ტურბულენტური ოქტომბერი გველოდება, თვის მნიშვნელოვანი ასტროლოგიური მოვლენები
2024 წლის ოქტომბერი მდიდარი იქნება საინტერესო მოვლენებით, რადგან თვე მზის დაბნელებით დაიწყება, რომელიც 2 ოქტომბერს გველოდება სასწორის ზოდიაქოში. ეს მოვლენა მრავალი ადამიანის ყურადღებას მიიპყრობს და უეჭველად ახალ საინტერესო მოვლენებს გამოიწვევს. მოდი, შევხედოთ რა ხდება ცაზე და რა შედეგები შეიძლება მოგვიტანონ პლანეტების კონფიგურაციებმა.
თითქმის მთელი ოქტომბრის განმავლობაში, პლანეტა ურანი (მოულოდნელობა, რევოლუცია, ელექტრობა, ავიაცია) ავისმომასწავებელ ვარსკვლავ ალგოლთან შეერთებაში იქნება. ეს კავშირი მიუთითებს ნებისმიერი ტიპის ძალადობის, კატასტროფისა და სტიქიური უბედურების საფრთხეებზე. ამ გავლენის ყველაზე ინტენსიური პერიოდებია 11-დან 17 ოქტომბრამდე და 28 ოქტომბრიდან 2 ნოემბრის ჩათვლით.
მთელი ოქტომბრის განმავლობაში ტყუპში მყოფი იუპიტერი რეტროგრადული იქნება და საჭიროა გადავხედოთ ჩვენს საგანმანათლებლო მისწრაფებებს, უფრო ღრმად გავაანალიზოთ მიღებული ინფორმაცია. შესაფერისი დროა წარსულის გამოცდილების გასააზრებლად, შეცდომების გამოსასწორებლად. გადახედეთ ძველ კავშირებს. არ დაიწყოთ ახალი პროექტები. ფრთხილად განიხილეთ უცხოეთიდან მიღებული შემოთავაზებები.
თვის მთავარი მოვლენა, რა თქმა უნდა, მზის დაბნელებაა , რომელიც მოხდება 2024 წლის 2 ოქტომბერს, 22:49-ზე, სასწორის ზოდიაქოს 11 გრადუსზე. ამ დღეს მზე და მთვარე სასწორში არიან, მათ გვერდით კი - დაღმავალი კარმული კვანძი, შავი მთვარე (ლილიტი) და მერკურია. თვის პირველი ორი კვირა ძალიან საინტერესო იქნება. გირჩევთ, ურთიერთობაში გამოავლინოთ მეტი დიპლომატია, ჰარმონია გქონდეთ საკუთარ თავთან და გარშემო მყოფებთან. გამონახეთ დრო სილამაზის შესაქმნელად. ეწვიეთ კულტურულ ღონისძიებებს. იყავით რომანტიკული და მზად სასიყვარული სიურპრიზებისთვის.
2-9 ოქტომბრის პერიოდში, მარსი (ომისა და ენერგიის პლანეტა) აყალიბებს კონფლიქტურ ასპექტს მერკურისთან. სამხედრო საკითხებში რთული იქნება მოლაპარაკებები და შეთანხმება. პლანეტების ეს ასპექტები მიუთითებს კონფლიქტის ესკალაციაზე. თითოეული ჩვენგანიც ფრთხილად უნდა იყოს, ეს ასპექტი პიროვნულ დონეზეც, იშვიათად გადის კონფლიქტების, ჩხუბისა და დაპირისპირების გარეშე.
6-დან 10 ოქტომბრის ჩათვლით ხელსაყრელი პერიოდია ახალი ნაცნობებისთვის. შეიძლება ჩამოყალიბდეს ახალი სოციალური წრე. შესანიშნავი დროა ინტელექტუალური მუშაობისთვის, პრეზენტაციებისა და მოხსენებებისთვის. გლობალურ დონეზე შეიძლება გავიგოთ ახალი დადგენილებებისა და კანონების შექმნის შესახებ, რომლებიც შეიძლება დაკავშირებული იყოს განათლებასთან, მეცნიერებასა და სამართალთან, ასევე მოგზაურობასთან, ვაჭრობასა და მოზარდებთან. ეს ასევე შესანიშნავი დროა სიყვარულისა და ვნებისთვის. რომანტიკული ურთიერთობები შეიძლება უფრო ღრმა და ემოციური გახდეს.
13 ოქტომბრიდან მერკური (გონებისა და კომუნიკაციის პლანეტა) სასწორიდან გადავა მორიელში, სადაც 3 ნოემბრამდე დარჩება. ეს შეიძლება იყოს სტრესული პერიოდი პლუტონთან ასპექტის გამო. არაა გამორიცხული ცხელ გულზე თქვათ რაღაც, რამაც გამოიწვიოს ტრანსფორმაცია: მოვლენების, ადამიანური ფაქტორის. ყურადღებით იყავით საბუთების გაფორმებისას, ვაჭრობისას.
11-დან 15 ოქტომბრის ჩათვლით, შეიძლება მივიღოთ უამრავი ინფორმაცია. კონტაქტების სიმრავლემ და სხვა ადამიანების გავლენამ შეიძლება ჩვენზე ზეწოლა მოახდინოს. ასეთ მომენტებში მნიშვნელოვანია ინფორმაციის გაფილტვრა და მხოლოდ იმის არჩევა, რაც ნამდვილად საჭირო და სასარგებლოა. ასევე უნდა იყოთ შერჩევითი სხვა ადამიანებთან ურთიერთობისას.
12-დან 17 ოქტომბრის ჩათვლით, ვენერასა და ურანის დაძაბული ასპექტის გამო, მნიშვნელოვანია, არ მიიღოთ ნაჩქარევი გადაწყვეტილებები განსაკუთრებით პირად ცხოვრებასთან დაკავშირებით! არ შეიძინოთ ძვირად ღირებული ნივთები. დაუთმეთ დრო შემოქმედებას, ორიგინალურობა გამოავლინეთ ხელოვნებაში.
17 ოქტომბერს სავსემთვარეობა გველოდება ვერძის 25 გრადუსზე, 15:26-ზე. ამ დღეს მზე და მთვარე ერთმანეთის ოპოზიციურ ნიშნებშია: მზე - სასწორში, მთვარე - ვერძში. ვერძი განასახიერებს ინიციატივას, გამბედაობას და დამოუკიდებლობას. სავსემთვარეობის დღეებში (პლუს/მინუს 2-3 დღე) ვიგრძნობთ ენერგიის მოზღვავებას და რაღაც ახლის დაწყების სურვილს. თუ გაქვთ იდეები ან პროექტები, რომლებიც გადადებული გქონდათ, ახლა მათი განხორციელების დროა. თუმცა, უნდა გახსოვდეთ, რომ სავსემთვარეობამ ასევე შეიძლება გამოიწვიოს კონფლიქტი და დაძაბულობა, განსაკუთრებით თუ თქვენი სურვილები ეწინააღმდეგება სხვების მოთხოვნილებებს. აკონტროლეთ ემოციებიც და
ამავე დღეს, ვენერა გადადის მშვილდოსანში. ამ ნიშანში სიყვარულის, ფულის და სილამაზის პლანეტა არც ისე ძლიერია, მაგრამ აქტიურია, ვნებიანია და ძლიერი სურვილი აქვს ანებივრებდნენ. პირად ურთიერთობებში მოიმატებს ფლირტი, რომანტიკული თავგადასავლები. მოგინდებათ შემოქმედებითი იდეების განხორციელება, შოუების შექმნა (სახლშიც), ამ დროს განსაკუთრებით ეფექტური იქნება რეკლამა, პიარი.
23 ოქტომბერს, 02:15-ზე მზე ერთი თვით გადავა მორიელში. ამჯერად ეს გადასვლა დაემთხვა დაძაბულ ასპექტს მზის, პლუტონსა და მარსს შორის, გლობალურ დონეზე, ველოდებით, რომ მსოფლიო ლიდერების მიერ განხორციელებული იქნება რადიკალური ქმედებები სამხედრო დღის წესრიგთან დაკავშირებით, რთული პერიოდია 19-დან 25 ოქტომბრამდე. პიროვნულ დონეზე ეს ფსიქოლოგიურად რთული პერიოდია, როდესაც რთულ მოვლენებს შეუძლიათ ჩვენი ცნობიერების გარდაქმნა. ამ პერიოდის განმავლობაში, მნიშვნელოვანია, რომ არ ჩაეჭიდოთ წარსულს და მომავალს იმედის თვალით შეხედოთ.
თუმცა, 20 ოქტომბრიდან თვის ბოლომდე, იმოქმედებს მარსის ჰარმონიული ასპექტი ნეპტუნთან და ურანთან , რაც გვაძლევს იმის თქმის უფლებას, რომ იღბალი, კეთილდღეობა და სირთულეების გადალახვის ორიგინალური უნარი იმატებს ჩვენი რწმენის, სულიერებისა და ინოვაციური გადაწყვეტილებების საშუალებით. ეს ეხება როგორც მსოფლიო მოვლენებს, ასევე სიტუაციებს, რომლებსაც ყოველდღიურ ცხოვრებაში ვაწყდებით.
ბედნიერ და მშვიდ ოქტომბერს გისურვებთ!