გავლენას იქონიებს თქვენს კარიერაზე, წარმატებაზე. მაგრამ გაფრთხილდით, გარშემო უამრავი მანიპულატორი და აბიუზერია. გაუფრთხილდით მათ, ვისთანაც ახლა გაქვთ ურთიერთობა, ვისაც შეგიძლიათ ენდოთ, გულწრფელია. სასიყვარულო ურთიერთობაში უპირატესობა მიანიჭეთ მზრუნველობასა და სირბილეს. დაქორწინებულებმა იზრუნეთ, რომ კავშირი მეტად ჰარმონიული გახდეს. ჯანმრთელობის მხრივ გართულებები არ გელოდებათ, მაგრამ ვირუსებისა და გაცივებისგან დაზღვეული არავინაა. თუ დროულად დაიწყებთ მკურნალობას, გართულებებს აიცილებთ.

გირჩევთ, სანამ რამე გადაწყვეტილებას მიიღებთ, კარგად დაფიქრდით. ლოგიკაზე დაყრდნობით იმოქმედეთ. ეს პირად ცხოვრებასაც ეხება, სანამ ადამიანს კარგად არ გაიცნობთ, დაოჯახებაზე ნუ იფიქრებთ. ადამიანი თქვენი საიმედო საყრდენი უნდა იყოს. დაქორწინებულებს ოჯახში მატება გელოდებათ.

სტაბილურობას მიაღწევთ, თუ გეგმის მიხედვით იმოქმედებთ. იყავით მომართული სასურველის მისაღწევად. მოერიდეთ სიზარმაცისა და პასიურობის გამოვლენას. ნუ გგონიათ, რომ თქვენს გასაკეთებს და მოსაგვარებელს ვინმე სხვა გააკეთებს. მეტად გამოავლინეთ ინიციატივა.

რას გიმზადებთ იუპიტერი 2023 წელს

გამარჯვებისა და დიდი ბედნიერების პლანეტა იუპიტერი თქვენი პარტნიორობის სახლშია. რაც დადებითად იმოქმედებს თქვენს ურთიერთობაზე საქმიან და სასიყვარულო პარტნიორებთან. მოიმატებს თქვენი პოპულარობა, გამარჯვების მიღწევის შანსი. გახდებით მეტად თავდაჯერებული, მიზანსწრაფული. წარმატებით დაგვირგვინდება ახალი კლიენტებისა და პარტნიორების მოძიება. შეყვარებულები გააფორმებთ იღბლიან ქორწინებას. საქმიანი სასწორები გააფორმებთ სარფიან ხელშეკრულებებს, რაც გაგიუმჯობესებთ მატერიალურ მდგომარეობას. გაგიუმჯობესდებათ დამოკიდებულება კოლეგებთან, მეგობრებთან. პირად ცხოვრებაში პირველ ადგილზე გამოვა სულიერება და მზრუნველობა. მოგინდებათ პარტნიორთან ერთად ერთი საქმის კეთება. მარტოხელებს იღბალი საინტერესო ადამიანის გაცნობას გპირდებათ. ვის გვერდითაც თავს კომფორტულად და მშვიდად იგრძნობთ. მაგრამ ნუ გგონიათ, რომ ადამიანი თავისით მოგიკაკუნებთ კარზე, თავადაც უნდა გააქტიურდეთ, რომ გაეცნოთ საწინააღმდეგო სქესის ადამიანებს.

რას გიმზადებთ სატურნი 2023 წელს

აკრძალევის, შეზღუდვებისა და პასუხისმგებლობის პლანეტა სატურნი თქვენი ჯანმრთელობისა და ყოველდღიური ვალდებულებების სახლში მდებარეობს. მეტი პასუხისმგებლობა უნდა გამოავლინოთ ყოველდღიური საქმეების, საკუთარი ჯანმრთელობისადმი. მშვიდად შეხვდით ცვლილებებს. პატარა, მაგრამ ფუნდამენტური ნაბიჯებით უნდა იაროთ მიზნისკენ, ბედნიერი მომავლისკენ. იყავით მომართული კეთილდღეობასა და წარმატებაზე. ნუ გაგიკვირდებათ, თუ გამოგიჩნდებიან მოშურნეები. მაგრამ თქვენ მყარად უნდა იდგეთ, არ აჰყვეთ ქუჩის ძაღლების ყეფას და არც კი იფიქროთ მათთან პაექრობასაც კი. სახლშიც და სამსახურშიც მათ გვერდით უნდა იდგეთ, ვისაც თქვენი დახმარება სჭირდება. ნუ გაგიკვირდებათ, თუ ახლობლებს მოუნდებათ თქვენთვის გულის გადაშლა, დახმარებას გთხოვენ რთული საკითხების მოგვარებაში.

2023 წელს ჯანმრთელობაზე ზრუნვას ნუ დაივიწყებთ. ხშირად უნდა დაისვენოთ გამონახოთ დრო შვებულებისთვის. ეცადეთ, უქმეები მაინც გაატაროთ ქალაქგარეთ საყვარელი ადამიანის ან ოჯახის გვერდით. შეადგინეთ სამუშაო გრაფიკი, რათა უკეთ განკარგოთ დრო. თუ პირად რუკაში სატურნის ნეგატიური გავლენა გაქვთ, იმედგაცრუება გელოდებათ კარიერასა და პირად ცხოვრებაში. ნუ დახარჯავთ დროს არაფრისმომცემ საქმეებზე. დისციპლინა და სიბეჯითე წარმატების საწინდარია. წარმატება გელოდებათ სამედიცინო, საქველმოქმედო და ფსიქოლოგიის სფეროს წარმომადგენლებს.

2023 წლის სასიყვარულო პროგნოზი

თუ მარტოობა არ გაქვთ გადაწყვეტილი, უამრავი რომანტიკული ნაცნობობა გელოდებათ და უკვე გაზაფხულიდან, შინ ნუ ჩაიკეტებით. საინტერესო ადამიანებს გაიცნობთ, მაგრამ თავით ნუ გადაეშვებით გრძნობებში, სანამ კარგად არ გაიცნობთ ადამიანს. თუ უკვე გყავთ გულის სწორი გახადეთ თქვენი ცხოვრება მრავალფეროვანი და დასამახსოვრებელი. სასიყვარულო ნაცნობობით განსაკუთრებით მდიდარი პერიოდია ივლისიდან დეკემბრის ჩათვლით. იყავით მომართული, რომ პირადი ცხოვრება ლამაზ ზღაპრად აქციოთ, თუ არ მოინდომებთ, ვნების ალი ჩაცხრება. არსებული კავშირი რომ შეინარჩუნოთ, მეტად გამოავლინეთ მოთმინება; აკონტროლეთ ემოციებიც. თუ მოინდომებთ, დაქორწინებულების ცხოვრება იმაზე უკეთესი გახდება, ვიდრე თაფლობის თვეში გქონდათ. კარგი იქნება, თუ საყვარელ ადამიანთან ერთად ჩაერთვებით ბიზნესში, საქმიანობაში, სწავლაში, ერთად იმოგზაურებთ. აქვე გირჩევთ, რომ ნოემბრის ჩათვლით დაგეგმოთ მოგზაურობა და შვებულება. 2023 წელს მოერიდეთ დეპრესიულობას, მოწყენილობას. მაქსიმალურად გაიხალისეთ საკუთარი თავი.

2023 წლის ფინანსური პროგნოზი

მატერიალურ კეთილდღეობას საქმიანობაც მოგიტანთ და ახალი კლიენტებიც. საუკეთესო წელია კაპიტალდაბანდებისთვის, უძრავი ქონების შესაძენად, სამართლიანი ფინანსური მანიპულაციებისთვის. მოიმატებს თქვენი ავტორიტეტი, მოგემატებათ ხელფასი. თუმცა, თუ მხართეძოზე წამოწოლილი იქნებით, ფული ციდან თავისით არ ჩამოგეყრებათ. გააქტიურდით, რომ წელსაც კარგი ფინანსური შემოსავალი შეიქმნათ და მომავალი წლისთვისაც.

2023 წლის მკვეთრი ცვლილებები

მოულოდნელობების პლანეტა ურანი თქვენი კრიზისების სახლში სტუმრობს. გარდატეხის წელია. შეიძლება მკვეთრად ამაღლდეთ და ასევე მკვეთრად დაეცეთ. იყავით ფრთხილი და გააზრებული. აი, სწორედ ახლა უნდა გამოავლინთ თქვენი ნიშნისთვის დამახასიათებელი წონასწორობა და არ გადაიხაროთ რომელიმე მხარეს. იღბალი ხშირად და სხვადასხვა სიტუაციაში გამოგცდით. მოხდება ღირებულებების გადაფასება, ცვლილებები, ზოგჯერ სრულიად მოულოდნელი. მოგინდებათ ახლის (ეზოტერიკა, ფსიქოლოგია) შესწავლა, შეუცნობლის შეცნობა. ზოგიერთმა შეიძლება მიიღოთ სოლიდური მემკვიდრეობა.

2023 წელს სად იპოვით შთაგონებას

ნეპტუნის გავლენით მოიმატებს ინტუიციურობა, მოგინდებათ შემოქმედებითი ნიჭის გამოვლენა. გამონახავთ საქმეს (ხელსაქმესაც), რაც სიამოვნებას მოგანიჭებთ. უმეტესობა დაკავდებით ქველმოქმედებით. დაინტერესდებით მკურნალობის ხალხური მეთოდებით. მაქსიმალურად მოერიდეთ მათრობელა საშუალებების მიღებას, ნეგატიურად განწყობილ, მანიპუალატორ ადამიანებთან ურთიერთობას.

2023 წლის ჯანმრთელობა

ჯანმრთელობა შეუფასებელია, ეს მუდამ უნდა გახსოვდეთ. ჩაიტარეთ პროფილაქტიკური გამოკვლევა, მკურნალობის კურსი. უბრალო გაცივებაც კი არ გაატაროთ. გართულებამ შეიძლება სერიოზული უსიამოვნებები შეგიქმნათ. გადაღლილობა, აპათია და უძილობა შეიძლება სერიოზული დაავადების მიზეზი იყოს. საქმეების გამო საკუთარ ჯანმრთელობას ნუ უგულებელყოფთ. მოერიდეთ ალკოჰოლთან დამეგობრებას. აი, ვარჯიშს (ნებისმიერი ფორმით: აერობიკა, ფიქტნესი, იოგა) კი უნდა დაუმეგობრდეთ.