მზე თხის რქაში გადადის, ახლოს გავიცნოთ ზოდიაქოს ეს ჯიუტი ნიშანი
21 დეკემბერს 13:21-ზე მზე მშვილდოსნის ზოდიაქოდან ერთი თვით თხის რქის ნიშანში გადავა. გილოცავთ, თხის რქებო, გააქტიურდით სასურველის მისაღწევად, მწვერვალების დაპყრობა ხომ თქვენი მთავარი მიზანია. ჩვენ კი ვნახოთ როგორები არიან ზოდიაქოს ეს ნიშნები.
თხის რქის ზოდიაქოს ნიშნით, როგორც წესი, ყველაზე პრინციპული, გასაოცარი ამტანობით გამორჩეული და უზომოდ შრომისმოყვარე ადამიანები იბადებიან.
პლანეტა სატურნი, რომელიც ზოდიაქოს ამ ნიშნის მფარველად ითვლება, თავის შვილებს დისციპლინას, მოვალეობის გამძაფრებულ შეგრძნებას და წესრიგის სიყვარულს ანიჭებს. ორივე სქესის თხის რქები, განსაკუთრებული მოთმინების უნარითა და კარიერისტობით გამოირჩევიან. მათი უმრავლესობა, ჯერ კიდევ ღრმა ბავშვობიდან ისახავს მიზანს და როგორც კლდის მწვერვალისკენ მიმავალი ვაცი, ისეთივე მიზანსწრაფულობით მიიწევს წინ, ამ მიზნის ასახდენად.
ორივე სქესის თხის რქები, ნებისმიერი საქმის კეთებისას, სიფრთხილითა და დაკვირვებულობით ირჩევენ სამოქმედო გზას და საშუალებას. ამასთან ერთად, შესაშური შრომისუნარიანობა, რომელიც ზოდიაქოს ამ ნიშნის მთავარი მახასიათებელი თვისებაა, თხის რქას ნებისმიერი სახის საქმიანობაში უქადის წარმატებას. დაბრკოლებები კი, რომელიც მათ მიზნისკენ მიმავალ გზაზე ხვდებათ, მხოლოდ აძლიერებს ამ ადამიანების სიჯიუტეს და პრინციპულ ჩანაფიქრს იაროს წინ, მხოლოდ წინ და არც ერთი ნაბიჯით არ დაიხიოს უკან.
თხის რქების უმრავლესობა სერიოზული, სიტყვაძუნწი და მეთოდური ადამიანია. თუკი თქვენ სადმე ლაქლაქა, მოუწესრიგებელი და არაპროგნოზირებადი თხის რქა შეგხვედრიათ, კარგად გადახედეთ მის პირად რუკას, რადგან იქ აუცილებლად აღმოაჩენთ ტყუპის ან მერწყულის დიდ გავლენას. სხვა შემთხვევაში კი ზოდიაქოს ამ ნიშნის ტიპურ წარმომადგენელს, სხვებისგან თავდაჭერილობით, მოწესრიგებულობითა და სიდინჯით გამოარჩევთ.
ორივე სქესის თხის რქა, ძალზე თავშეკავებულად გამოხატავს საკუთარ ემოციებს, მით უმეტეს სახალხოდ. პლანეტა სატურნი, რომელიც ერთ-ერთი ყველაზე ძლიერი დამსჯელი პლანეტაა, თავის მფარველობაში მყოფ ადამიანებს ემოციების გამოხატვის მხრივ, საკმაოდ მკაცრი კონტროლის უნარით აჯილდოებს. თუმცა ზოდიაქოს სხვა ნიშნებს შორის, თხის რქის ერთგულება და ზრუნვა, იმ ადამიანების მიმართ ვინც ჭეშმარიტად უყვარს, განსაკუთრებით თვალშისაცემია.
თხის რქას არ უყვარს გრძნობების სიტყვებით აფიშირება, ამ ადამიანების უმრავლესობას საერთოდ არ ეხერხება ენის მოჩლექით საუბარი და ურჩევნია საკუთარი სიყვარული ვინმეს მიმართ საქციელით გამოხატოს.
გამომდინარე იქიდან, რომ თხის რქა ზოდიაქოს მეათე სახლს მართავს, რომელიც თავის მხრივ კარიერაზეა პასუხისმგებელი, თხის რქების უმრავლესობისთვის ცხოვრების აზრი სამუშაო და პროფესიული განვითარებაა. ამიტომ ადამიანები, რომლებიც ზოდიაქოს ამ ნიშნით იბადებიან, პირადი ცხოვრების მოწყობას მხოლოდ მაშინ იწყებენ, როცა ფეხქვეშ მყარ ნიადაგს შეიქმნიან მატერიალური კუთხით. თუ ისე მოხდა, რომ თხის რქა ნაადრევად დაქორწინდა, იგი არც ამ შემთხვევაში შეწყვეტს საკუთარი პროფესიული ამბიციების დაკმაყოფილებაზე ზრუნვას.
გასაკვირი არაა ის ფაქტი, რომ ბევრი თხის რქა დედა, ოსტატურად უთავსებს დიასახლისობას და სამსახურებრივ საქმიანობას ერთმანეთს. თანაც ისე, რომ ორივე ფრონტზე იდეალური წესრიგი და დისციპლინა ჰქონდეს.
თხის რქის ერთადერთი მტერი, პლანეტა სატურნის მიერ პერიოდულად გამოწვეული დეპრესიული მდგომარეობაა. როგორც წესი, თხის რქები ძალზე რთულად ეგუებიან მარცხს ცხოვრების ნებისმიერ სფეროში, ამიტომ ოჯახურ კონფლიქტს ან პროფესიულ წარუმატებლობას, თხის რქის დემობილიზება და ხანგრძლივი დროით გატეხაც კი შეუძლია. შესაბამისად გასაკვირი არაა, რატომ ეკიდებიან ეს ადამიანები სამსახურის და ცხოვრების მეგზურის შერჩევას ესოდენ დიდი სიფრთხილითა და პასუხისმგებლობით.