3
აპრილიდღის ზოგადი ასტროლოგიური პროგნოზი
გადაცემა "პროფილის" ჩაწერამდე კიდევ ერთხელ დავუსვი კითხვა ჩემს თავს - რატომ აქვთ თუნდაც ჩემს მკითხველებს ამდენი აგრესია ერთმანეთის და განსაკუთრებით, ცნობილი ადამიანების მიმართ.
მაია ასათიანმა გადაწყვიტა, ამ პრობლემისთვის გადაცემა მიეძღვნა, მაგრამ "პროფილის" მსვლელობისას დავრწმუნდი, რომ ამ ყველაფრის მერე არაფერი შეიცვლება და მიუხედავად იმისა, რომ ძირითადად, ჟურნალისტებს გვაბრალებენ ამა თუ იმ თემის პროვოცირებას, აგრესიის მიზეზნი მაინც თავად "ცნობილი" ადამიანები არიან...
ქართველები, მოგეხსენებათ, არასოდეს არაფერს ვივიწყებთ - განსაკუთრებით, ის ადამიანები გვახსოვს, რომლებიც თავის დროზე ამა თუ იმ პარტიის გვერდით მოიაზრებოდნენ, ცხოვრებაში ერთხელ მაინც სკანდალური (რელიგიის ან ტრადიციის) საწინააღმდეგო განცხადება აქვთ გაკეთებული და ვინმეს ოჯახის დანგრევაში მიუძღვით წვლილი.
ხანდახან მათი რისხვა და ამოჩემება მართლაც ყველანაირ ზღვარს სცდება - მაგალითად, შორენა ბეგაშვილმა, ერთ დღესაც მონაზვნად აღკვეცა რომ გადაწყვიტოს, მას მაინც არასდროს დაუვიწყებენ წარსულს.
შესაძლოა, იმ ადამიანების ტოპ-ხუთეულიც გამოვავლინოთ, რომლებიც დღეისათვის ინტერნეტმომხმარებლის "სამიზნეები" არიან: თინა მახარაძე, ნინი ბადურაშვილი, შორენა ბეგაშვილი, ნინა წკრიალაშვილი, ია ფარულავა... დღეიდან მათ რიცხვს, სავარაუდოდ, გიორგი ნაზღაიძეც დაემატება, რადგან გუშინ მან "პროფილში" რამდენიმე მაპროვოცირებელი ფრაზა გააჟღერა - იმ ადამიანებს, ვინც მასზე ცუდ კომენტარებს წერს, ჯერ ვირთხები უწოდა, ხოლო შემდეგ სტალინი ინატრა, რომ ისინი დაეხვრიტა.
გადაცემის პარალელურად, "ფეისბუქზე" გიორგი ნაზღაიძის ირგვლივ აგრესიის ახალი ტალღა აგორდა.
- ვაიმე, ვიღაცამ თქვა "პროფილში", სტალინი კარგად იქცეოდა, ხალხს რომ ჩაამწკრივებდა და ხოცავდაო. და ეს მაგალითი მოიყვანა იმიტომ, რომ მასზე თურმე სოციალურ ქსელში მისთვის არასასურველ რაღაცეებს წერენ. და ისინიც ასე უნდა დახოცოო. ხოო!
- აუ, ხალხო, ხომ არ იცით, ვინაა ეს ნაზღაიძე? - მომღერალია, მოცეკვავეა? რა პროფესიისაა საერთოდ და რას აკეთებს, ასეთი ამაყი სახით რომ ზის გადაცემაში? თან ხალხს ვირთხებს ეძახის...
რაც შეეხება ნინა წკრიალაშვილს, ის თვლის, რომ ინტერნეტმომხმარებელს მხოლოდ იმიტომ აღიზიანებს, რომ მისნაირ ქალთან ურთიერთობას ვერასოდეს ეღირსება.
გადაცემის მსვლელობისას არავინ გაუღიზიანებია ანრი ჯოხაძეს - გაოცებულმა მომღერალმა თავად დაწერა "ფეისბუქზე" - ვერ ვუყურებ "პროფილს" და იმდენი კომპლიმენტი მივიღე, რომ ცოტა გაოგნებული ვარ, ნეტავ რა ვილაპარაკე ასეთი, ამხელა პოზიტივი რომ გამოვიწვიე ამ დიდი facebook-ური აგრესიის ფონზე? - ამის მიზეზი მხოლოდ ისაა, რომ ანრი იმ ადამიანთა რიცხვშია, ვისაც საუკეთესოდ შეუძლია თავისი ნაკლისა და წარუმატებლობის აღიარება... და კიდევ, იუმორის არაჩვეულებრივი გრძნობა აქვს.
ინტერნეტმომხმარებელი განსაკუთრებით ერთობა "ცნობილების" საჯარო ორთაბრძოლებზე. მათ დაუნდობელ ბრძოლას კი ასეთივე დაუნდობელი კომენტარებით პასუხობენ... ნინა წკრიალაშვილისა და სალომე გოგიაშვილის, შორენა ბეგაშვილისა და თიკო სადუნიშვილის საჯარო პაექრობასა და დაპირისპირებას, რომლებსაც ბოლოს სერიული სახე მიეცა, ვერ დაავიწყებთ ქართველ ხალხს. ეს კარგი არ არის; მე თუ მკითხავთ, ძალიან ცუდიცაა.
