ლილიტი ლომში გადავიდა: არ გადავარდეთ ილუზიებში, პროგნოზი ზოდიაქოს ყველა ნიშნისთვის

ლილიტი 8 იანვარს კირჩხიბიდან ლომში გადავიდა, სადაც 9 თვეს გაატარებს და ქალწულს 2023 წლის 3 ოქტომბერს ესტუმრება. ლილიტი ფიქტიური წერტილია, მაგრამ საკმაო გავლენა აქვს ჩვენზე. ადამიანში აძლიერებს ცდუნებას, შეცდომებს, შიშებს, კარმას. ლომში ლილიტის ყოფნის დროს გამოიკვეთება რამდენიმე თემა: სიყვარული, შემოქმედება, ბავშვები და ლიდერობა.

ლომში ყოფნის დროს ადამიანებში მოიმატებს ეგოიზმი, ნარცისიზმი. ნუ აჰყვებით მირაჟს, ილუზიებს. იყავით გააზრებული და ფაქტებზე დაყრდნობით იმოქმედეთ. არაა გამორიცხული უსიამოვნება შვილებთან; არ გირჩევთ მათთან დაპირისპირებას, ჰიპერმზრუნველობას ან პირიქით, დაშორებას მასთან. პირიქით, შეაქეთ, შეაგულიანეთ. იყავით გულუხვი მათ მიმართ. დააინტერესეთ შემოქმედებით. თუ უკვე გაქვთ უსიამოვნებები შვილებთან, მიიყვანეთ ფსიქოლოგთან, კარგია ფსიქოთერაპიის კურსიც. ნუ უყურებთ თქვენს შვილს როგორც თქვენს საკუთრებას, დააფასეთ მასში პიროვნება. შეიძლება გახშირდეს აბორტების, მუცლის მოშლის რაოდენობა, შვილის მიტოვების ფაქტები. გახშირდება თაობათა დაპირისპირება.

ლილიტმა შეიძლება გრძნობებზეც მოახდინოს გავლენა. თუ ხვდებით რომ თქვენ გვერდით არსებული ადამიანი არ განიჭებთ ბედნიერებას, უმჯობესია, დაშორდეთ მას. ამასთან, მარტოხელებს ელოდებათ დიდ სიყვარულთან, კარმულ პარტნიორთან შეხვედრა და ვერ გეტყვით, რომ ეს კავშირი უპრობლემოდ განვითარდება. აქაც სასურველია მოუხმოთ გონიერებას, არ გადავარდეთ ილუზიებში და თუ ხვდებით, რომ ადამიანი გთრგუნავთ, ბედნიერებაზე მეტად ტკივილს განიჭებთ, გაეცალეთ. სიყვარულის გამო ნუ გაიღებთ მსხვერპლს, ნუ დაანგრევთ ოჯახს, ან საკუთარ თავს, ცხოვრებას.

ლომში ლილიტის ყოფნის დროს ადამიანებში მოიმატებს საკუთარი თავის სხვებზე წინ დაყენების სურვილი. ეს არაა ცუდი, თუ თქვენი ამბიციები საფუძვლიანია და თუ არაფერს წარმოადგენთ, ზედმეტი ბაქიბუქობა კარგს არაფერს მოგიტანთ. ლომი არის თეატრალური ნიშანი და ნუ გაგიკვირდებათ, თუ ადამიანები გამორჩეულ ჩაცმულობას მიანიჭებენ უპირატესობას. მოგინდებათ გარშემო მყოფების ყურადღების მიქცევა თქვენი ვარცხნილობით, სამოსით, მაკიაჟით. მოერიდეთ ზედმეტ აზარტულობას და განსაკუთრებით ფულზე თამაშის დრო. უმჯობესია, ამ სფეროს საერთოდ ჩამოშორდეთ, თუ არ გსურთ უსიამოვნებებში გახვევა.

რაც შეეხება ჯანმრთელობას, ლილიტის ლომში ყოფნის დროს მაქისმალურად უნდა მოუფრთხილდეთ გულს, გულ-სისხლძარღვოვან სისტემას, აკონტროლეთ წნევა. არ გირჩევთ მზეზე დიდხანს ყოფნას. ზომიერება გმართებთ მზის აბაზანების მიღებისას. და ეს გაფრთხილება განსაკუთრებით ეხება ბავშვებს და ხანდაზმულებს.

საზოგადოებაში შეიძლება გამოჩნდეს ქარიზმატული პიროვნებები, რომლებიც ლიდერ-გადამრჩენის როლს შეასრულებენ, მაგრამ გონივრულად შეაფასეთ ყველაფერი, ბრმად ნურავის ენდობით. არაა გამორიცხული, ვიღაცამ საკუთარი მიზნებისთვის გამოგიყენოთ. ლომი ლიდერი, მეფე და ხელისუფალია და ნუ გაგიკვირდებათ, თუ ხელმძღვანელ პირებს საკუთარი ეგოიზმის გამო მოუნდებათ დაქვემდებარებულების გაწირვა. არაა გამორიცხული, რომ გამოვლინდეს ლიდერთა საიდუმლოებები, მაქინაციები და ხალხმა მისი ჩამოგდება გადაწყვიტონ. ამასთან, ზოგიერთმა შეიძლება დადგას დიდი წარმოდგენა სხვების მოტყუების მიზნით. სხვათა შორის, ამ პერიოდში გადაღებული ფილმები და დადგმული სპექტაკლებიც შეიძლება იყოს პროპაგანდისტული, მანიპულირების მოსახდენი.

წლების წინ ლილიტი ლომში იყო 2014 წლის 4 მარტიდან 28 ნოემბრამდე; კიდევ უფრო ადრე 2005 წლის 29 აპრილიდან 2006 წლის 26 იანვრამდე. გაიხსენეთ რა ხდებოდა თქვენს ცხოვრებაში ამ წლებში. გაფრთხილდით, რომ არ დაუშვათ იგივე შეცდომები. შეიძლება განმეორდეს იგივე სიტუაციები, იგივე საცდუნებელი.

ლილიტის ლომში ყოფნას ზოდიაქოს ყველა წარმომადგენელი იგრძნობს და განსაკუთრებით ისინი, ვინც წელს გახდებიან 9, 18, 27, 36, 45, 54, 63 და ა.შ.

როგორ მოვიქცეთ ლილიტის ლომში ყოფნის დროს მეტი სარგებელი რომ მივიღოთ: ეცადეთ, დრო დაუთმოთ შემოქმედებითი იდეების განხორციელებას, არტთერაპიას; მეტი დრო გაატარეთ შვილების გვერდით; იყავით მოსიყვარულე მათ მიმართ. მეტი ისეირნეთ სუფთა ჰაერზე, მიიღეთ ვიტამინებით მდიდარი საკვები. ჩაიცვით ლამაზად, მოხდენილად. არავის მისცეთ თქვენი მოტყუების, წყენის უფლება. ეცადეთ, ასიამოვნოთ საკუთარ თავს; მეტად შეიყვარეთ საკუთარი თავი და ნურავის გამო ნუ დაიჩაგრავთ თავს. გამორიცხული არაა, მიიღოთ მაღალი თანამდებობა, მაგრამ ამ დროს არ უნდა აგივარდეთ თავში და არ გახდეთ მარიონეტი სხვის ხელში. გაფრთხილდით, რომ სხვამ თავის ცუდი საქმე თქვენი ხელით არ გაგაკეთებინოთ.

ვერძი

გააუმჯობესეთ დამოკიდებულება შვილებთან. ნუ მოსთხოვთ ზედმეტ დამოუკიდებლობას და ნურც ჰიპერმზრუნველობით გააწამებთ. დააფასეთ მასში პიროვნება. შვილებთან ურთიერთობაში დაიცავით ოქროს შუალედი. ისევე როგორც პირად ურთიერთობაში. დაფიქრდით, ადამიანი, რომელიც თქვენ გვერდითაა, არის თქვენი ღირსი? მოგინდებათ, რომ პარტნიორმა მეტად დაგაფასოთ, მუდმივად აღფრთოვანებული იყოს თქვენით. მოერიდეთ აზარტულ თამაშებს, არც საჭესთან გირჩევთ სიჩქარის გადაჭარბებას.

კურო

იყავით მაქსიმალურად დაკვირვებული, როცა საქმე ოჯახს, უძრავ ქონებას ეხება. ნუ მიიღებთ დაუფიქრებელ გადაწყვეტილებას დაქორწინებასთან ან განქორწინებასთან დაკავშირებით. ნუ გაგიკვირდებათ, თუ დაიძაბება დამოკიდებულება ოჯახის წევრებს შორის. შეიძლება მოგეჩვენოთ, რომ ოჯახის რომელიღაც წევრს არ უყვარხართ, რაღაცას გიმალავთ. იყავით გულახდილი მათთან. არ გააფუჭოთ დამოკიდებულება ნათესავებთან. დაიცავით ოჯახური ტრადიციები.

ტყუპი

ნუ ენდობით გადაუმოწმედელ ინფორმაციას და არც თავად გაავრცელოთ. აკონტროლეთ ის, რასაც ამბობთ; და ყველამ სწორად გაიგოს თქვენი ნათქვამი. მოერიდეთ ნეგატიურ გამონათქვამებს, ჭორებს. დაკვირვებით გააფორმეთ საბუთები, სანამ დოკუმენტს ხელს მოაწერთ, კარგად გაეცანით. დაიცავით მოძრაობის წესები, განსაკუთრებით, თუ მძღოლი ხართ.

კირჩხიბი

ფინანსების მიმართ გმართებთ მეტი დაკვირვება. ნუ ენდობით შემოთავაზებას, სადაც მომენტალურ გამდიდრებას გპირდებიან. გამოგიჩნდებათ შემოსავლის დამატებითი წყარო, მაგრამ ეცადეთ, ყველა კანონიერი იყოს. ასევე სიფრთხილე გმართებთ ფინანსური ხარჯებისადმი. იყავით დაკვირვებული გადარიცხვებისას. თუ ვინმეს რამეს დაპირდით, ფულთან დაკავშირებით, დროულად უნდა აუნაზღაუროთ. აკონტროლეთ იმ პროდუქტების ხარისხი, რასაც მიირთმევთ. ნურც იშიმშილებთ და ნურც კუჭს გადატვირთვათ.

ლომი

დაფიქრდით, როგორ აფასებთ თქვენს პარტნიორს და რას წარმოადგენთ მისთვის. უფრო მეტად უნდა დააფასოთ საკუთარი თავი. მეტად უნდა შეიყვაროთ თქვენი თავი. მაგრამ მეორე მხრივ, ნუ ეცდებით პარტნიორის დაკნინებას. დაიცავით ოქროს შუალედი. იყავით გულმართალი პარტნიორთან. ზომიერება გმართებთ მუშაობის დროსაც. ნუ გგონიათ, რომ სხვა ვერ გააკეთებს თქვენსავით და ნურც იმას იტყვით, რომ ვერ შეძლებთ იმას, რასაც სხვა აკეთებს. მოგინდებათ, რომ გარშემო მყოფებმა მეტად დაგაფასონ, მოითხოვთ ახლობლებისგან მეტ ყურადღებას. ნუ გაგიკვირდებათ, თუ ჭორების, განხილვის გმირი გახდებით. არ მიაქციოთ არაფერს და არავის ყურადღება, აკეთეთ თქვენი საქმე და იყავით ბედნიერი.

ქალწული

გამოარკვევთ საიდუმლოს, რასაც გიმალავდნენ, მაგრამ ნუ მიიღებთ დაუფიქრებელ გადაწყვეტილებებს. არაა გამორიცხული, რომ თქვენს შესახებაც გავრცელდეს საიდუმლოებები, ვიღაცამ წარსული ამოგიქექოთ. მოგინდებათ შორს გაქცევა და ცხოვრების თავიდან, სუფთა ფურცლიდან დაწყება. ეს არის წარსულში დაშვებული შეცდომების გამოსწორების დრო. არ გირჩევთ სასიყვარულო სამკუთხედის შექმნას, ფარული კავშირების გაბმას. შეიძლება გამოგიჩნდეთ შემოსავლის ფარული წყარო.

სასწორი

არ დაუშვათ შეცდომა პირად ურთიერთობაში. შეიძლება თქვენ გახდეთ ეჭვიანი ან პარტნიორი. არ გირჩევთ ფარული სასიყვარულო ურთიერთობის გაბმას. უსიამოვნებების ასაცილებლად, უმჯობესია, პარტნიორთან გულახდილი საუბარი. ფორტუნა ხშირად გაგიმართლებთ და უსიამოვნო სიტუაციებიდანაც დაგიცავთ, მაგრამ ეცადეთ, საფრთხეში არ გაყოთ თავი. გაფრთხილდით, როცა სოციალურ ქსელებში საკუთარ თავზე ინფორმაციას ავრცელებთ. ახალგაცნობილებთან იყავით ფრთხილად, ნუ დაუმეგობრდებით საეჭვო ადამიანებს. აგრეთვე, დაკვირვება გმართებთ, სანამ ახალ კოლექტივში, ჯგუფში გაწევრდებით. მოგიწევთ მეტად ზრუნვა სხვის შვილებზე: ნათლული, გერი.

მორიელი

მოგინდებათ სტატუსის ამაღლება, დაწინაურება. არ მოგინდებათ ვინმეზე (მშობლებზეც კი) დაქვემდებარება და ამის გამო მუდმივად გექნებათ უსიამოვნება. ამასთან, არ გირჩევთ საკუთარი ძალაუფლების ბოროტად გამოყენებას და დაქვემდებარებულებით მანიპულირებას. მაქსიმალურად გაფრთხილდით, რომ სასურველს უპატიოსნო გზით არ მიაღწიოთ. მოგინდებათ მეტის მიღწევა, მაგრამ ყველაფერი უნდა იყოს პატიოსანი გზით. არ აჰყვეთ ცდუნებას, რომ გამოიმუშაოთ მეტი, გახდეთ ხელმძღვანელი; იყავით დაკვირვებული და გააზრებული. დაბოლოს, კარიერის გამო ნუ მოაკლებთ ყურადღებას ოჯახს.

მშვილდოსანი

ნუ გახდებით ილუზიური იდეების მსხვერპლი, ნუ გაიჩენთ ცრუ გურუს, რომელიც საბოლოოდ დაგაზარალებთ. მოერიდეთ კამათს იმ ადამიანებთან, ვისაც თქვენგან განსხვავებული მოსაზრებები გააჩნია. ნურც თქვენ გგონიათ, რომ თქვენი აზრია იდეალური და სწორი. იყავით დაკვირვებული საზღვარგარეთ მოგზაურობის ან უცხო ქვეყანაში საცხოვრებლად გადასვლის დროს. გადაამოწმეთ ბილეთები, ბარგი, ფინანსები. ყურადღება გმართებთ ინტერნეტნაცნობობის დროსაც, რომ არ გახდეთ აფერისტის მსხვერპლი. არ დაძაბოთ ურთიერთობა მეუღლის მშობლებთან. დაკვირვება გმართებთ სწავლის დროსაც. ნუ მიატოვებთ კურსებს, ლექციებს.

თხის რქა

ნუ გარისკავთ ფულით, განსაკუთრებით პარტნიორის ფინანსებით. არ გირჩევთ აჩქარებას, ყველაფერი კარგად უნდა გააანალიზოთ. სასურველია, შეთანხმებულად იმოქმედეთ. არაა გამორიცხული პარტნიორთან ფულის გამო კამათი. შეიძლება მან გადაწყვიტოს თქვენი გაკონტროლება, თუ რამე საეჭვო შეგამჩნიათ. მაქსიმალურად მოერიდეთ აზარტს და რისკს. არ გირჩევთ ფულის დაბანდებას საეჭვო საქმიანობაში. თუ სამემკვიდრეო საკითხების მოგვარებით ხართ დაკავებული, იყავით დიპლომატიური, მაგრამ დაიცავით თქვენი უფლებები. ზოგიერთის ცხოვრებაში გამოჩნდება ახალი პარტნიორი, რომლის მიმართაც მომენტალურად იგრძნობთ ვნებას.

მერწყული

ნუ გაართულებთ დამოკიდებულებას საყვარელ ადამიანთან. შეიძლება მოგეჩვენოთ, რომ თქვენ არ ხართ მისი ღირსი ან ის არ შეგეფერებათ. ადეკვატურად შეაფასეთ თქვენი თავიც და გარშემო მყოფებიც. იყავით მაქსიმალურად დაკვირვებული ახალი საქმიანი ხელშეკრულებების გაფორმებისას; აგრეთვე, ქორწინებისას. ზოგიერთმა შეიძლება გადაწყვიტოთ მეორე შვილის გაჩენა. თუ უკვე გყავთ, იყავით მზრუნველი, მაგრამ არა მომაბეზრებელი.

თევზები

არ დაუშვათ შეცდომები სამსახურში. იყავით დაკვირვებული მუშაობისას, ყველა დეტალი და საბუთი კარგად გაამოწმეთ. ეცადეთ, ყველაფერი მოწესრიგებული გქონდეთ, ნუ შექმნით ქაოსს სამუშაო მაგიდაზე. თუ სამსახურის მაძიებელი ხართ, არ აჰყვეთ ცდუნებას და ნუ ენდობით ცრუ დაპირებებს. ყველა პუნქტი გაწერილი და იურიდიულად დამოწმებული უნდა იყოს, იმედგაცრუებული რომ არ დარჩეთ. არ გირჩევთ ურთიერთობების დაძბავს კოლეგებთან. მოერიდეთ მათთან თქვენს პირად ცხოვრებაზე საუბარს და ამასთან არ იჭორაოთ არც კოლეგებზე და არც უფროსზე. დაიცავით ზომიერება კვებასა და ვარჯიშში. ლილიტის გავლენით შეიძლება გაგიჩნდეთ შიშები ჯანმრთელობასთან დაკავშირებით. ამიტომ, დროულად ჩაიტარეთ გამოკვლევები, რათა იყოთ მშვიდად.