საოჯახო საქმეების კალენდარი

20 აგვისტო, მთვარე სასწორშია - აქტიურია ჰაერის სტიქია. მოალამაზეთ თქვენი სახლი. ჩამოკიდეთ ლამაზი ნახატები, ინტერიერი მორთეთ დეკორით. ეცადეთ, ოჯახის წევრებს შორის ჰარმონიულმა ურთიერთობამ დაისადგუროს. შეგიძლიათ მცენარეების მოლამაზება, ყვავილების გადარგვა; კარგია მოსავლის აღება და პროდუქტებიც კარგად შეგენახებათ.

22 აგვისტო, მთვარე მორიელშია - აქტიურია წყლის სტიქია. ეცადეთ, ოთახები განათებული გქონდეთ. მოიცილეთ ყველა უსარგებლო, დაზიანებული ნივთი - შეაკეთეთ ან გადააგდეთ. არ მოჭრათ ხეები, არ შეიტანოთ სასუქი ნიადაგში. კარგი დღეა სამკურნალო მცენარეების მოსაკრებად და გასაშრობად. შეაგროვეთ მცენარეების თესლები. შეალამაზეთ გაზონი.

24 აგვისტო, მთვარე მშვილდოსანშია - აქტიურია ცეცხლის სტიქია. დაისახეთ კონკრეტული მიზნები და გააქტიურდით სასურველის მისაღწევად, დაწყებული საქმეების დასასრულებლად. საოჯახო საქმეების სიმრავლეს ნუ შეუშინდებით. დარგეთ ხეები და ბუჩქები, რომლებიც გინდათ, რომ სიმაღლეში გაიზარდონ. აგრეთვე ხვიარა მცენარეები.

26 აგვისტო, მთვარე თხის რქაშია - აქტიურია მიწის სტიქია. დღეს შეგიძლიათ დაგეგმოთ და განახორციელოთ კაპიტალური ან კოსმეტიკური რემონტი; ცვლილებები ბინაში. კარგ შედეგს მოგიტანთ აივნის, სხვენის დალაგება. გადაახარისხეთ ძველი ნივთები. დარგეთ ზამთრის ბოსტნეული, ბოლქვიანი მცენარეები. მოაცილეთ ბაღ-ბოსტანს მავნებლები, სარეველა ბალახი. ზამთრისთვის გამზადებული პროდუქტი კარგად შეგენახებათ.