გიგი უგულავა - დღეს ყველაფერს მართავს ერთი ადამიანი

ერთმა პარტიამ არ უნდა მართოს ყველაფერი, მაგრამ დღეს ყველაფერს მართავს ერთი ადამიანი, - ამის შესახებ "ნაციონალური მოძრაობის" თბილისის ორგანიზაციის ყრილობაზე ორგანიზაციის ხელმძღვანელად არჩეულმა გიგი უგულავამ განაცხადა.

"ჩვენ ხშირად გვაკრიტიკებდნენ სიძლიერისთვის, რომ ყველა არჩევნებში ვიმარჯვებდით. კრიტიკა სამართლიანია – ერთმა პარტიამ არ უნდა მართოს ყველაფერი, მაგრამ დღეს ყველაფერს მართავს ერთი ადამიანი. ადამიანი, რომელიც გაექცა პასუხისმგებლობას და შეინარჩუნა ძალაუფლება, ახლა კი მარიონეტების ჩასმას აპირებს მერებად და საკრებულოების თავმჯდომარეებად", - განაცხადა გიგი უგულავამ.

მან ყრილობაზე სიტყვით გამოსვლისას, სოლიდარობა გამოუცხადა ყოფილი ხელისუფლების დაკავებულ და ძებნილ პირებს, მათ შორის ვანო მერაბიშვილს და ბაჩო ახალაიას.

"მინდა სოლიდარობა გამოვუცხადო ყველა ჩვენს მეგობარს, მათ ვინც ივანიშვილის ხელისუფლებამ პოლიტიკურ პატიმრად აქცია. მივესალმები ჩვენი პარტიის გენერალურ მდივანს, თავდაცვის ყოფილ მინისტრს ბაჩო ახალაიას, ჩვენი მთავრობის სხვა წევრებს, რომლებიც პოლიტიკურ დევნაში იმყოფებიან. განსაკუთრებით მინდა გამოვყო ის ადამიანები, ვინც დღეს კენჭს იყრიან საბჭოში და სასამართლოში უწევთ ყოფნა", - განაცხადა უგულავამ.

მისი თქმით, მოახლოებული თვითმმართველობის არჩევნები განსაკუთრებული მნიშვნელობის არჩევნებია.

"წარმოუდგენელია ამ ბრძოლაში დამარცხება. ჩვენ ერთად ავამუშავებთ საქართველოს. ადვილი არ იყო, უგზოობის, უშუქობის, ქურდული სამყაროს დამარცხება და რუსული აგრესიის პირისპირ ყოფნა, მაგრამ ჩვენ ყოველთვის დაუღალავად ვიბრძოდით. ახლაც ვიბრძვით პოლიტიკური დევნის წინააღმდეგ, რომელსაც ხელისუფლება საკუთარი უსაქმურობისა და უუნარობის გამო აკეთებს. ამ ყველაფერზე ჩვენი პასუხია უფრო მაგარი ბრძოლა, უფრო მეტი სიმყარე და უფრო მეტი რწმენა გამარჯვების. პოლიტიკურ ბრძოლაში ნებისმიერი არჩევნები გარდამტეხი მომენტია ყოველთვის. არ არსებობს უმნიშვნელო არჩევნები, მაგრამ ჩვენ, წინ მართლაც განსაკუთრებული მნიშვნელობის არჩევნები გველის. 2013 წელს, საქართველოს ხელისუფლების სურვილი ჩვენი პოლიტიკური ძალა გაენადგურებინა, ვერ განხორციელდა. ჩვენ მივიღეთ ყოველი მეოთხე ხმა და მთავარი ოპოზიციური გუნდის მთავარი დამსახურებული ადგილი დავიმკვიდრეთ. მომავალ არჩევნებზე ჩვენ უნდა დავამტკიცოთ, რომ არა მხოლოდ მთავარი ოპოზიცია ვართ, არამედ უნდა ვიბრძოლოთ გამარჯვებისთვის და მხოლოდ გამარჯვებისთვის, როგორც თბილისში ასევე მთელ საქართველოში", - განაცხადა უგულავამ.

"ინტერპრესნიუსი"