ამაღამ სავსემთვარეობა - რას უნდა ელოდნენ ზოდიაქოს ნიშნები და როგორია ასტროლოგების რეკომენდაციები

დღეს, 28 მარტს სავსემთვარეობაა სასწორის ზოდიაქოს მეცხრე გრადუსში. ყველა სავსემთვარეობას თავისი დანიშნულება აქვს და არც ეს იქნება გამონაკლისი. როგორც უკვე იცით, სავსემთვარეობა არის მზისა და მთვარის დაპირისპირება (მზე ახლა ვერძის ზოდიაქოში იმყოფება (19 აპრილამდე), მთვარე კი მის მოპირდაპირე - სასწორში), მაგრამ 28 მარტის მოვლენა იმითაა გამორჩეული, რომ მზის გარდა მთვარეს ვენერაც უპირისპირდება, რომელიც სასწორის მმართველად ითვლება და მისი მეორე მმართვალი - ქირონიც. ამასთანავე, ვენერა არის "დამწვარი" (ეს არის მოვლენა, როცა პლანეტა დგას მზესთან ძალიან ახლოს). რა შეიძლება მოგვიტანოს ამ მოვლენამ, ნუ იქნებით ეგოისტი და ფეხების ბაკუნით ნუ მოითხოვთ თქვენი მიზნის მიღწევას. იძულებით და ძალით კარგს ვერაფერს მიაღწევთ.

მზე ახლა არის ვერძში . ეს არის ლიდერის, აქტიურობის, ინიციატივის, მოქმედების, მიზანდასახულობის სიმბოლო. ეს სავსემთვარეობა მოგიწოდებთ, რომ გაითვალისწინოთ პარტნიორების ინტერესები, როგორც წესი, ვერძი არავის აზრს არ ითვალისწინებს და მხოლოდ თავის სასარგებლოდ მოქმედებს, ჯიუტად აწვება რქებით თავისას. ამასთანავე, სავსემთვარეობისა და სასწორის მმართველი პლანეტა ვენერა ვერძში იმყოფება. იქვეა ქირონიც. ეს უკანასკნელი გვაძლევს ოქროს გასაღებს, რათა ჰარმონიულად გამოვიდეთ ყველა ჩაკეტილი სიტუაციიდან. თავად სასწორი კი არის ურთიერთობის, პარტნიორობის, სამართლიანობის, სიყვარულისა და რომანტიკის, ქორწინების ნიშანი. მოერიდეთ დაპირისპირებას სასიყვარულო და საქმიან პარტნიორებთან, ეცადეთ, გააზრებულად, დაკვირვებულად იმოქმედოთ.

14 აპრილამდე ვენერა ვერძშია, აქ ის თავისთვის ცუდ პოზიციაში. თუმცა, განსაკუთრებით ვნებიანი, გამოწვევი, ინიციატივიანია. მას არ უჭირს პირველი ნაბიჯის გადადგმა ურთიერთობის დასაწყებად. ნუ გაგიკვირდებათ, თუ სავსემთვარეობის შემდეგ, დაახლოებით 6 აპრილამდე მეტ დროს დაუთმობთ პირადი ცხოვრების გაუმჯობესებას, იქნებით ინიციატორი ურთიერთობის დაწყების. ამასთან, ნუ დაგავიწყდებათ, ვენერას თვისებების - დიპლომატია, პარტნიორობა, ჰარმონია - გამოვლენაც.

ეს სავსემთვარეობა მოგვიწოდებს, გადავხედოთ ფინანსებსაც, რადგან ვენერა ფულსაც განაგებს. შეგიძლიათ შეიძინოთ ლამაზი, ფუფუნების ნივთები ან გააფორმოთ სარფიანი, ფინანსური ხელშეკრულებები. ზოგიერთმა შეიძლება მოიგოს სასამართლო პროცესი, დაამტკიცოს თავისი სიმართლე. ადამიანებში მოიმატებს ჰარმონიულობა, სილამაზის შეგრძნება. არსებულ პირად, ახალდაწყებულ სასიყვარულო ურთიერთობაში კი მოიმატებს ვნებიანობა, ცეცხლი. საქმიანი კავშირები კი გახდება დიპლომატიური.

ვენერა-ქირონის შეერთება - კონკიას კარიბჭე. ეს არის სამიდან ერთ-ერთი საბედისწერო მოვლენა (კიდევ უნდა დაემთხვეს ნეპტუნისა და იუპიტერის ასპექტი ქირონთან), რომელიც წელიწადში სამჯერ ხდება და ეხმარება ადამიანებს გაიუმჯობესონ პირადი ცხოვრება და რადგან ახლა ორივე - ვენერა და ქირონი - ვერძში არიან განლაგებულები, გამოიჩინეთ ინიციატივა, რომ გაიუმჯობესოთ პირადი ცხოვრება, არსებული კავშირი. ამასთან, სავსემთვარეობის დღეს პლანეტა სატურნი (სერიოზულობა და სიბრძნე) აქტიურობს და თუ მობილიზებულები იქნებით ხანგრძლივ ურთიერთობაზე, ერთგულებასა და სტაბილობაზე, განგება დაგაჯილდოებთ. ტყუილები, ილუზები და ჩახლართული სიტუაციები არც სიყვარულში და არც ფულში სიკეთეს არ მოგიტანთ.

თუ პირადი რუკა შედგენილი გაქვთ, შეხედეთ, ჰაერის სტიქიის ნიშნებში: სასწორის, მერწყულის ან ტყუპის ზოდიაქოში, აგრეთვე, კარდინალური ჯვრის ვერძის, კირჩხიბის და თხის რქის 6-9 გრადუსში ხომ არ გაქვთ პლანეტები ან მნიშვნელოვანი წერტილები. თუ კი, ეს სავსემთვარეობა განსაკუთრებით იმოქმედებს თქვენს პირად ურთიერთობებზე. ამიტომ, კიდევ ერთხელ გირჩევთ, იყავით ჰარმონიული, დიპლომატიური და მეტად გაითვალისწინეთ პარტნიორის სურვილები.

ბედნიერ სავსემთვარეობას გისურვებთ!