ნოემბრის მნიშვნელოვანი მოვლენები: ვისზე იმოქმედებს მთვარის სრული დაბნელება და სასიკეთო დღეები საყიდლებისა და სურვილების ჩასაფიქრებლად
შემოდგომის ბოლო თვე საინტერესო ასტრომოვლენებითაა დატვირთული. ყველაზე გამორჩეული, რა თქმა უნდა, მთვარის დაბნელებაა, რომელიც 8-ში, კუროს ზოდიაქოში, სავსემთვარეობაზე გველოდება. მზე ახლა მორიელის ნიშანშია, სადაც დარჩება 22 ნოემბრამდე. მორიელებო გილოცავთ, თქვენი გააქტიურების დრო დადგა. 22 ნოემბერს კი მზე ესტუმრება მშვილდოსნის ზოდიაქოს. მორიელი არის ტრანსფორმაციის, ევოლუციის ძალოვანი სისტემის ნიშანი. ის მზადაა გარდასახვისთვის, კრიზისების დასაძლევად. მართავს პარტნიორის ფინანსებს, კრედიტებს, საბანკო საქმიანობას. მორიელში მყოფი მზე მოგვიწოდებს, გარდავისახოთ, დავძლიოთ შიშები, სირთულეები, მეტი დრო და ყურადღება დავუთმოთ ფინანსური საკითხების მოგვარებას. მორიელის ზოდიაქოს მართველობის დროს ადამიანს თითქოს რაღაც განსაცდელი, სირთულე ეძლევა, მან უნდა მოიცილოს ყველაფერი დრომოჭმული, უსარგებლო, რათა გადაინაცვლოს ახალ, მეტად განვითარებულ საფეხურზე. სანამ მზე მორიელში იქნება, კარგია კრედიტების, ვალების გადახდა. აი, ახლებს კი ნუ აიღებთ.
ახლა კი მივყვეთ ნოემბრის მნიშვნელოვანი მოვლენების თანამიმდევრულ განხილვას:
6 ნოემბერს მორიელში მყოფ ვენერას, დაუპირისპირდება კუროში მყოფი ურანი, ხოლო 9-ში მერკურის და მზის შეერთება გველოდება, რომლებსაც ასევე ურანი დაუპირისპირდება. ვენერა მართავს პირად ურთიერთობებს და ფულს, როცა გადარეული, მოულოდნელობებით აღსავსე ურანი დაუპირისპირდება, უნდა გავუფრთხილდეთ ფულს, არ გირჩევთ ძვირად ღირებული ნივთების შეძენას. აგრეთვე, თავშეკავება გმართებთ სასიყვარულო პარტნიორთან, მოულოდნელად რომ არ დაანგრიოთ კავშირი. აქვე ისიც უნდა გითხრათ, რომ ორ დღეში, 8 ნოემბერს მთვარის დაბნელება გველოდება და მაქსიმალურად ფრთხილად იყავით სასიყვარულო თემაშიც და ფულთან მიმართებაშიც. ნუ გაგიკვირდებათ, თუ ურთიერთობაში მოიმატებს ისტერიკულობა. რადგან სავსემთვარეობა და მთვარის დაბნელება გამოავლენს ყველა იმ შინაგან ემოციას, რასაც აქამდე მალავდით. ხოლო რაც შეეხება 9-ში მერკურის და მზის შეერთებას, რომელსაც ურანი უპირისპირდება, 5-13 ნოემბრის შუალედში არ გირჩევთ კომპიუტერული, საყოფაცხოვრებო ტექნიკის ელექტრო და ძვირად ღირებული ნივთების შეძენას. ყველაზე კარგი დღე ასეთების შესაძენად არის 16 ნოემბერი.
8 ნოემბერს, 14:59-ზე, კუროს მე-17 გრადუსში გველოდება მთვარის სრული დაბნელება. ეს ძლიერი დღეა, რადგან მთვარე კუროს ნიშანში ეგზალტირებულია. ემოციები მომატებულია და ფრთხილად იყავით. ჯობია, იყოთ გააზრებული, დაკვირვებული. ნუ ენდობთ გადაუმოწმებელ ინფორმაციას, ნუ ეცდებით საქმიანი და სასიყვარული კავშირების გაწყვეტას. ამავე დღეს გველოდება სავსემთვარეობაც - მთვარე კუროშია, მზე - მორიელში. და ამ დღეს დაიხურება დაბნელებების დერეფანი, რომელიც გაიხსნა 25 ოქტომბერს მზის დაბნელებით, მაგრამ 14 ნოემბრამდე მაინც გმართებთ სიფრთხილე. ამ მოვლენის შესახებ უახლოეს დღეებში შემოგთავაზებთ ვრცელ სტატიას. უბრალოდ, მინდა შეგახსენოთ, რომ მთვარის დაბნელების დღეებში, პლუს-მინუს 2 დღე, არაფერი მნიშვნელოვანი არ დაგეგმოთ, შეამცირეთ კონტაქტები. მოუფრთხილდით ურთიერთობებს, ამ დღეებში გაწყვეტილი კავშირების აღდგენა მომავალში ძალიან გაგიჭირდებათ, თითქმის შეუძლებელია. მთვარის დაბნელება ყველა ადამიანზე იქონიებს გავლენას, მაგრამ განსაკუთრებით მათზე, ვისაც მზე გყავთ კუროს, ლომის, მორიელისა და მერწყულის მეორე დეკადაში.
15 ნოემბერს ველოდებით იუპიტერი ვენერას სასიამოვნო ასპექტს. იუპიტერი არის დიდი ბედნიერების, ხოლო ვენერა მცირე ბედნიერების პლანეტა. ეს არის წლის ერთ-ერთი ჰარმონიული დღე და ამ დღეს კარგი იქნება სურვილების დაწერა ან ჩაფიქრება. ჩამოყალიბდით რა გსურთ, რა მიმართულებით უნდა განვითარდეთ და დაისახეთ კონკრეტული სამოქმედო მიზანი. მიიღებთ საჩუქრებს ადამიანებისგან, სამყაროსგან. გარემოც დამშვიდდება და ამოვისუნთქავთ.
16-ში მზე დაიწყებს "ვია კომბუსტას" გზის გავლას 22 ნოემბრამდე. მას "დამწვარ გზასაც" უწოდებენ. ეს განსაკუთრებული მოვლენა არაა, ამ გზას - მორიელის ბოლო დეკადა - მზე ყოველწლიურად გადის. ამ პერიოდს გველმჭერის პერიოდსაც უწოდებენ და ამ პერიოდში დაბადებულ ადამიანებს განსაკუთრებული მისია აქვთ. ისინი არიან მკურნალები, ეხმარებიან ადამიანებს სულიერ განვითარებაში, ცხოვრებისეული გზის სწორად გავლაში. ამ პერიოდში გათავისუფლდით ყველაფერი უსარგებლოსგან, დრომოჭმულისგან, რაც სიამოვნებას აღარ განიჭებთ და განვითარებაში გიშლით ხელს.
16 ნოემბერს ვენერა გადავა მშვილდოსნის ზოდიაქოში 10 დეკემბრამდე. მანამდე იქნება მორიელში. სადაც ავლენს თავის უარყოფით თვისებებს, არის საბედისწერო, მაგიური, შურისმაძიებელი, ეჭვიანი და ხშირად ცოდვიანიც. პირად ურთიერთობაში ვნებიანობა განსაკუთრებითაა მომატებული. 16-დან ვენერა მეტად იქნება ორიენტირებული მაღალი სტატუსის მიღებაზე, ელიტურობაზე. გამოავლენს დახვეწილ მანერებს. მოუნდება საკუთარი ღირსებების დემონსტრირება. ადამიანებს გაუჩნდებათ მოგზაურობის ინტერესი, ახალი ქვეყნების აღმოჩენის, შეიძლება ისწავლოთ ახალი უცხო ენა, დაიწყოთ ლიტერატური საქმიანობა. ამავე პერიოდში იმატებს ინტერესი ეგზოტიკური კერძებისადმი და გაფრთხილდით, რომ არ გასუქდეთ. ურთიერთობებში დათბება. ადამიანებს მოუნდებათ სასიყვარულო თავგადასავლები. შეყვარებულებს - მოგზაურობა, ლამაზი ნივთების შეძენა, კულტურულ ღონისძიებებზე დასწრება.
17 ნოემბერს მერკურიც გადავა მშვილდოსანში 7 დეკემბრამდე. მანამდე იქნება მორიელში, რომელსაც 29 ოქტომბერს ესტუმრა. მორიელისეული მერკური არის სარკასტული, ახასიათებს შხამიანი გამონათქვამები, საქმეებში ძირისძირობამდე ჩაწვდომა, ყველაფრის გამოძიება, მაგრამ საკუთარ საიდუმლოს არ გასცემს. უფრო მეტიც მის გარშემო ყველაფერი გასაიდუმლოებულია. ახასიათებს საუბრის მაგიური მანერა, შეიძლება ჰიპნოზიორივით ზემოქმედებდეს თქვენზე. 17-დან მოგინდებათ ახალის, უცხო ენების შესწავლა. იურიდიური საკითხების მოგვარება. გახშირდება ფილოსოფიური საუბრები, რელიგიური თემების განხილვა. მოგინდებათ მოგზაურობა საზღვარგარეთ ან უცხოელებთან კომუნიკაცია.
19 ნოემბერს გველოდება მარსი ნეპტუნის დაძაბულობა. ახლა მარსი არის ტყუპის ზოდიაქოში და თუ მოინდომებს, საჭირო ინფორმაციისა და ადამიანების მოძიება არ გაუჭირდება. ამიტომ, გააქტურდით, მაგრამ ნუ დაგვავიწყდება, რომ ახლა ის უკანმავალია, განსაკუთრებით საფრთხილოა, რადგან მეტად გაბოროტებულია. საკუთარი მიზნის მისაღწევად უკან არაფერზე დაიხევს. ფრთხილად აალებად ბასრ და ცეცხლსასროლ იარაღებთან. აგრეთვე, მათრობელა საშუალებებთან. 19-ში, პლუს-მინუს 2 დღე გაფრთხილდით, რომ არ გახდეთ აფერისტების მსხვერპლი, ეს ეხება სასიყვარულო თემასაც და ფინანსურსაც. არც მოატყუოთ და არც თავად მოტყუვდეთ. ისწავლეთ არას თქმა და ნუ გააკეთებთ ან იყიდით ისეთ რამეს, რაც არ გჭირდებათ.
22 ნოემბერს მზე ესტუმრება მშვილდოსნის ზოდიაქოს. ადამიანებში მოიმატებს ოპტიმისტური განწყობა. მოგინდებათ ახალი პროექტების დაწყება, საინტერესო საქმეებში ჩართვა. თანაც, ამ დროისთვის მერკურიც და ვენერაც უკვე მშვილდოსანში იქნებიან, რაზეც ზემოთ უკვე ვისაუბრე. მაგრამ გირჩევთ, მოიცადეთ 2 დღე და მშვილდოსანში ახალმთვარეობის შემდეგ გააქტიურდით.
24 ნოემბრიდან იუპიტერი დირექტულ სვლაში გადავა, თევზების ზოდიაქოში და წლის ბოლოსკენ გააგრძელებს სვლას ვერძში. ასე, რომ თევზები და ვერძი უნდა გააქტიურდეთ, რომ სასარგებლოდ წარმართოთ თქვენი ცხოვრება.
და თვის მნიშვნელოვან მოვლენებს დაასრულებს 24 ნოემბერს ახალმთვარეობა მშვილდოსნის მეორე გრადუსში 2:57-ზე. კარგი დღეა, თანაც ამ დროისთვის მშვილდონის მმართველი იუპიტერი სწორ სვლაში იქნება და შეგიძლიათ ჩამოწეროთ სამომავლო მიზნები, სურვილები. ადამიანებს მეტად მოუნდებათ გრძნობების გამოხატვა. ახალმთვარეობის პროგნოზზე სტატიას მოგვიანებით შემოგთავაზებთ.
ბედნიერ ნოემბერს გისურვებთ!