პაატა იმნაძე - სამტრედიის სათნოების სახლის ხუთ ბენეფიციარს A ტიპის ვირუსი დაუდასტურდა

სამტრედიის სათნოების სახლის ხუთ ბენეფიციარს A ტიპის H3N2 ვირუსი დაუდასტურდა. ამის შესახებ დაავადებათა კონტროლის ეროვნული ცენტრის სამეცნიერო საბჭოს ხელმღვანელმა პაატა იმნაძემ დღეს გამართულ კონფერენციაზე განაცხადა.

მისივე ინფორმაციით, იგივე ვირუსი დაუდასტურდა ასევე სათნოების სახლის ერთ თანამშრომელს, სამ ბენეფიციარს სურდოს ვირუსი დაუდგინდა. პაატა იმნაძის ინფორმაციით, მოხუცებულთა თავშესაფარში უმძიმესი კონტინგენტია, ყველა მათგანს მძიმე ქრონიკული დაავადება აქვს და თავშესაფარში ძირითადად მწოლიარე ავადმყოფები იმყოფებიან.

მისივე თქმით, გარდაცვლილ ბენეფიციარებთან დაკავშირებით მიმდინარეობს გამოძიება. სამტრედიის სათნოების სახლში ხუთი ბენეფიციარი 12-13 თებერვალს გარდაიცვალა, თავშესაფრის ცხრა ბინადარი კი მკურნალობას საავადმყოფოში განაგრძობს.

ამასთან, დაავადებათა კონტროლის ეროვნული ცენტრის სამეცნიერო საბჭოს ხელმძღვანელი პაატა იმნაძე, გრიპის ვირუსების ზრდის თვალსაზრისით, სიტუაციის გართულებას არ ელოდება. თუმცა, როგორც პაატა იმნაძემ დღეს გამართულ პრესკონფერენციაზე აღნიშნა, თებერვლის ბოლოს და მარტის დასაწყისში გრიპის შემთხვევების მატება მოსალოდნელია, მაგრამ ისეთი დონის, როგორც 2009 წელს იყო.

"ჩვეულებრივი ზამთარია, ტრიალებს ჩვეულებრივი გრიპის ვირუსები", - აღნიშნა პაატა იმნაძემ. მისივე თქმით, გრიპის ვირუსი საფრთხეს წარმოადგენს ქრონიკული დაავადების მქონე პირებისთვის, ასევე დიაბეტით, ფილტვების, გულსისხლძარღვთა დაავადების მქონე ადამიანებისა და მოხუცებისათვის.

დაავადებათა კონტროლის ეროვნული ცენტრის სამეცნიერო საბჭოს ხელმძღვანელმა განსახორციელებელი პრევენციის შესახებაც ისაუბრა და აღნიშნა, რომ ავადმყოფი უნდა მოერიდოს თავშეყრის ადგილებში სიარულს. ასევე, იმნაძემ მოქალაქეებს მიმართა, რომ მიირთვან ნიორი და ხელები ხშირად დაიბანონ.

რაც შეეხება ზოგად სურათს, პაატა იმნაძის ინფორმაციით, ლაბორატორიულად დადასტურებული 87 შემთხვევიდან, 82 A ტიპის H3N2 ვირუსია, ორ შემთხვევაში დადასტურდა ეგრეთ წოდებული ღორის გრიპი, H1N1, ხოლო ორი B ტიპის ვირუსი გამოვლინდა.

"ინტერპრესნიუსი"