დავით ნარმანია თვითმმართველობის არჩევნებში მეორე ტურის ალბათობას გამორიცხავს

საქართველოს რეგიონული განვითარებისა და ინფრასტრუქტურის მინისტრი, "ქართული ოცნების" მერობის კანდიდატი დავით ნარმანია თვითმმართველობის არჩევნებში მეორე ტურის ალბათობას გამორიცხავს.

როგორც დავით ნარმანიამ ჟურნალისტებთან დღეს განაცხადა, კოალიცია "ქართული ოცნება" ყველგან მზად არის 50%-იანი ბარიერის გადასალახად.

"ჩვენი პოლიტიკური ძალა ყველგან მზად არის 50%-იანი ბარიერის გადასალახად. პრობლემა არც ადრე არსებობდა, უბრალოდ სჭირდებოდა გარკვეული პოლიტიკური განხილვები ამ საკითხს და შესაბამისი კონსესუსის მიღწევა. მიღწეულია კონსენსუსი და გადაწყვეტილება მიღებულია და დემოკრატიული არჩევნების წინაშე ვდგებით. არ არსებობდა არსად ბარიერი, გარდა დედაქალაქისა და ახლა ყველგან იარსებებს, დედაქალაქში იყო 30%-იანი და იქნება 50%-იანი, რაც, ერთის მხრივ, მნიშვნელოვანი გამოწვევაა, მეორეს მხრივ, უაღრესად აქტუალური საკითხია, რამდენადაც პოლიტიკური ძალები უფრო მეტად მობილიზებული უნდა იყვნენ ამისთვის", - განაცხადა დავით ნარმანიამ და დასძინა, რომ "არანაირი მეორე ტური არ იქნება".

"ინტერპრესნიუსი"