23
მაისიდღის ზოგადი ასტროლოგიური პროგნოზი
ძველ თბილისში ე.წ. ხრუშჩოვკების დემონტაჟი იგეგმება. ამასთან დაკავშირებით საკრებულოსა და გაერთიანებული საემიროების ერთ-ერთ საინვესტიციო ჰოლდინგს შორის ურთიერთთანამშრომლობის მემორანდუმს მოეწერა ხელი.
დოკუმენტი ძველი თბილისის აღდგენის ფარგლებში ე.წ. ხრუშჩოვკების დემონტაჟს და მათ ნაცვლად ახალი საცხოვრებელი კორპუსების მშენებლობას ითვალისწინებს. მემორანდუმს ხელი საკრებულოს თავმჯდომარემ ირაკლი შიხიაშვილმა და საერთაშორისო სავაჭრო და საინვესტიცო ჰოლდინგის დამფუძნებელმა სალიმ უმაიდ საიფმა მოაწერეს.
მემორანდუმით ინვესტორი 600 მლნ დოლარის შემოტანას გეგმავს. პროექტი დაწყებამდე ფინანსთა სამინისტრომ უნდა დაამტკიცოს.
"მემორანდუმის საფუძველზე ორივე მხარე ვიღებთ მაქსიმალურ პასუხისმგებლობას, რომ ცენტრალური ხელისუფლების ფინანსთა სამინისტროს მიერ მხარდაჭერილი იქნეს ეს პროექტი და შესაბამისად, შემდგომში ხელი მოეწეროს იმ მუშა დოკუმენტს, სადაც იქნება პროექტის სრული აღწერილობა. ჩვენი სურვილია ეს მოქმედებები ზაფხულის შუა პერიოდისთვის უკვე კონკრეტულ ნაბიჯებში აისახოს",-განაცხადა შიხიაშვილმა.
სალიმ უმაიდ საიფის თქმით კი პროექტის მხარდაჭერის შემთხვევაში მისი განხორციელება ოთხ თვეში დაიწყება.
"ჩვენ ძველი შენობების დემონტაჟს ვაპირებთ. მალე დავასრულებთ შეთანხმებაზე მუშაობას. სამუშაოები კი დაახლოებით ოთხ თვეში დაიწყება. დარწმუნებული ვარ, ეს სასარგებლო საქმე იქნება თქვენთვის", - განაცხადა სალიმ უმაიდ საიფმა.
