26
მარტიდღის ზოგადი ასტროლოგიური პროგნოზი
გავლენიანი კონსალტინგური კომპანია "მერკერის" რეიტინგში, თბილისი ცხოვრების დონით, ბოლო სამი წელია, ევროპის ქალაქებს შორის ბოლო, 191-ე ადგილზეა. თბილისს წინ უსწრებენ მინსკი 189-ე, ერევანი 180-ე და სანკტ-პეტერბურგი 168-ე ადგილებით. რეიტინგში პირველ ადგილს ავსტრიის დედაქალაქი ვენა იკავებს.
მიუხედავად არასასურველი რეიტინგისა, კვლევის ავტორები აღნიშნავენ, რომ თბილისი ცხოვრების დონის გაუჯობესებას, ძირითადად სამომხმარებლო სიკეთესთან წვდომის, ინფრასტრუქტურის განვითარებით და შიდა სტაბილურობის გაზრდით აგრძელებს.
"მერკერის" ცხოვრების დონის ინდექსი 39 ინდიკატორის მიხედვით დგება. კრიტერიუმებს შორისაა: პოლიტიკური, სოციალური და ეკონომიკური მდგომარეობა, ჯანდაცვა, განათლება, რეკრეაცია და გარემოს დაცვა.
"მერკერის" კვლევის შედეგების შესაფასებლად "რეზონანსი" ქალაქ თბილისის მერიას დაუკავშირდა, თუმცა პრესსამსახურის წარმომადგენელმა განაცხადა, რომ ბოლო დროს უამრავი მსგავსი ტიპის კვლევა ტარდება და მერია ყველა მათგანზე შეფასებას ვერ გააკეთებს.
ეკონომიკის ექსპერტი ირაკლი ლექვინაძე კი კვლევის შედეგებს რეალობასთან შესაბამისობად აფასებს და ამბობს, რომ იმ კრიტერიუმების მიხედვით, რითაც კვლევა ჩატარდა, თბილისში უამრავი მოუგვარებელი პრობლემაა.
"ქალაქების ცხოვრების დონე და ხარისხი ამ კვლევაში 39 კრიტერიუმით არის შეფასებული. პოლიტიკური, სოციალური და ეკონომიკური მაჩვენებლის გარდა, არის ისეთი საკითხები, რომელიც ადამიანის ცხოვრების ხარისხზე ახდენს გავლენას. ეს არის განათლების, ჯანდაცვის, გარემოს დაცვის ხარისხი, ქალაქის ინფრასტრუქტურული მოწყობა და ა.შ. ამ პარამეტრების ერთობლიობა იძლევა იმ შედეგს, რომელიც მივიღეთ.
"გარკვეული შეკითხვები ამ მეთოდოლოგიასთან და პოზიციებთან შეიძლება არსებობდეს, მაგრამ პოსტსაბჭოთა ქალაქების მაჩვენებლები პრინციპში რეალობას ასახავს. სამწუხაროა, რომ ბოლო ადგილზე ვართ და ერევანიც კი გვისწრებს, თუმცა 2-3 ადგილით წინ და უკან ყოფნას განსაკუთრებული მნიშვნელობა არ ენიჭება.
"თბილისში გარემოს დაცვითი, ჰაერის დაბინძურების, დაგეგმარების, ინფრასტრუქტურული სახის პრობლემები არსებობს, რამაც რეიტინგზე თავისი გავლენა იქონია. თბილისს ყველაზე კარგი მაჩვენებელი და წინსვლა აქვს იმაში, რაშიც მთლიანად ქვეყანას, ეს არის ბიზნესისთვის ხელსაყრელი გარემო, ტექნიკური პროცედურების სიმარტივე, საინვესტიციოდ ხელსაყრელი პირობები და ა.შ. მაგრამ ისეთი ურბანული ფაქტორები, როგორიცაა, შემოსავალი ერთ სულ მოსხალეზე, დასაქმების მაჩვენებელი, გარემოსდაცვითი, ეკოლოგიური მაჩვენებელი, ჯანდაცვა თუ ა.შ. ამ პარამეტრებით დიდი წინსვლა არ გვაქვს", - განაცხადა "რეზონანსთან" საუბრისას ლექვინაძემ.
თათია ჩაფიჩაძე
