კულტურულ ბრენდად ქცეული ეროვნული ბიბლიოთეკა - გიორგი კეკელიძე ბოლო 2 წლის მიღწევებსა და პროექტებზე

საქართველოს პარლამენტის ეროვნული ბიბლიოთეკის დირექტორი გიორგი კეკელიძე "ფეისბუქის" პირად გვერდზე ბოლო ორი წლის განმავლობაში განხორციელებული პროექტების, მიღწევებისა და სამომავლო გეგმების შესახებ წერს.

"მოკლედ, გავიდა 2 წელი ჩემი ბიბლიოთეკაში მუშაობიდან და მიხედვით იმისა, რომ გრძელ ტექსტებს დღეს ძალიან ცოტა კითხულობს, შევეცადე, შედარებით მოკლედ ჩაგაბაროთ ანგარიში და მოხარული ვიქნები, მოვისმინო თქვენი აზრიც. უამრავი სირთულის, სტრესული და გარდამავალი (პოლიტიკურადაც) სიტუაციების ფონზე, ბიბლიოთეკის თითოეული თანამშრომლისა და თქვენი, მკითხველების დახმარებით, შევძელით, რომ ბიბლიოთეკა დღეს უამრავ პროექტშია ჩართული. ვფიქრობ, ჩვენი ქვეყნის მასშტაბით ის უკვე კულტრულ ბრენდად იქცა. აქვს რამდენიმე ტელეპროექტი, რომელსაც ჩვენი ინიციატივების პოპულარიზაციისთვის ვიყენებთ. დაიწყო აქტიური დიგიტალიზაცია - გაციფრებულია ათასობით ბეჭდური, ვიზუალური და აუდიომასალა. დაიძრა მნიშვნელოვანი ინიციატივები (ციფრული ბიბლიოთეკა "ივერიელი", ინტერნეტტელევიზია და ა.შ.), ბოლო წლების მანძილზე ბიბლიოთეკას ყველაზე მეტი ბეჭდური წიგნი შეემატა. გაიხსნა სხვადასხვა ახალი დარბაზი. დავაარსეთ ემიგრაციის, რეპრესირებული წიგნის და ორი ელექტრონული - ლიბერთი და ქართველოლოგის დარბაზები, რაც კერძო ბიზნესის ხელშეწყობით მოხერხდა. კერძო ბიზნესის დახმარებითვე ვქმნით ემიგრაციის დარბაზს და საბავშვო ოთახს, ვარემონტებთ წერა-კითხვის გამავრცელებელთა ოთახს, ვიწყებთ დიდი ფოტო-მატიანეს შექმნას. ფრანკფურტის უნივერსიტეტთან ერთად გავხსენით ქართული ენის კორპუსის კაბინეტი, რაც მართლაც ფუნდამენტური საქმეა.

საზღვარგარეთ ვხსნით მცირე ქართულ ბიბლიოთეკებს - კიევში, ვენაში, სტამბოლში, პრატოში, ბაქოში, პრეტორიაში, მიუნხენში. მალე ნიცაში, ბარსელონაში, ათენში, ბარიში და კალაბრიაში გაიხსნება. დავიწყეთ აქცია, რომლის ფარგლებში ათასობით წიგნით და ასევე კომპიუტერებით დავეხმარეთ რაიონულ და სოფლის ბიბლიოთეკებს. ბიბლიოთეკამ მოიპოვა არაერთი უმნიშვნელოვანესი ემიგრანტული ან საქართველოსთან დაკავშირებული არქივი - ბეჭდური თუ ელექტრონული სახით, მათ შორის ამერიკიდან, არგენტინიდან და ევროპიდან. ბევრი უცხოური ცენტრი უფასოდ ასწავლის ბიბლიოთეკარებს ენას, ბიბლიოთეკის შენობები (დამატებით ავლაბრის არალეგალური სტამბა, სადაც ორი მუზემის - საბჭოთა კვლევის და წიგნის ტექნოლოგიური გახნსას ვგეგმავთ) ბიბლიოთეკას გადმოეცა, მანამდე ეკონომიკის სამინისტროს ბალანსზე იყო.

ჩვენი ინიცატივით, ყოველთვიურად თითო შეზღუდული შესაძლებლობის პირი ჩვენთან ასრულებს ანაზღაურებად სამუშაოს. შეიქმნა ელექტრონული განვითარების სინდიკატი, რომელიც წიგნებით და კომპიუტერებით ეხმარება სოფლის ბიბლიოთეკებს. დავიწყეთ საჯარო ლექციები და დებატები. გამოიცა ეროვნული ბიბლიოთეკის სამეცნიერო-პოპულარული ჟურნალი და არაერთი სასაჩუქრე წიგნი. განახლდა ბიბლიოთეკის საიტი. მალე შევიძენთ ერთიან საბიბლიოთეკო პროგრამასაც, რომელიც ყველა განვითარებულ ქვეყანას აქვს. 2014 წლიდან ჩვენი წარდგენილი პროექტის მიხედვით მოიმატა ხელფასებმა. ამ დღეებში ალბათ დასრულდება მუშაობა და ეროვნული ბიბლიოთეკა საქართველოში, თბილისს გარეთაც წარმოდგება ახალი ფუქნციით. უახლოეს მომავალში გავაკეთებთ შესაბამის დარბაზს შეზღუდული შესაძლებლობების პირებისთვის. მთავარი მიზანი ახლა პირველი კორპუსის რესტავრაციის თანხების მოპოვა და დიგიტალიზაციის პროცესის გაათმაგებაა. კიდევ რამდენიმე პროექტი მაქვს და მათი შესრულების შემდეგ, მშვიდად ჩაგაბარებთ საბოლოო ანგარიშს და ჩემს გზას ვეწევი. კიდევ ერთხელ დიდი მადლობა მხარდაჭერისთვის!", - წერს ბიბლიოთეკის დირექტორი.

პოეტი და ესეისტი გიორგი კეკელიძე ეროვნული ბიბლიოთეკის გენერალური დირექტორის თანამდებობაზე 2012 წელს დაინიშნა. იგი 27 წლის ასაკში, საქართველოს ეროვნული ბიბლიოთეკის ყველა დროის ყველაზე ახალგაზრდა ხელმძღვანელი გახდა.