რას მოგვიტანს სელენას გადასვლა კუროში

სელენა (თეთრი მთვარე) 13 ნოემბერს კუროში გადავა, სადაც დარჩება 2024 წლის 13 ივნისამდე. სელენა თითოეულ ნიშანში 7 თვის განმავლობაში რჩება; პირად ასტროლოგიურ რუკაში კი 7 წელიწადში ერთხელ გიბრუნდებათ იმ ნიშანში, რომელშიც დაბადების მომანეტში გყავთ.

სელენას ასტროლოგიაში მფარველ ანგელოზს, დამცველს, კეთილ საქმეს, სათნოებას ეძახიან. სელენა არაა პლანეტა, ესაა ფიქტიური წერტილი მთვარის ორბიტაზე, მაგრამ მას საკმაო გავლენა აქვს ჩვენზე. ისევე როგორც ლილიტს (შავი მთვარე). სელენა მთვარის ახლომდებარე წერტილია, ლილიტი - შორეული. სელენას გადასვლა ერთი ნიშნიდან მეორეში მიუთითებს, რომ ახლა ისეთი თვისებები უნდა გამოვავლინოთ, რომელსაც სტუმრობს.

კურო მიწის სტიქიის ნიშანია. ჩვენი რესურსები, კომფორტი, უძრავი ქონება, მასაჟი. უყვარს ტკბობა ლამაზი ნივთებით, ქმნის კიდეც ასეთებს; უყვარს გემრიელი ჭამა, ტკბილეული. მომართულია ფულის გამომუშავებაზე, მისი აშენებული სახლი საუკუნეს გაუძლებს. კუროს მმართველია ვენერა, სილამაზის, სიყვარულისა და ფულის პლანეტა.

სელენა კუროში ყოფნისას გაააქტიურებს იმ თვისებებს, როგორიცაა მოთმინების უნარი, მიზანდასახულობა, სიჯიუტე; საკუთარი მიზნისთვის მოგვიწევს ნელა, დინჯად, მაგრამ დაკვირვებულად სვლა. უნდა ვიყოთ მომართული მშენებლობაზე და არა დანგრევაზე. რაღაც უნდა შევქმნათ ამ მატერიალურ სამყაროში. მოხდება ღირებულებების გადაფასება. მიხვდებით, რისთვის და რა მიმართულებით უნდა განვითარდეთ, სად უნდა დააბანდოთ ფული. გაუმართლებს მას, ვინც შრომობს და აფასებს როგორც საკუთარ, ისე სხვისი შრომის ნაყოფს. საუკეთესო პერიოდია სამიწათმოქმედო სექტორის განვითარებისთვის. პატარა მიწის ნაკვეთის დამუშავებაც კი მოხდება. განვითარდება კვების მრეწველობაც. მოგინდებათ გემრიელი კერძების მომზადება. შეიძლება მომრავლდეს კვების ობიექტები ან თავად გადაწყვიტოთ ტრადიციული სამზარეულოს გახსნა. ზოგადად, სარესტორნო ბიზნესი განვითარება და წარმატება ელის. ადამიანებს მეტად მოუნდებათ ბუნების დაცვა. მზის, წყლისა და ქარის ენერგიების გამოყენება უფრო აქტუალური გახდება. უფრო მომრავლდება დენზე მომუშავე მანქანების რაოდენობა, რათა ეკოლოგია გაუმჯობესდეს.

თუ კუროს ძლიერი გავლენა გაქვთ (მზით ან ასცენდენტით ხართ კურო, ან სტელიუმი გყავთ ამ ნიშანში), შეიძლება გამოჯანმრთელდეთ, თუ რამე გაწუხებდათ ან გამოგიჩნდებათ ექიმი, მფრაველი ანგელოზივით, რომელიც მოგარჩენთ. საუკეთესო პერიოდია უძრავი ქონების ყიდვა-გაყიდვისთვის. მაგრამ უფრო შეძენისთვის, ფულის სარფიანად დაბანდებისთვის. ფული შეიძლება გამოიმუშაოთ მიწაზე რამის მოყვანით, თუნდაც ქოთნის ყვავილების გამრავლებით.

სელენას კუროში ყოფნის დროს შეიძლება გაიცნოთ ადამიანი, რომელიც თქვენი საიმედო პარტნიორი იქნება როგორც ბიზნესში, ასევე თანაცხოვრებაში. გამორიცხული არაა, მოგიწიოთ ახალ მიწაზე დამკვიდრებამ, ახალ კომფორტთან შეგუებამ. შეიძლება უცხო მიწაზე გაიდგათ ფესვები.

კარგი პერიოდი გელოდებათ, თუ თქვენი საქმიანობა დაკავშირებულია ინტერიერის, ლანდშაფტის დიზაინთან, ფლორისტიკასთან, სილამაზის შექმნასთან, პერმანენტულ მაკიაჟთან, სამზარეულოსთან, მასაჟთან, ფინანსების მართვასთან.

ამასთან, სელენას ყოფნის დროს კუროში არ უნდა ვიყოთ მფლანგველები: არ დახარჯოთ ფული და ენერგია არაფრისმომცემ საქმეზე, ურთიერთობაზე. სასურველია, თითოეული თეთრი და წუთი გათვლილი და კეთილი საქმის შესრულებაზე გქონდეთ მომართული. ფული და რესურსები დააბანდეთ თქვენს განვითარებაში, უძრავი ქონების შეძენასა და არებულის გაუმჯობესებაში, რომ მერე აქედანაც მიიღოთ სარგებელი, ბიზნესში. საინტერესო ისაა, რომ კურო ფინანსურ სფეროსაც განაგებს და გამორიცხული არაა, ახალი ვალუტა გამოჩნდეს, არა ბიტკოინი2, არამედ განსხვავებული, რითაც ადამიანებში ერთმანეთში შეძლებენ ვაჭრობას.

მეტი დრო დაუთმეთ ჯანმრთელობის გაუმჯობესებას. იკვებეთ ჯანსაღად, კარგი იქნება ზომიერების დაცვა ჭამაში; უარი თქვით მავნე ჩვევებზე, ტახტზე კოტრიალი სიკეთეს არ მოგიტანთ. მიირთვით ახალმომზადებული კერძი, რომელსაც კარგ განწყობაზე მყოფი მოამზადებთ. გაიმდიდრეთ რაციონი თხილით, მწვანილეულით, ხილითა და ბოსტნეულით. იზრუნეთ საკუთარი თავის განებივრებაზე მასაჟითა და სპა-პროცედურებით; ივარჯიშეთ ზომიერად. თუ საშუალება გაქვთ, შეიძინეთ კეთილშობილი მეტალის სამკაულები.

სელენას კუროში ყოფნის დროს ჰაერის სტიქიის წარმომადგენლებმა (ტყუპი, სასწორი და მერწყული) მეტი სერიოზულობა უნდა გამოავლინოთ. ფესვები უნდა გაიდგათ საქმიანობაშიც და ურთიერთობაშიც. ღრუბლებში ფრენას და კოშკების აშენებაზე ოცნებას უნდა შეეშვათ და ფიზიკურად ჩაერთოთ საქმიანობაში. გაიუმჯობესეთ საცხოვრებელი პირობები. პატივი ეცით ღირებულებებს. ერთი სიტყვით, თქვენი კუთვნილი ადგილი უნდა დაიმკვიდროთ მზის ქვეშ.