რუსთავი-მარნეულის დამაკავშირებელი გზის მშენებლობა იწყება
პარლამენტის ვიცე-სპიკერი, რუსთავის მაჟორიტარი დეპუტატი ზვიად ძიძიგური, ქვემო ქართლის გუბერნატორი გიორგი მღებრიშვილი და რუსთავის მერი დავით ჯიქია რუსთავი-მარნეულის დამაკავშირებელი გზაზე მიმდინარე სამუშაოებს "საქგზამეცნიერების" წარმომადგენლებთან ერთად ადგილზე გაეცნენ.
რუსთავი-მარნეულის დამაკავშირებელი უმოკლესი გზის რეაბილიტაცია უმოკლეს დროში დაიწყება და წელსვე დასრულდება. სამუშაოებისათვის საჭირო თანხას რეგიონული განვითარებისა და ინფრასტრუქტურის სამინისტრო გამოყოფს.
აღნიშნული გზის მონაკვეთზე დღეს აზომვითი და საპროექტო სამუშაოები დასრულდა. როგორც ქვემო ქართლის გუბერნატორმა გიორგი მღებრიშვილმა განაცხადა, გზის ამ მონაკვეთის რეაბილიტაციას რეგიონისათვის ძალიან დიდი მნიშვნელობა აქვს.
"შეგვიძლია ვთქვათ, რომ ეს არის სტრატეგიული მნიშვნელობის პროექტი, კონკრეტულად ეს გზა რუსთავს მარნეულთან დააკავშირებს, მშენებლობის დასრულების შემდეგ კი ამ ორ ქალაქს შორის არსებული ტვირთბრუნვა გაიზრდება. ადგილობრივ მოსახლეობას ერთმანეთთან უპრობლემოდ და უმოკლესი გზით დაკავშირება შეეძლება", - განაცხადა გიორგი მღებრიშვილმა.
რუსთავის მერის დავით ჯიქიას განცხადებით, რუსთავი-მარნეულს შორის არსებული მანძილი ამ გზის რეაბილიტაციის შედეგად 34 კმ-ით შემცირდება.
"წლების წინ სწორედ ამ გზით ხდებოდა ტვირთბრუნვა რუსთავსა და მარნეულს შორის, ახლა კი ადგილობრივ მოსახლეობას ამის გაკეთება თბილისის გავლით უწევს. ამ გზის მშენებლობით, ბუნებრივია განიტვირთება თბილისი-რუსთავის მაგისტრალიც", - განაცხადა დავით ჯიქიამ.
ზვიად ძიძიგური აცხადებს, რომ რუსთავი-მარნეულის გზის მონაკვეთის მშენებლობის შედეგად რუსთავში სოფლის მეურნეობის პროდუქციის გადამამუშავებელი საწარმოების მშენებლობის პერსპექტივა ჩნდება.
"ეს გზა ძალიან მნიშვნელოვანი არტერიაა მთელი ქვემო ქართლისათვის და ვფიქრობ, რომ მას საკმაოდ სპეციფიკური მნიშვნელობაც აქვს. მშენებლობის დასრულების შემდეგ რუსთავი, როგორც სოფლის მეურნეობის პროდუქციის გამსაღებელი ქალაქი, ასევე მისი გადამუშავების თვალსაზრისითაც საინტერესო გახდება, ამაზე ჩვენ სოფლის მეურნეობის სამინისტროსთან უკვე გვქონდა საუბარი. ასე რომ რუსთავში სოფლის მეურნეობის საწარმოების გახსნასაც აზრი ეძლევა", - განაცხადა ზვიად ძიძიგურმა.
ქართველი ჟურნალისტის და ამერიკელი დიპლომატის ქორწილი ვაშინგტონში - "ძალიან ბედნიერები ვართ, რომ ვიპოვეთ ერთმანეთი"
უზენაესი სასამართლოს მოსამართლეობის ყოფილი კანდიდატი თამთა თოდაძეზე - "რა ბრიჯიტ ბარდო ესა მყავს, რა აბია ასეთი ნეტავ"
