თეა წულუკიანი - მომდევნო ორი-სამი თვის განმავლობაში საარჩევნო სიიდან გაორებების აღმოფხვრას ვაწარმოებთ

ადგილობრივი არჩევნებისთვის საარჩევნო სიაში "გაორებები" აღმოფხვრილი იქნება, - ამის შესახებ "ინტერპრესნიუსს" იუსტიციის მინისტრმა თეა წულუკიანმა განუცხადა. საარჩევნო კანონმდებლობაში დაგეგმილი ცვლილებების იმ ნაწილის კომენტირებისას, რომელიც ადგილობრივი არჩევნებისთვის საარჩევნო სიის ფორმირებას უკავშირდება, მინისტრმა სიიდან "გაორებების" ამოღებაზე გაამახვილა ყურადღება. წულუკიანმა ამ კონტექსტში ელექტრონული პირადობის მოწმობების გაცემასაც გაუსხვა ხაზი.

"საარჩევნო საკითხებზე მომუშავე ინტერფრაქციულმა ჯგუფმა ჯერ კიდევ შარშან ჩათვალა, რომ მთავრობას ბიომეტრიული საარჩევნო სია უნდა გაეკეთებინა. ეს საკითხი დღის წესრიგიდან მოხსნილი არ არის. ამისკენ უნდა წავიწიოთ ნაბიჯ-ნაბიჯ, რათა ქვეყანას მივცეთ ისეთი საარჩევნო სია, რომელიც ბიომეტრიული ფოტოებით არის შედგენილი და რომლითაც გაყალბება გამორიცხულია. იუსტიციის სამინისტრომ ამ მიმართულებით გიგანტური ნაბიჯები გადადგა, როდესაც პრიორიტეტი ბარათიზაციას მიანიჭა. ბარათიზაციაზე პრიორიტეტის მინიჭება ნიშნავს იმას, რომ ყველა მოქალაქე, რომელიც ელექტრონულ პირადობის მოწმობას აიღებს, ავტომატურად ხვდება საარჩევნო სიაში, რადგან ფოტო არის ბიომეტრიული. სერვისების განვითარების სააგენტომ და იუსტიციის სახლმა 65 ათას დევნილზე, 31 ათასს პედაგოგზე, 10 ათასზე მეტ ახალგაზრდაზე და ახლა უკვე ვეტერანებზე ელექტრონული პირადობის მოწმობები გასცა. ეს ადამიანები ბიომეტრიული ფოტოს მეშვეობით საარჩევნო სიაში შევლენ. ამასთან, ჩვენ გვაქვს ახალი დავალება საკანონმდებლო ორგანოსგან და გაიმართება პროგრამის პრეზენტაციაც, რომლის მიხედვით, ადგილობრივი არჩევნებისთვის სიაში ავტომატურად არა მხოლოდ ის ადამიანები უნდა შევიდნენ, რომლებიც ელექტრონულ პირადობის მოწმობას აიღებენ, არამედ ისინიც, ვის შემთხვევაშიც გამორიცხული იქნება ყველანაირი გაორება, ანუ ჩვენ ვაწარმოებთ საარჩევნო სიიდან გაორებების აღმოფხვრას მომდევნო ორი-სამი თვის განმავლობაში იმისთვის, რომ ცესკოს ადგილობრივი არჩევნებისთვის ფოტოებიანი სია გადავცეთ. ეს იქნება სიახლე, სადაც გამორიცხული იქნება ყველანაირი გაორება და, შესაბამისად, ამ დონეზე გაყალბება", - განუცხადა "ინტერპრესნიუსს" თეა წულუკიანმა, რომლის ცნობით, პროგრამის პრეზენტაცია 27 თებერვალს გაიმართება.

შარშან "საარჩევნო კოდექსში" სპეციალური მუხლი ჩაიდო, რომლის გათვალისწინებით, ადგილობრივი თვითმმართველობის არჩევნებისთვის ამომრჩეველთა ერთიანი სია ბიომეტრულ რეგისტრაცია გავლილი მოქალაქეებით უნდა ყოფილიყო ფორმირებული. დღეს კანონში პირდაპირ წერია და პუნქტობრივად არის გაწერილი, როგორ დგება საარჩევნო სია ბიომეტრიული მონაცემების მიხედვით. კანონით დადგენილი წესით, პროცესი ორი ძირითადი კომპონენტისგან შედგება: ერთი ეს არის ამომრჩევლისთვის ბიომეტრიული სურათის გადაღება, ხოლო მეორე - მონაცემთა ბაზაში არსებული მონაცემების სისწორის გადამოწმება თავად მოქალაქის გამოკითხვის გზით. პარლამენტში ინიცირებული ახალი პროექტის მიხედვით, მმართველი გუნდი კანონის ამ ნაწილს ცვლის და გამოდის ინიციატივით, რომლის თანახმად, ამომრჩევლის მიერ ბიომეტრიული რეგისტრაციის გავლისა და საარჩევნო სიაში ბიომეტრიული ფოტოსურათის შეტანის ნაცვლად, სიაში წარმოდგენილი იქნება მონაცემთა ელექტრონულ ბაზაში არსებული უახლესი ფოტოსურათი ციფრულ ფორმატში. ამასთან, კანონპროექტის მიხედვით, სერვისების განვითარების სააგენტოს მონაცემთა ელექტრონულ ბაზაში არსებული თოთოეული ამომრჩევლის უახლესი ფოტოსურათი, შესაბამისი პროგრამული უზრუნველყოფის (ფოტოსაძიებო სისტემის) გამოყენებით ამავე ბაზაში არსებულ საარჩევნო უფლების მქონე ყველა პირის უახლეს ფოტოსურათს შეუდარდება. ფოტოსურათების შედარების შედეგად, ფიზიკურ პირთა საიდენტიფიკაციო მონაცემების სავარაუდო გაორების აღმოჩენისას სააგენტო ინდივიდუალურად შეისწავლის საიდენტიფიკაციო მონაცემებს და არასწორი მონაცემების გამოვლენისას, კანონმდებლობით გათვალისწინებულ ქმედებას განახორციელებს.

"ინტერპრესნიუსი"