ვინ უნდა გაფრთხილდეს და ვის ელოდება ბედის საჩუქრები - ანუ 9-15 სექტემბრის პლანეტების ასპექტაცია

9 სექტემბერს მერკური გადავიდა ქალწულში - თავისი მმართველობის ნიშანში. მერკურის გავლენით ადამიანებში მოიმატებს რაციონალურობა, ანალიტიკური აზროვნება და გამოთვლები. ამ დროს ლოგიკის დახმარებით შეგიძლიათ მეტის მიღწევა.

12 სექტემბერს მარსისა და მერკურის პოზიტიური ასპექტი ხელს შეუწყობს დოკუმენტაციის სწრაფად მომზადებას; კომუნიკაცია და გადაადგილება გაადვილდება, მაგრამ მოერიდეთ კამათს, სისწრაფეს საჭესთან. მარსი უკვე კირჩხიბშია და სიფრთხილისკენ მიგვითითებს.

შუა კვირამდე (ზუსტი ასპექტი გველოდება 12 სექტემბერს) გველოდება მზე-სატურნი-იუპიტერის დაძაბული ასპექტი. ეს კონფიგურაცია, კონფლიქტურ სიტუაციებს მოგვიტანს. განსაკუთრებით იგრძნობენ ისინი, ვისაც ქალწულის, თევზების, ტყუპისა და მშვილდოსნის 15-20 გრადუსში გყავთ პირადი პლანეტები. გაფრთხილდით, შეიძლება იყოს პრობლემები დოკუმენტებთან ან ოფიციალურ ორგანოებთან, ვიზაზე განაცხადის დროს...

თუმცა, ამ კვირაში ვენერასა და იუპიტერის პოზიტიური ასპექტიც გველოდება. ზუსტი ასპექტი იქნება 15 სექტემბერს. ეს დღე (პლუს/მინუს 2-3 დღე) გვპირდება, რომ სასიამოვნო მოვლენები იქნება იმ ადამიანების ცხოვრებაში, ვისაც პირად რუკაში პლანეტები ან მნიშვნელოვანი წერტილები გყავთ ტყუპის, სასწორის, მერწყულის, ვერძის და ლომის 19-21 გრადუსებში. ეს პერიოდი ხელსაყრელია ძვირად ღირებული, ლამაზი ნივთების შესაძენად, დღესასწაულებისა და ქორწინებისთვის და ბიზნესის დასაწყებადაც. შეიძლება მიიღოთ ძვირად ღირებული საჩუქრები, რომანტიკული სიურპრიზები, ბედის საჩუქრები.