ქმრები ზოდიაქოს ნიშნის მიხედვით ანუ ვინ შეგეფერებათ ცხოვრების მეგზურად
ცხოვრებაში მეორე ნახევრის სწორად შერჩევა ძალიან რთულია. ვერ გამოიცნობთ, ვის უნდა დაუკავშიროთ ცხოვრება, ვინ გაგაბედნიერებთ... გავარჩიოთ ქმრები მათი ზოდიაქოს ნიშნების მიხედვით:
- როგორი ქმარია ვერძი?
ფიცხი, ამაყი და ფათერაკების მაძიებელია. მისი სახით იძენთ ქმარს და ძნელად აღსაზრდელ შვილს ერთდროულად.
მინუსები – ინფანტილური, საშინლად იმპულსური და ფეთქებადია. ჯერ აკეთებს მერე ფიქრობს, ან სულაც არ ფიქრობს ისე აკეთებს. ვერ იტანს შენიშვნებს და ჭკუის სწავლებას.
პლუსები – გ ულუხვი, კეთილი და მეგობრულია. წყენას არასოდეს იმახსოვრებს. ფულს სწრაფად შოულობს (თუმცა ასევე სწრაფად ხარჯავს).
- როგორი ქმარია კურო?
სიმყუდროვის, გემრიელი საჭმელ-სასმლის და ტელევიზორის პულტის მოყვარულია. სამაგიეროდ, კარგ ფულს შოულობს.
მინუსები – საშინლად ჯიუტი, კონსერვატორული აზროვნების მქონე და ზანტია. არ უყვარს ხშირი გადაადგილება და სტუმრად სიარული, მით უმეტეს ისეთ სახლში, სადაც გემრიელი კერძები არ ეგულება.
პლუსები – სტაბილური, მზრუნველი და ერთგულია, იშვიათად ღალატობს ცოლს და ოჯახს.
- როგორი ქმარია ტყუპი?
ცვალებადი, არაპროგნოზირებადი და მოუსვენარი ადამიანია. გადაწყვეტილებებს სწრაფად იღებს და ასევე სწრაფად იცვლის მათ.
მინუსები – ბევრი ლაპარაკი უყვარს, იშვიათად ასრულებს დანაპირებს, ჩვევად აქვს გამუდმებით დააგვიანოს.
პლუსები – მხიარული, მრავალმხრივად ერუდირებული და ახალგაზრდული შემართებით სავსეა ცხოვრების ბოლომდე. მასთან მოწყენა შეუძლებელია.
- როგორი ქმარია კირჩხიბი?
ზე-მზრუნველი, მეოჯახე და მოსიყვარულეა. დაბადებიდანვე მოწოდებულია, რომ ჰყავდეს ოჯახი, შვილები და იზრუნოს მათზე.
მინუსები – ოჯახში ქალიც ის არის და კაციც. ხშირად ცოლის ფუნქციებშიც დაუკითხავად ერევა. უყვარს წუწუნი და თავის შეცოდება. პერიოდულად საშინლად ძუნწი და დეპრესიულია.
პლუსები – მზრუნველი, მოსიყვარულე და ერთგული ქმარია. შვილებს დედაზე უკეთ უვლის.
- როგორი ქმარია ლომი?
ქმარი არ არის, საკუთარ ოჯახში მეფე და იმპერატორია.
მინუსები – ეგოისტი, უზომოდ თავმოყვარე და ამბიციურია. მიაჩნია, რომ ოჯახი მასზე დაქვემდებარებული პატარა სამეფოა, ამიტომ მის ბრძანებას ყველა უსიტყვოდ უნდა დაემორჩილოს. ეჭვიანი და მესაკუთრეა.
პლუსები – დიდსულოვანი, გულუხვი და კეთილია. არ ახასიათებს მეწვრილმანეობა, არასოდეს ითვლის რაში ხარჯავთ მის მოცემულ ფულს. ყოველთვის აქვს თუ შესაძლებლობა არა, სურვილი მაინც, რომ ძვირად ღირებული საჩუქრებით გაგანებივროთ.
- როგორი ქმარი ქალწული?
ქმარი-მენეჯერი. მასზე უკეთ ვერავინ დაითვლის რამდენ ცალ ხელსახოცს მოიხმართ საუზმისას და რამდენი კილოვატი ელექტროენერგია მიგდით ტოსტერის ყოველ გამოყენებაზე.
მინუსები – ხელმომჭირნე, მეწვრილმანე და გამაღიზიანებლად პედანტია. ფერის, ხარისხისა და ლეიბლის მიხედვით აქვს დალაგებული სამოსი საკუთარ გარდერობში. იმავეს მოსთხოვს ცოლს. შეუძლია დაურეცხავი ჭურჭლის გამო განქორწინებაზე შეიტანოს განაცხადი სასამართლოში.
პლუსები – ყოველთვის შოულობს ფულს. თუმცა მისი ხარჯვა დიდად არ ეხალისება. დაკვირვებული, მზრუნველი და წინდახედულია. მასზე უკეთეს მომვლელს ვერსად ნახავთ ავადმყოფობისას.
- როგორი ქმარია სასწორი?
ქმარი კი არა "ქრონიკული შეყვარებულია". ეტრფის არა ცოლს, არამედ თავად სიყვარულს
მინუსები – ზედმეტად მერყევი, რბილი და დამყოლია. ხშირად ექცევა სხვისი გავლენის ქვეშ. იშვიათად შეუძლია პრინციპული გადაწყვეტილების მიღება.
პლუსები – მოსიყვარულე, ბუნებით შემოქმედი და თბილია. იშვიათად უწევს ხმას და ჭირივით ეჯავრება კონფლიქტები. აქვს კარგი გემოვნება, ამიტომ თამამად შეგიძლიათ საშოპინგოდ გაიყოლოთ.
- როგორი ქმარია მორიელი?
"დიქტატორი". მისთვის მთავარია ძალაუფლება და მართვა. ამიტომ ოჯახის წევრებზეც შესანიშნავად "ტესტავს" საკუთარ, დიქტატორულ მონაცემებს.
მინუსები – საშინლად ეჭვიანი, მესაკუთრე და პირქუშია. იშვიათად იღიმება. მით უმეტეს არასოდეს უღიმის ცოლის დაქალებს. უფრო მეტიც, ვერ იტანს მათ და ადრე თუ გვიან აუცილებლად მოიშორებს თავიდან.
პლუსები – საიმედო, ფრთხილი და წინდახედული პარტნიორია. ყოველთვის იცავს საკუთარ ოჯახს და საყვარელ ადამიანებს თუნდაც სიცოცხლის ფასად.
- როგორი ქმარია მშვილდოსანი?
თავისებური ტიპის "სანტა კლაუსია". სტუმრად მოდის ხოლმე პერიოდულად საკუთარ სახლში, ფართო ღიმილითა და საჩუქრებით.
მინუსები – არაპროგნოზირებადი, თავგადასავლების მოყვარული და ინფანტილური ტიპია. ოჯახს ყოველთვის მეგობრები ურჩევნია. არ მოსწონს ტიპური ქმრისა და მამის როლი. ვერ იტანს პასუხისმგებლობებს.
პლუსები – ოპტიმისტი, უზომოდ ხელგაშლილი და კომუნიკაბელურია. სიამოვნებით დაგრთავთ ნებას სახლში მოიწვიოთ მთელი თქვენი სამეგობრო და სულაც ღამისთევით დაიტოვოთ ისინი. იცის მოულოდნელი სიურპრიზების მოწყობა.
- როგორი ქმარია თხის რქა?
იდეალური ან იდეალურთან მიახლოებული. მთავარია მისი ჯიჯღინა ხასიათი აიტანოთ.
მინუსები – ემოციურად ცივი და მოზომილია. იშვიათად ან არასოდეს ამბობს სიტყვას "მიყვარხარ" ცოლის მისამართით. პერიოდულად უყვარს ნოტაციების კითხვა და ჭკუის სწავლება.
პლუსები – სტაბილური, მზრუნველი და უზომოდ ერთგული მეორე ნახევარია. ოჯახი მისთვის ყველაზე დიდი ფასეულობაა, ამიტომ ცხოვრებაში რასაც აკეთებს მხოლოდ მისთვის.
- როგორი ქმარია მერწყული?
უფრო მეგობარია, ვიდრე ქმარი. მოსწონს არაოფიციალური ურთიერთობები.
მინუსები – არაპროგნოზირებადი, ზედმეტად ექსტრაორდინარული და ცვალებადია. იშვიათად იძლევა დაპირებებს. არ მოსწონს პასუხისმგებლობები. ნაკლებად აინტერესებს რას იტყვის ხალხი. შესაბამისად იშვიათად უწევს აზრს საზოგადოებრივ შეხედულებებს.
პლუსები – მეგობრული, კომუნიკაბელური და ლოიალური ქმარია. იშვიათად მართავს ეჭვიანობის სცენებს და ყოველთვის ცდილობს მეუღლისთვის საუკეთესო თანამოაზრე იყოს. დაშორების შემთხვევაშიც ინარჩუნებს ყოფილთან მეგობრულ დამოკიდებულებას.
- როგორი ქმარია თევზები?
მისი სახით პირადი ფსიქოლოგი გეყოლებათ, მაგრამ პასუხისმგებლობებს ნუ მოსთხოვთ ოჯახის წინაშე. მოგიწევთ თქვენ იყოთ ქალიც და კაციც სახლში.
მინუსები – ზედმეტად ხათრიანი, მეოცნებე და რბილია. იშვიათად ეხერხება პრინციპულობის გამოჩენა. ურჩევნია დინებას მიჰყვეს და საღამოობით ჭიქა ლუდთან ერთად იოცნებოს უკეთეს მომავალზე.
პლუსები – მოსიყვარულე, თანამგრძნობი და თბილია. არ უჭირს პატიება. იშვიათად ახასიათებს სიმკაცრე ბავშვების მიმართ. მათთვის იდეალური მამაა.