იანვრის მნიშვნელოვანი ასტროლოგიური მოვლენები: საინტერესო ცვლილებები გველოდება
19 იანვრამდე მზე თხის რქის ზოდიაქოშია. თხის რქა არის მიზანსწრაფული, დისციპლინირებული, პასუხისმგებლიანი ნიშანი. უყვარს მართვა, პროცესის კონტროლი. სურს წარმატების მიღწევა, დაწინაურება, კარიერული წინსვლა, რასაც ნაბიჯ-ნაბიჯ და საფუძვლიანად აღწევს. სასურველია, ჩვენც გამოვავლინოთ თხის რქის საუკეთესო თვისებები, რათა მივაღწიოთ მწვერვალებს.
7 იანვრიდან (11 თებერვლამდე) მერკური თხის რქაშია. მერკური 29 დეკემბრიდან რეტროგრადულ სვლაშია. იყავით მაქსიმალურად დაკვირვებული, რომ არ დაუშვათ შეცდომები ციფრებთან, ფინანსებთან, მგზავრობის დროს არაფერი დაგავიწყდეთ, გამოგრჩეთ. ყველაფერი ჩაინიშნეთ, რომ არაფერი გამოგეპაროთ. სასურველია, მერკურის რეტროგრადული სვლის დროს არ დაიწყოთ ახალი საქმეები. ეს დრო გამოიყენოთ უკვე დაწყებულების გადასაკეთებლად, გამოსასწორებლად, გასაუმჯობესებლად.
3 იანვრიდან ვენერა მერწყულში იქნება 27-მდე. მერწყული ეპატაჟური, შოკისმომგვრელი, გამომგონებლური, მეგობრული ნიშანია და ვენერაც მასთან სტუმრობის დროს მეტად ჰაეროვანი და რომანტიკულად გადარეული გახდება. საყვარელ ადამიანებს მოუნდებათ მეტი თავისუფლება. არ გირჩევთ ურთიერთობების გაწყვეტას სასიყვარულო პარტნიორთან; უფრო მეტიც, ზოგიერთმა შეიძლება რომანი მეგობართან გააბას, ფულის ფლანგვას რამე ორიგინალურზე ან დაუფიქრებელზე. სამაგიეროდ, საუკეთესო დროა საყვარელ ადამიანთან ერთად საქმეების საკეთებლად, შემოქმედებითი იდეების განსახორციელებლად, ბინის მოსაწყობად. ზოგიერთს მოუნდება ექსპერიმენტების ჩატარება სტილთან, გარეგნობასთან დაკავშირებით. ამასთან, გაერთიანდით თანამოაზრეებთან ერთად ლამაზი, კეთილი საქმეების საკეთებლად.
სავსემთვარეობას ველოდებით 7 იანვარს, კირჩხიბის ზოდიაქოში, 3:08-ზე. საინტერესო ისაა, რომ წელს კირჩხიბში ორი სავსემთვარეობა გვექნება, ერთი იანვარში და მეორე წლის ბოლოს - 27 დეკემბერს. 7 იანვარის სავსემთვარეობაზე მზე თხის რქაშია, მთვარე - კირჩხიბში. ემოციური დღეა. მოგვიწევს ცხოვრებისეული მოვლენების გადახედვა, ზოგიერთის კორექტირება. მიიღებთ გაკვეთილს, რაც თქვენთვის სამაგალითო იქნება, რაც მომავალში სწორად მოქმედების შესაძლებლობას მოგცემთ. არ გირჩევთ აჩქარებას, ნუ მიატოვებთ დაწყებულ საქმეებს. გააუმჯობესეთ ურთიერთობა ოჯახის წევრებთან.
შავი მთვარე ლომში გადავა 8 იანვარს და დარჩება 3 ოქტომბრამდე. ლილიტს 9-თვიანი ციკლი აქვს, თითოეულ ნიშანში ამდენ ხანს რჩება. ლილიტი არაა პლანეტა, ესაა ფიქტიური წერტილი, მაგრამ საკმაოდ დიდი გავლენა აქვს ჩვენზე. ეს არის ჩვენი შიშები, ცდუნებები, მიჯაჭვულობა და დამოკიდებულებები. კონკრეტულ ნიშანში ყოფნის დროს ის ავლენს მის ცუდ თვისებებს. ამიტომ, ნუ გაგიკვირდებათ, თუ ლომში ყოფნის დროს ადამიანებში მოიმატებს ეგოისტურობა, ყველას მოუნდება საკუთარი უპირატესობის დამტკიცება, ლიდერის თვისებების გამოვლენა და ტყუილი ბაქიბუქი. არ გირჩევთ ურთიერთობის გაფუჭებას ბავშვებთან, მათ მიტოვებას. საუკეთესო დროა შემოქმედებითი ნიჭის გამოსავლენად. იყავით მეტად მშვიდი და გააზრებული საყვარელ ადამიანთან ურთიერთობისას. ნუ გაიფუჭებთ დამოკიდებულებას რომანტიკულ პარტნიორთან.
9 იანვარს მარსი ვენერას ჰარმონიული ასპექტი გველოდება. საუკეთესო დღეა საყვარელი ადამიანისთვის რომანტიკული საღამოს, დღესასწაულის მოსაწყობად; საჩუქრის მისართმევად. თუ ურთიერთობა ახალი დაწყებულია, გამოუტყდით გრძნობებში.
12 იანვარს მარსი რეტროგრადული სვლიდან გამოვა. მარსი 20 აგვისტოდან ტყუპში მდებარეობს (მარსი ტყუპიდან საბოლოოდ გამოვა 25 მარტს) და აქვე მოუწია უკუსვლამ. უკვე 13 იანვრიდან შეგიძლიათ საქმეების მოსაგვარებლად გააქტიურება. იმ საკითხების დასრულება, რაც დიდი ხნის წინ დაიწყეთ, მიტოვებული გქონდათ ან რაღაც მიზეზის გამო ვერ აკეთებდით.
18 იანვრიდან მერკური სვლას გაასწორებს და დირექტულ ფაზაში გადავა. უნდა დაასრულოთ დაწყებული საქმეები. რათა რამდენიმე დღეში ახალმთვარეობა გველოდება და უკვე ამ დროიდან შეძლებთ ახალი საქმეების დაწყებას.
20 იანვარს მზე 19 თებერვლამდე მერწყულს ესტუმრება. მერწყული არის მომავლის ნიშანი, მომართული მეგობრულობასა და თანამშრომლობაზე. გააუმჯობესეთ დამოკიდებულება მათთან. დაიწყეთ ახალი პროფესიის ათვისება. გააუმჯობესეთ თქვენი გაჯეტები. თუმცა, ახლის შეძენა ახალმთვარეობის შემდეგ ჯობია.
ახალმთვარეობას მერწყულის ზოდიაქოში ველოდებით 22 იანვარს, 00:54-ზე, მერწყულის მეორე გრადუსში. ამავე დღეს აღმოსავლური კალენდრით დგება ახალი წელი და ვეფხვის ადგილს წლის მმართველის რანგში იკავებს წყლის შავი კურდღელი. ამ დღეს კარგია სურვილებისა და სამომავლო მიზნების ჩამოწერა. ეს არის ცვლილებებისა და ტრანსფორმაციის დაწყების პერიოდი. ცვლილებებია მოსალოდნელია მსოფლიო პოლიტიკასა და ეკონომიკაში. შანსი მოგეცემათ, დაიწყოთ და წარმატებას მიაღწიოთ საქმეებში. ამასთან, უნდა გამოავლინოთ ინიციატივა და არ დაელოდოთ სხვას. მეტად გამოვლინეთ ლიდერის თვისებები, იყავით მომართული საქმიანი ურთიერთობების გაუმჯობესებაზე. საქმეების გამო შეიძლება მოგიწოთ ახალი პროფესიის ათვისებამ, სასწავლო კურსებზე დასწრებამ.
23 იანვარს, მერწყულის ზოდიაქოში ვენერა - სიყვარულის, სილამაზისა და ფულის პლანეტა შეუერთდება მკაცრ და აკრძალვების პლანეტა სატურნს. ეს იქნება გრძნობებისა და ურთიერთობების გამოცდის პერიოდი. შეიძლება მოგეჩვენოთ, რომ პარტნიორი გაცივდა თქვენ მიმართ, ზედმეტად მკაცრია ან გზღუდავთ. დააკვირდით საკუთარ თავს, შეგრძნებებს. მოხდება ურთიერთობების განახლება, ურთიერთობაში ახალი წესების დაკვიდრება. ამასთან, არ გირჩევთ პარტნიორისთვის ზედმეტი პასუხისმგებლობის დაკისრებას. ჩამოყალიბდით რისი შეძენა გსურთ, არ გირჩევთ ფულის ფლანგვას, თითოეული თეთრის დახარჯვა გააზრებული და ნაფიქრი უნდა გქონდეთ. კარგი იქნება, თუ ჩამოწეთ იმ ნივთების სიას, რის ყიდვასაც უახლოეს მომავალში აპირებთ.
დაბოლოს, 27 იანვარს ვენერა თევზებს ესტუმრება და დარჩება 20 თებერვლამდე. აქ ვენერა თავს ყველაზე კარგად გრძნობს. ეს საუკეთესო დრო შემოქმედებითი იდეების განსახორციელებლად, სილამაზის შესაქმნელად, რომანტიკული შეხვედრებისთვის. ამასთან, იყავით გააზრებული და დაკვირვებული; როგორც ცნობილია, სიყვარული ბრმა და ყრუა და არ გირჩევთ საყვარელი ადამიანის გამო მსხვერპლის გაღებას, რისკებზე წასვლას. მოერიდეთ სასიყვარულო სამკუთხედში მოხვედრას, ფარული კავშირის გაბმას. კარგია ქველმოქმედება, სხვების დახმარება.
ბედნიერ იანვარს გისურვებთ!