"ნეპოტიზმით მურმან დუმბაძემ ყველას და ყველაფერს გადააჭარბა"

აჭარაში უსახლკაროები - სახლებს, უშუქოდ დარჩენილები - ელექტროენერგიას და ისინი, ვისაც მოსავალი გაუფუჭდა, შესაბამის კომპენსაციას ითხოვენ. უფლებადამცველ თამაზ ბაკურიძის განცხადებით, სოციალური გარემო მძიმეა და ხალხს დღევანდელი ხელისუფლების იმედი არ აქვს. მიუხედავად ამისა, რეგიონში პოლიტიკური ბრძოლაა გაჩარებული.

"საერთოდ, აჭარაში ყველა ძალოვან უწყებაში მოწვეული კადრები ინიშნებიან და არა - ადგილობრივები, მაგალითად: აჭარის შს და უშიშროების მინისტრები, საბაჟოს უფროსი ჩამოსული არიან თბილისიდან, ასევე კონტროლის პალატის უფროსი. ხელვაჩაურისა და ქობულეთის რაიონშიც კი მოწვეული კადრები არიან დანიშნული. ჩვენ ეს ძალიან გვაწუხებს. როგორც იქნა, ვალერი თელია გადააყენეს და მის ნაცვლად დაინიშნა ქობულეთელი დავით თამაზაშვილი", - აცხადებს ბაკურიძე.

- ბათუმის მერი გადააყენეს, ვინ არის ახლა მერობის კანდიდატი?

-ბათუმის მერობის კანდიდატი - გიორგი ერმაკოვი, ადრე "ნაციონალი" იყო, ახლა "ოცნებაში" გადაბარგდა, ისე ბათუმში არავინ არ იცნობს. არა მგონია, მას ბათუმელებმა მხარი დაუჭირონ, არ ვიცი, ხელისუფლებას რაზე აქვს გათვლა და რაზე გააკეთეს არჩევანი.

- მურმან დუმბაძის შესახებ რას ამბობენ ბათუმში?

- მურმან დუმბაძის რეიტინგი ბათუმში დაეცა, ის უკვე არაფერს წარმოდგენს. ბიძინა ივანიშვილის დახმარებით ბათუმის მაჟორიტარი გახდა, მას ბათუმისათვის არაფერი გაუკეთებია და მისი ხმაც არ გაგვიგონია, ახლა მას უფრო მაღალი ტრიბუნა აქვს ამისათვის, ვიდრე ოპოზიციაში ყოფნის დროს. ბათუმს მურმან დუმბაძის ხელი არ უგრძვნია, გარდა იმისა, რომ თითქმის ყველა სტრუქტურაში მურმან დუმბაძის ახლობელი დაინიშნა. ნეპოტიზმით მურმან დუმბაძემ ყველას და ყველაფერს გადააჭარბა.

იხილეთ ვრცლად

"P.S." (პოსტსკრიპტუმი - ქუთაისი)