23
ივნისიდღის ზოგადი ასტროლოგიური პროგნოზი
მართლმადიდებელ ეკლესიათა იერარქიაში საქართველო, სავარაუდოდ, რუსეთის შემდგომ, მე-6 ადგილს მოითხოვს, - ამის შესახებ "ინტერპრესნიუსს" ისტორიკოსმა, სერგო ვარდოსანიძემ განუცხადა.
მისივე თქმით, ყველა მართლმადიდებელ ეკლესიას თავისი ადგილი აქვს მინიჭებული. ავტოკეფალურ ეკლესიათა დიპტიხი ეკლესიათა სიძველეს და მის განსაკუთრებულობას უსვამს ხაზს.
ვარდოსანიძის განმარტებით, ამჟამად საქართველოს ავტოკეფალურ ეკლესიას დიპტიხში მე-6 ადგილი არაოფიციალურად უკავია. ზოგიერთი ეკლესია ამას აღიარებს, თუმცა კონსტანტინეპოლის საპატრიარქო მიიჩნევს, რომ ქართული ეკლესია დიპტიხში მე-8 ადგილზეა.
ისტორიკოსმა სერგო ვარდოსანიძემ ასევე განაცხადა, რომ საქართველოს ავტოკეფალური ეკლესია მე-5 საუკუნიდან აქვს. 1254 წელს რომის ეკლესიის გაყოფის შემდეგ საქართველოს ეკლესიას დიპტიხში მე-5 ადგილი ეკავა. ეკლესიათა იერარქიით მასზე წინ ანტიოქია, ალექსანდრია, იერუსალიმი და კონსტანტინეპოლი იყო. მისივე თქმით, მე-16 საუკუნეში რუსეთის ეკლესიის მიერ ავტოკეფალიის მოპოვების შემდეგ, საქართველოს ეკლესიის კუთვნილი მე-5 ადგილი რუსეთის ეკლესიამ დაიკავა.
"ამ დროს უკვე რუსეთის ცენტრალიზებული სახელმწიფო იქმნება, ქართული სახელმწიფო კი პირიქით - სუსტდება. საქართველო გამუდმებით ირან-ოსმალეთის აგრესიის პირობებში იმყოფებოდა და სახელმწიფოს არ შეეძლო, ეკლესიისთვის პოლიტიკური მხარდაჭერა გაეწია. რუსეთის ეკლესიამ კი მოახერხა, რომ კონსტანტინეპოლის საპატრიარქოსგან გამოითხოვა წერილობითი დასტური და მე-5 ადგილი დაიკავა. შემდეგ ეს საკითხი განსახილველად კარგა ხანს აღარ დამდგარა. მე-19 საუკუნეში საქართველოს ეკლესიამ ავტოკეფალია საერთოდ დაკარგა. 1917 წელს, როდესაც აღდგა საქართველოს ეკლესიის ავტოკეფალია, აღიარების პროცესი ძალიან რთული იყო. რუსეთის ეკლესიამ ჩვენი ავტოკეფალია მხოლოდ 1943 წელს და თანაც მეექვსე ადგილზე აღიარა. რაც შეეხება კონსტანტინეპოლის საპატრიარქოს, ჩვენი ისტორიული ავტოკეფალია 1990 წლის 4 მარტს აღიარა", _ დასძინა ვარდოსანიძემ.
მისივე თქმით, დიპტიხში საქართველოს მართლმდიდებელი ეკლესიის ადგილი დღემდე სადავო და გადაუჭრელია. სწორედ ამიტომ, კათოლიკოს-პატრიარქმა 6 მარტს სტამბოლში, კონსტანტინეპოლის მსოფლიო საპატრიარქოში გამართულ პანორთოდოქსული შეკრების მონაწილეებს ამ საკითხითაც მიმართა.
სერგო ვარდოსანიძემ აღნიშნა, რომ მსოფლიო კრება 2016 წელს გაიმართება და მასზე შესაძლოა ისეთ საკითხები განიხილონ, როგორიც არის: ეროვნულ საზღვრებს გარეთ არსებული მართლმადიდებლური გაერთიანებების იურისდიქციის განსაზღვრა; საეკლესიო ავტოკეფალიის სტატუსის აღიარების პროცედურა; საეკლესიო ავტონომიის სტატუსის აღიარების პროცედურა; დიპტიხი; დღესასწაულების საერთო კალენდრის საკითხი; კავშირი სხვა ქრისტიანულ ეკლესიებთან, ეკუმენისტური მოძრაობა და სხვა.
რაც შეეხება საქართველოს პატრიარქის განცხადებას, პატრიარქმა სტამბოლში, პანორთოდოქსულ შეკრებაზე განახცადა: "ფრიად ვწუხვართ იმის გამო, რომ საქართველოს მართლმადიდებელ ეკლესიას ჯერ კიდევ თავისი კუთვნილი ადგილი არ უკავია კონსტანტინოპოლის ეკლესიის დიპტიქში. თუ ეს არ გამოსწორდება და თუ ყველა თემა არ იქნება შეტანილი მომავალი კრების განსახილველ საკითხთა დღის წესრიგში, ჩვენთვის მასში მონაწილეობის მიღება ძალიან რთული იქნება".
