"ნაციონალური მოძრაობა" თბილისში მდებარე პარლამენტის შენობის სამუშაო კაბინეტებში არ შევა

"ნაციონალური მოძრაობა" პარლამენტის კომიტეტის სხდომების თბილისში განახლების შემთხვევაში მასში მონაწილეობას მიიღებს, მაგრამ რუსთაველის #8-ის სამუშაო კაბინეტებში არ შევა.

უმცირესობის ერთ-ერთმა ლიდერმა მიხეილ მაჭავარიანმა "ინტერპრესნიუსს" "ათასი პროცენტით" განუცხადა, რომ თბილისში მდებარე პარლამენტის შენობის კაბინეტებს "ნაციონალური მოძრაობის" წევრები არ გამოიყენებენ. ამასთან, მისივე ცნობით, აღნიშნულ თემაზე პარლამენტის თავმჯდომარეს მათთან არ უსაუბრია და საპარლამენტო საქმიანობის თბილისში განახლების თემაზე არანაირი მსჯელობა არ გამართულა.

პარლამენტის ადგილმდებარეობასთან დაკავშირებით "ნაციონალური მოძრაობა" პოზიციის შეცვლას არ აპირებს.

"არ მესმის, ვერ მუშაობს პარლამენტი ქუთაისში?! შენობა არ არის?! პირობები არ არის?! ბევრი ილაპარაკეს, მაგრამ აღმოჩნდა, რომ წელიწადი და სამი თვეა, პარლამენტი ქუთაისში ნორმალურად მუშაობს. რაიმე შეფერხება ყოფილა?! რაიმე კანონი ვერ მიგვიღია?! გრავიტაცია დარღვეულა ქუთაისში?! რა ახირებაა ახლა ეს! ფულის ხარჯვაზე ჩვენ გვედავებიან და თბილისში, პარლამენტის შენობისათვის უკვე დახარჯულია რამდენიმე მილიონი ლარი. ვინმემ ამიხსნას, რად უნდა პარლამენტის წევრს ორი კაბინეტი? - ესე იგი, ცალკე კაბინეტი ექნებათ თბილისში და ცალკე - ქუთაისში და რა საჭიროა ეს ფუფუნება?! პარლამენტი იქნება ქუთაისში და ეს გადაწყვეტილება ჩვენთვის არ შეიცვლება! ამ თემაზე ჩვენ არ ვვაჭრობთ! როდესაც დავით ბაქრაძემ გიორგი მარგველაშვილს მოუწოდა, რომ პრეზიდენტის სასახლეში შევიდეს, მან ეს იმიტომ თქვა, რომ პრეზიდენტის სასახლე უკვე ქვეყნის სიმბოლოა. მაშინ ამ ლოგიკით, მიხეილ სააკაშვილის დაგებულია გზები და ნუ დადიან ამ გზებზე. სააკაშვილის დროს არის აშენებული და ნუ შედიან იუსტიციის სახლში, შინაგან საქმეთა სამინისტროში, იუსტიციის სამინისტროში. ნუღარ შევლენ პოლიციის შენობებში, სასამართლოებში, რომელიც ყველგან აღდგენილი და გარემონტებულია. ნუ მიდიან და ნუღარ ქეიფობენ პიაცაზე, რომ აღარ იციან ზაფხულში როგორ მოიწონონ თავი სტუმრებთან. რაც შეეხება პარლამენტის კომიტეტის სხდომების თბილისში ჩატარებას, თუ ასეთი გადაწყვეტილება იქნება მიღებული და თავს კომფორტს უქმნიან, ჩვენ კომიტეტის სხდომებს დავესწრებით წალენჯიხაშიც, ჩხოროწყუშიც, ფოთშიც, თელავშიც და თბილისშიც. ჩვენ უმრავლესობას საშუალებას არ მივცემთ, რომ კომიტეტის სხდომებზე მარტო დარჩნენ და გადაწყვეტილებები მარტო მიიღონ. რაც შეეხება სამუშაო კაბინეტს - მე, მიხეილ მაჭავარიანს, მანდ სამუშაო კაბინეტი არ მექნება! რათ უნდათ დეპუტატებს ორი კაბინეტი?! მიმაჩნია, რომ დღეს ქვეყანას არა აქვს იმის ფუფუნება, რომ დეპუტატებს ჰქონდეთ ორ-ორი კაბინეტი, ორ-ორი ოფისი, ავეჯის ორ-ორი კომპლექტი ქუთაისში და თბილისში და შემდეგ შეიძლება ვინმეს ეს ბათუმშიც მოუნდეს. მილიონიანი გარღვევის მქონე ხელისუფლება რესურსს ამაში არ უნდა ხარჯავდეს და სხვა საფიქრალი უნდა ჰქონდეს", - განუცხადა "ინტერპრესნიუსს" მაჭავარინმა.

"ნაციონალური მოძრაობის" ლიდერი ირწმუნება, რომ პარლამენტის ქუთაისში ყოფნით ამომრჩევლებს დეპუტატებთან შეხვედრის მხრივ პრობლემა არა აქვთ და სურვილის შემთხვევაში, შეუძლიათ, მაჟორიტარი დეპუტატი მაჟორიტარის ბიუროში ნახონ, დეპუტატებს სასესიო პერიოდში - ქუთაისში, ხოლო არასასესიო დღეებში პარტიულ ოფისებში შეხვდნენ.

წელიწადზე მეტია, რაც რუსთაველის გამზირზე მდებარე პარლამენტის შენობაში აღდგენითი სარემონტო სამუშაოები მიმდინარეობს. "ნაციონალური მოძრაობის" ხელისუფლებაში ყოფნისას მათი ერთ-ერთი ბოლო გადაწყვეტილება, პარლამენტის შენობაში არსებული ყველა დარბაზის დაშლა-დემონტაჟი იყო. ამასთან, კონსტიტუციაში რჩება ჩანაწერი, რომელიც ადგენს, რომ პარლამენტის ადგილმდებარეობა ქალაქი ქუთაისია. საკანონმდებლო ორგანოს დედაქალაქში დაბრუნების საკითხზე უმრავლესობასა და უმცირესობას შორის კონსენსუსის ვერმიღწევის პირობებში, მმართველ გუნდს დაგეგმილი აქვს, რომ საკომიტეტო სხდომები, შეხვედრები და სხვა საპარლამენტო საქმიანობა თბილისში წარმართოს, ქუთაისში კი პლენარული სხდომები ჩატარდეს, ანუ კანონები ქუთაისში მიიღონ.

წინასწარი ინფორმაციით, პარლამენტის ქუთაისიდან თბილისში ნაწილობრივი დაბრუნება, დაახლოებით თვენახევარში მოხდება.

"ინტერპრესნიუსი"