17
ივნისიდღის ზოგადი ასტროლოგიური პროგნოზი
ხულოს რაიონის ხუთი სოფლის - ღურტას, დიდაჭარის, გელაძეების, დიაკონიძეების და პაქსაძეების მოსახლეობა, რომლებიც ჰესის მშენებლობას აპროტესტებს, არ გამორიცხავს, რომ სკოლებში სასწავლო პროცესი შეაჩერონ.
როგორც დიდაჭარის მცხოვრებმა რევაზ გობაძემ "ინტერპრესნიუსს" განუცხადა, გუშინ დაძაბული ვითარება იყო იმ ტერიტორიაზე, სადაც ჰესისთვის გვირაბის მშენებლობა უნდა განხორციელდეს. მისივე თქმით, ენერგეტიკის მინისტრის მოადგილე ილია ელოშვილი მათ ძალისმიერი მეთოდებით ესაუბრებოდა და ამბობდა, რომ პირველ რიგში სახელმწიფოს ინტერესები უნდა იყოს გათვალისწინებული და შემდეგ მოსახლეობა უნდა დაკმაყოფილდეს.
როგორც რევაზ გობაძემ განმარტა, თუკი გვირაბის მშენებლობის საკითხზე სახელმწიფო მოსახლეობის ინტერესებს არ გაითვალისწინებს, 5 სოფლის სკოლა მუშაობას შეაჩერებს და აქციის მონაწილეთა რიცხვი გაიზრდება.
როგორც დიაკონიძეების მკვიდრმა, ამირან სოლომონიძემ განაცხადა, გუშინ ძალოვანი სტრუქტურის წარმომადგენლები ყოველგვარ ზღვარს გადავიდნენ და მოსახლეობის, მათ შორის ქალების მიმართ გამოიყენეს ძალისმიერი მეთოდები. მისივე თქმით, ქალები, რომლებიც საპროტესტო აქციაზე იყვნენ მისულები, სარვამარტო საჩუქარი გაუკეთეს და დაარბიეს. მისივე ინფორმაციით, რამდენიმე ქალს დაზიანებები აქვს ხელების და მუხლის არეში.
გუშინ ხულოს მუნიციპალიტეტის სოფელ ღურტას მოსახლეობა მთავრობის წარმომადგენლებს დაუპირისპირდა. სოფლის მოსახლეობა აჭარის მთავრობის თავმჯდომარე არჩილ ხაბაძეს, ენერგეტიკის მინისტრის მოადგილე ილია ელოშვილს და გარემოს დაცვის თანამშრომლებს იმ ტერიტორიის დათვალიერების საშუალებას არ აძლევდნენ, სადაც ჰესის მშენებლობა უნდა დაიწყოს. საპარტულო პოლიციის ჩარევის შედეგად გზა გახსნეს და მთავრობის წევრებს ჰესის ტერიტორიაზე შესვლის საშუალება მიეცათ.
სოფელ ღურტაში მომხდარი დაპირისპირების ფაქტზე სისხლის სამართლის საქმე აღიძრა.
