გიგა ბოკერია - ეს გზა ცუდად შემოუბრუნდება ამ ხელისუფლებას და სახიფათოა ქვეყნისთვის

მიხეილ სააკაშვილი იყო დეკლარირებული ფიგურა, რომლის გარშემოც კერავენ საქმეებს და ახდენენ ფაბრიკაციას, –ამის შესახებ "ნაციონალური მოძრაობის" ერთ-ერთმა ლიდერმა, უშიშროების საბჭოს ყოფილმა მდივანმა გიგა ბოკერიამ განაცხადა. ბოკერიას თქმით, ხელისუფლება სახიფათო გზას ადგას.

"ის, რა ფორმითაც მოხდა მიხეილ სააკაშვილის დაბარება, ყველა საქმის უცებ ერთად წამოწევა და თარიღის გამოცხადება, არის იმის დემონსტრირება, რომ ჩვენთან რაღაც სავარაუდო დანაშაულის გამოძიება არ ხდება, რომელზეც, შემდეგ შეიძლება ფიგურა გამოიკვეთოს. არიან ფიგურები და სააკაშვილი იყო დეკლარირებული ფიგურა, რომლის გარშემოც კერავენ საქმეებს და ახდენენ საქმეების ფაბრიკაციას, შემდეგ დაკვეთას პროკურატურისადმი და ზეწოლას სასამართლოზე. ეს არის ძალიან სახიფათო გზა. ეს არის ის ნაბიჯები, რასაც იანუკოვიჩი დგამდა მშვიდობიან არჩევნებში გამარჯვების შემდეგ და ეს გზა ცუდად შემოუბრუნდება ამ ხელისუფლებას და ძალიან სახიფათოა ქვეყნისთვის", - განაცხადა გიგა ბოკერიამ საზოგადოებრივ მაუწყებელთან საუბრისას.

27 მარტს, 13:00 საათზე, საქართველოს მთავარ პროკურატურაში მოწმის სახით დასაკითხად დაბარებულია საქართველოს ყოფილი პრეზიდენტი მიხეილ სააკაშვილი.

"ინტერპრესნიუსი"