როგორ ვაქციოთ მტრები მეგობრებად, რჩევები ზოდიაქოს ნიშნებთან დასამეგობრებლად
ალბათ ნებისმიერ ჩვენგანს შეხვედრია ცხოვრებაში ერთი ადამიანი მაინც, რომელთანაც ძალზე რთულია საერთო ენის გამონახვა. ზოგჯერ იგი ჩვენი მეზობელია, ზოგჯერ – თანამშრომელი, ზოგჯერ კი უფროსი. ჰოდა, გადავწყვიტეთ პატარა საიდუმლოებები გაგიმხილოთ, დღევანდელი მტერი ხვალინდელ მეგობრად როგორ გადააქციოთ.
ვერძთან სიჯიუტე მოთოკეთ. არასოდეს გაეჯიბროთ პროფესიონალურ მიღწევებში, თუკი რამის კეთება მასზე უკეთ გამოგდით, მოერიდეთ ამის საჯაროდ აფიშირებას. ჰკითხეთ რჩევა და ამ ჟესტით მოხიბლულს საკუთარი მოსაზრება და პრეტენზიაც დელიკატურად შეაპარეთ. თუკი ვერძს ჯიბრში არ ჩაუდგებით, იგი ყოველთვის გაითვალისწინებს თქვენს აზრს.
კუროსთან უყურადღებობას, უპასუხისმგებლობას და სიზარმაცეს ნუ მისცემთ ინტენსიურ ხასიათს. თუ ის თქვენი უფროსია, შესაძლოა, პირველივე ჯერზე არ მიგითითოთ ნაკლზე, მაგრამ ეს იმას როდი ნიშნავს რომ მან რამე ვერ შეამჩნია. იყავით მოწესრიგებული და საიმედო. ასე კურო საკუთარ მოკავშირედ ჩაგთვლით. ამასთან ერთად, თუკი ერთი ორჯერ გემრიელ სადილზეც მიიპატიჟებთ, ჩათვალეთ, რომ მისი გული მოგებული გაქვთ.
ტყუპთან მეტი გახსნილობა, კომუნიკაცია და ნაკლები პრეტენიზიულობა მოგეთხოვებათ. თუკი თქვენი ნაცნობი ტყუპი ნერვებზე მოქმედებს საკუთარი ცვალებადობითა და უპასუხისმგებლო საქციელით, მაქსიმალურად მოერიდეთ მასთან ერთად საერთო საქმის კეთებას. მაგრამ აგრძნობინეთ, რომ ინფორმაციის მოძიების კუთხით მასზე უკეთეს "რესერჩერს" ვერსად იპოვით. ტყუპი აფასებს ამგვარ ნდობას და ყოველთვის მოგამარაგებთ ცხელ-ცხელი ინფორმაციით.
კირჩხიბი ალბათ გულს გამუდმებული წუწუნითა და ოჯახის წევრებზე მრავალსაათიანი საუბრებით გიწყალებთ. მაგრამ საიმისოდ, რომ ამ ადამიანის მეგობრობა დაიმსახუროთ, სასურველია, პერიოდულად ყურადღებით მოუსმინოთ მის მონათხრობს და მხარიც აუბათ საკუთარი ოჯახის წევრების შესახებ მოყოლილი ისტორიებით. კირჩხიბი თავისნაირად ანუ შინაურად ჩაგთვლით და მასზე კარგი დასაყრდენი სამსახურში ან მეგობრობაში არავინ გეყოლებათ.
ლომი სხვების ნერვებზე მედიდურობითა და ტრაბახით მოქმედებს. მაგრამ თუკი თქვენ ამის გამო მასხრად აიგდებთ, შესაძლოა, სამუდამოდ გადაიმტეროთ. აღიარეთ მისი უპირატესობა, თუნდაც საერთოდ არ თვლიდეთ ასე. ხშირად შეუქეთ ლაპარაკის მანერა, ჩაცმულობის სტილი ან სუნამო, რომელსაც ხმარობს. იგი მალე ოთხ თათზე დამდგარ მოთვინიერებულ ფისუნიას დაემსგავსება თქვენ წინაშე მორიგი კომპლიმენტის მოლოდინში.
ქალწული გარშემო მყოფთა გაღიზიანებას ზედმეტი კრიტიკულობით, სიძუნწითა და პედანტიზმით იწვევს. ნუ აუშარდებით ამის გამო. თორემ გამორიცხული არაა მნიშვნელოვანი ოფიციალური დოკუმენტების გაფორმებისას აღმოჩნდეს, რომ დამღუპველი შეცდომები გაგეპარათ. ქალწულის სისუსტე თავის მოვლის, დიეტოლოგიისა და კვების საკითხებია. ხშირად გაუზიარეთ თქვენი მოსაზრებები ამ მხრივ და კომპეტენტური რჩევაც ჰკითხეთ. იგი ძალიან დააფასებს ამას.
სასწორი იშვიათად იწვევს ვინმეს გაღიზიანებას იმ უბრალო მიზეზის გამო, რომ ღიმილისა და დიპლომატიურობის განსახიერებაა. თუმცა ზოგჯერ სწორედ ამ "ქრონიკულად ტკბილი" იმიჯის გამოც შეიძლება გული მოგივიდეთ მასზე. არასოდეს ეუხეშოთ სასწორის. აჯობებს სახელოვნებო სფეროებზე, მოდასა და დიზაინზე ესაუბროთ. იგი გიჟდება ზემოთ ჩამოთვლილ თემებზე და სიამოვნებით გაატარებს თქვენთან ერთად რამდენიმე საათს ჭიქა ჩაის თანხლებით, სასიამოვნო საუბარში.
მორიელს საკმარისზე მეტი მიზეზი გააჩნია საიმისოდ, თუ რატომ შეიძლება გულზე არ ეხატებოდეს ვინმეს. თუმცა, ვერ ვიტყვით რომ თავად მას ეს ფაქტი დიდად ადარდებს. მტრების მიმართ გულგრილობა მორიელის საუკეთესო თვისებაა. საიმისოდ, რომ ეს ადამიანი თქვენს მოკავშირედ აქციოთ, ზედმეტი ფამილიარობა და გადამეტებული ენის მოჩლექით საუბარი არ დაიწყოთ მასთან. დაანახვეთ, რომ პატივს სცემთ, თუმცა მონურად არ ემორჩილებით. მორიელს საკუთარი თავის რწმენის მქონე და სამართლიანი ხალხი იზიდავს. თუ მან დაინახა, რომ მის ტერიტორიას დაუკითხავად არ კვეთთ, შესაძლოა დადებითად განიმსჭვალოს თქვენს მიმართ.
მშვილდოსანი გარშემო მყოფთა გაღიზიანებას გაუთავებელი ლაქლაქისა და ბაქიაობის სიყვარულით, ცვალებადი ხასიათითა და მოუხეშაობით იწვევს. იმ შემთხვევაშიც კი თუ მან უკვე მეხუთედ გადაასხა თქვენს მნიშვნელოვან საბუთებს ცხელი ყავა, ნუ გაუბრაზდებით. იმიტომ რომ მასთან შესანიშნავად შეგიძლიათ ისაუბროთ ისეთ თემებზე როგორიცაა: სპორტი, ლაშქრობა და მოგზაურობა. მას შემდეგ, რაც თავს თქვენ მეგობრად ჩათვლის, ყავის ჭიქა უბრალოდ ააცალეთ ხოლმე მაგიდასთან მოახლოებისას.
თხის რქა სნობიზმით, გადამეტებული სიმკაცრითა და ვორკოჰოლიკობით აღიზიანებს ბევრს. ამ ადამიანებს ძალზე მყარი შეხედულებები გააჩნიათ ყველაფერზე და იშვიათად იცვლიან აზრს. საიმისოდ რომ თხის რქა თქვენს მოკავშირედ აქციოთ, ხშირად ისაუბრეთ პროფესიულ მიღწევებზე და სამომავლო გეგმებზე. სთხოვეთ კომპეტენტური რჩევა ან რეკომენდაცია. იგი აუცილებლად დააფასებს თქვენს საქციელს და ნელ-ნელა ნაკლებად ოფიციალური გახდება ურთიერთობაში.
მერწყული ექსცენტრიკულობით, თვითნებურად მოქცევის სიყვარულითა და არაპროგნოზირებადობით ხდება გამაღიზიანებელი სხვისთვის. თუმცა თუ მის მიმართ მეგობრულად განეწყობით, იგი აუცილებლად გადმოდგამს საპასუხო ნაბიჯს. საუკეთესო თემა მასთან დასაახლოებლად არის მფრინავი თეფშები, მისტიკა, ფენ შუი მეცნიერული და კომპიუტერული მიღწევები და ასტროლოგია.
თევზები ზედმეტად გულჩვილი, ბუტია და წყენია ინდივიდები არიან. ამასთან ერთად, ხშირად სიტყვაძუნწები და ასოციალურები. მათთან კონტაქტში შესვლას დრო და მოთმინება სჭირდება. თუ გსურთ თევზები თქვენი პიროვნებით მოიხიბლონ, ხშირად დაპატიჟეთ ჭიქა ჩაიზე რომანტიკულ გარემოში. ასე იგი სასაუბროდ განეწყობა და შეეცდება გაიხსნას თქვენთან.