31
მაისიდღის ზოგადი ასტროლოგიური პროგნოზი
საქართველოს მანსანკანის ("კავეენის") ნაკრები გუნდი მოსკოვში იმყოფება და პრემიერ ლიგაში, მერვედფინალურ შეხვედრაში ასპარეზობას აპირებს.
ამ ფაქტმა საზოგადოების უკმაყოფილება გამოიწვია, რადგანაც ისინი რუსეთის დედაქალაქს მძიმე პოლიტიკურ სიტუაციაში ეწვივნენ.
Ambebi.ge საქართველოს მანსანკანის ნაკრების ხელმძღვანელს, სოფო ბანძავას მოსკოვში დაუკავშირდა:
- სოფო, საქართველოს მანსანკანის ნაკრები გუნდი მოსკოვში იმყოფებით, - პრემიერ ლიგაში თამაშს აპირებთ. სასიამოვნოა, რომ თქვენი შესაძლებლობა, ნიჭი და უნარი იუმორის სფეროში საზღვრებს მიღმა გაგაქვთ, მაგრამ ალბათ, მოგეხსენებათ, რუსეთსა და საქართველოს შორის პოლიტიკურად როგორი დაძაბული სიტუაციაა. რამდენად გამართლებულია თქვენი ამ ეტაპზე მოსკოვში ჩასვლა?
- ჩვენ პოლიტიკაში არ ვერევით და "კავეენს" პოლიტიკა არ ეხება...
- გასაგებია, მაგრამ ჩადიხართ ქვეყანაში, რომელიც საქართველოს მიმართ არც ისე კარგად არის განწყობილი...
- ამ წუთში დაძაბული სიტუაციაა?.. ძალიან გთხოვთ, პოლიტიკაში ნუ გაგვრევთ. პოლიტიკურ განცხადებებს ვერ გავაკეთებ. მით უმეტეს, გითხარით, რომ "კავეენს" პოლიტიკა არ ეხება. უნდა ვითამაშოთ პრემიერ ლიგაში, მერვედფინალურ შეხვედრაში. ისევე როგორც რაგბის ვგულშემატკივრობთ ქართველი მაყურებელი, ასე უნდა გვიგულშემატკივრონ ჩვენც. ჩემი აზრით, არანაირი განსხვავება არ არის. თუ რაგბის თამაში შეიძლება რუსებთან, "კავეენის" თამაში რატომ არ შეიძლება?! მორაგბეებმა ჩვენს ტერიტორიაზე ითამაშეს და ამიტომ შეიძლებოდა და რუსეთში რომ ყოფილიყო მატჩი, საქართველოს ნაკრები არ უნდა ჩასულიყო და ეთამაშა? შესაბამისად, ახლა რუსეთის ტერიტორიაზე გვაქვს თამაში და აქ ტარდება და არა სხვაგან, თორემ იქ ჩავიდოდით...
- მართალია თუ არა, რომ თქენი გამგზავრება მოსკოვში, რუსეთში ქართველთა კავშირის პრეზიდენტმა მიხეილ ხუბუტიამ დააფინანსა?
- მერე რა პრობლემაა, რომ მიშა ხუბუტია აფინანსებს კიდევ ერთ კარგ საქმეს და ჩვენც დაგვაფინანსა? ქართველია და უნდა კარგი საქმის კეთება.
- რა მოლოდინი გაქვთ, როგორ წარსდგებით პრემიერ ლიგაში, გაიმარჯვებთ?
- წინასწარ ლაპარაკი არ მიყვარს, შედეგის მიხედვით ვიმსჯელებთ. ახლა მიმდინარეობს სამზადისი, თამაში 16 მარტს გვაქვს.
- რამდენკაციანი ჯგუფი ხართ წასული?
- 15, მეთხუთმეტე მე ვარ...
- ისე, პირადად თქვენ მაინცდამაინც არასდროს ჩანხართ, როდესაც საქართველოს "კავეენის" ნაკრებ გუნდზეა ლაპარაკი. არადა, წლებია, საქართველოს ნაკრები გუნდს ხელმძღვანელობთ...
- ჯერ კიდევ "თსუ"-ს პირველი გუნდი რომ იყო: გია ჭანტურია, ალეკო მალხაზიშვილი, დავით გოგიჩაიშვილი, ნიკა ქავთარაძე, ზურა გაჩეჩილაძე, გია ჭანტურია, ირაკლი კაკაბაძე, იქიდან მოყოლებული ამ გუნდის ხელმძღვანელი ვარ. მერე მეორე გუნდი შეიქმნა: ვანო ჯავახიშვილი, ირაკლი ვახტანგიშვილი, ნიკა გრიგოლია, მიშა ანდღულაძე და კიდევ ბევრი ცნობილი იუმორისტი იყო ჯგუფში, მათაც ვხელმძღვანელობდი. წარმატებულები იყვნენ ყველანი. ახლაც კარგი გუნდი გვყავს.მე საერთოდ, კულისებში ყოფნა მიყვარს. ბიჭები სცენაზე აგვარებენ საკითხებს, მე - კულისებში. მოკლედ, საორგანიზაციო საკითხებს მე ვხელმძღვანელობ. მწვრთნელები კიდევ ცალკე გვყავს. ისინი ჩვენი მეგობრები არიან და საკმაოდ გამოცდილი ადამიანები: ერთი - სამარიდან არის, ორი - მოსკოვიდან. ვცდილობთ, საქართველო ვასახელოთ და მოვიგოთ. საქართველოში კი არის განწყობა - რატომ წახვედითო. აუცილებლად, როგორც მორაგბეებმა, უნდა მოვუგოთ; მგონი, ჯობია. ვიმეორებ, პოლიტიკაში ნუ გაგვრევთ!
- ჰო, მაგრამ საზოგადოების მოსაზრებას გამოდის, რომ ეწინააღმდეგებით...
- საზოგადოება სხვანაირად არის პოლიტიკურად მოტივირებული. ცხადია, ვიღაცას არ მოეწონება ჩვენი აქ ყოფნა, უფრო მეტს კი დარწმუნებული ვარ, მოეწონება ჩვენი გამარჯვება.
- მოიგებთ?
- წინასწარ არ მინდა ლაპარაკი. მერე ვილაპარაკოთ...
ლალი ფაცია
სპეციალურად Ambebi.ge-სთვის
