ბიულეტენებს რუსეთის მოქალაქეებიც ავსებენ - რა ხერხებს იყენებს პუტინი ყირიმის რეფერენდუმზე

დილის 08:00 საათიდან ყირიმის ნახევარკუნძულზე რეფერენდუმი მიმდინარეობს. მოსახლეობამ, რომელმაც ავტონომიური რესპუბლიკის სტატუსი უნდა გადაწყვიტოს, ბიულეტინში წრმოდგენილ ორ კითხვას უნდა გასცეს პასუხი: 1. მხარს უჭერთ თუ არა მხარს ყირიმის შეერთებას რუსეთთან, რუსეთის ფედერაციის სუბიექტად? 2. მხარს უჭერთ თუ არა ყირიმის რესპუბლიკის 1992 წლის კონსტიტუციის ამოქმედებას და ყირიმის, როგორც უკრაინის ნაწილის სტატუსს?

უკრაინის ხელისუფლება რეფერენდუმის შედეგებს არ აღიარებს, თუმცა ყირიმის რადას მიერ მიღებული დამოუკიდებლობის დეკლარაციის მიხედვით, თუ 16 მარტის რეფერენდუმში მოსახლეობა ავტონომიური რესპუბლიკის რუსეთთან შეერთებას მისცემს ხმას, ყირიმი დამოუკიდებელ და სუვერენულ სახელმწიფოდ გამოცხადდება.

"რეფერენდუმის შესაბამისი შედეგების შემთხვევაში, ყირიმის რესპუბლიკა, როგორც დამოუკიდებელი და სუვერენული სახელმწიფო, წინადადებით მიმართავს რუსეთის ფედერაციას, მიგვიღოს რუსეთის შემადგენლობაში რუსეთის ახალი სუბიექტის სახით", - ნათქვამია ყირიმის რადას მიერ მიღებულ დამოუკიდებლობის დეკლარაციაში.

როგორ მიმდინარეობს რეფერენდუმი და რა ხერხებს იყენებს რუსეთი სასურველი შედეგის  მისაღებად. ამის თაობაზე უკრაინული მედია რამდენიმე ინფორმაციას ავრცელებს.

ყირიმის რეფერენდუმში რუსეთის მოქალაქეებიც ჩართეს

ყირიმში ბიულეტენებს რუსეთის მოქალაქეებსაც ურიგებენ. "უკრაინსკაია პრავდას" ცნობით, ბიულეტენები ურიგდებათ იმ მოქალაქეებსაც, რომლებიც საარჩევნო სიებში არ არიან.

ერთ-ერთი თვითმხილველი ამბობს, რომ საარჩევნო უბანზე მისულ მოქალაქეებს, რომლებიც სიებში არ არიან, ადგილზე უქსეროქსებენ პასპორტებს, შეჰყავთ დამატებით სიებში და ხმის მიცემის უფლებას აძლევენ.

ამასთან, უკრაინული მედიის ცნობით, რეფერენდუმში ხმის მიცემისთვის დამზადებულია 1 მილიონ 550 ბიულეტინი.

გავრცელებული ინფორმაციით, უამინდობის გამო ზოგიერთ უბანზე გათიშულია სატელეფონო კავშირი, ბელგორსკის რაიონში კი ორ უბანზე ელექტროენერგია არ არის.

კაზაკების როლი

ვრცელდება ინფორმაცია, რომ კაზაკები ყირიმელებისგან რეფერენდუმში მონაწილეობას ითხოვენ. პრიმორსკის ოლქში, უკრაინის შეიარაღებული ძალების სახელმწიფო კვლევითი ცენტრის პირად შემადგენლობას კაზაკებმა სამხედრო ნაწილში შესვლის საშუალება არ მისცეს. უკრაინული მედიის ცნობით, კაზაკები უკრაინელი სამხედროებისგან საარჩევნო უბანზე მისვლასა და რეფერენდუმში მონაწილეობას მოითხოვენ.

ეს სწორედ ის სამხედრო ნაწილია, რომელმაც გუშინ უარი განაცხადა რეფერენდუმში მონაწილეობაზე.

მოსალოდნელი შედეგები

რეფერენდუმის ეგზიტპოლების შედეგები ადგილობრივი დროით 20:00 საათზე გახდება ცნობილი.

როგორც რუსული გამოცემა "კომერსანტი" წერს, ყირიმში ეგზიტპოლების ჩატარების უფლება მხოლოდ ერთ ორგანიზაციას - "სოციოლოგიური და პოლიტიკური კვლევების რესპუბლიკურ ინსტიტუტს" აქვს.

უკრაინული მედიის ცნობით, ყირიმში მიმდინარე რეფერენდუმზე ამ დროისთვის 1024 საარჩევნო უბანია გახსნილი. რეფერენდუმში ხმის მიცემისთვის დამზადებულია 1 მილიონ 550 ბიულეტინია გაცემული. ხმის მიცემა ადგილობრივი დროით 20:00 საათზე დასრულდება.

ამასთან, ყირიმის პირველი ვიცე-პრეიერის, რუსტამ ტემირგალიევის განცხადებით, რეფერენდუმის შედეგები მხოლოდ იმ შემთხვევაში გაბათილდება, თუ რეფერენდუმზე აქტივობა 50%-ზე ნაკლები იქნება.

რუსულ მედიაში გავრცელებული ინფორმაციით კი, ამ დროისთვის რეფერენდუმზე აქტივობა მაღალია და მოსახლეობის 10%-მა უკვე დააფიქსირა თავისი არჩევანი.

ამასთან, საარჩევნო კომისიის თავმჯდომარის, ვალერი მედვედევის ინფორმაციით, სევასტოპოლში 190 საარჩევნო უბანი მუშაობს. მისივე თქმით, სევასტოპოლში რეფერენდუმს 50-ზე მეტი დამკვირვებელი დააკვირდება, 15 ქვეყნიდან კი 200 ჟურნალისტია აკრედიტებული

ყირიმში მიმდინარე რეფერენდუმზე საარჩევნო უბნებზე უსაფრთხოებას 2400-ზე მეტი სამართალდამცავი დაიცავს.