რას უკავშირებს გურამ ოდიშარია ფრანკფურტში მაღალ სამივლინებო ხარჯებს?

საქართველოს კულტურის მინისტრი გურამ ოდიშარია ფრანკფურტში მაღალ სამივლინებო ხარჯებს წიგნის ბაზრობას უკავშირებს. როგორც გურამ ოდიშარიამ ჟურნალისტებს განუცხადა, პროტოკოლის სამსახურმა აცნობა, რომ ბაზრობის პერიოდში იზრდება, როგორც სასტუმროს, ისე რესტორნების ფასები.

"წიგნის ბაზრობა მსოფლიო მნიშვნელობის მოვლენაა და ფრანკფურტს ასეთ დროს მილიონზე მეტი სტუმარი ჰყავს. როგორც ჩემმა პროტოკოლმა შემატყობინა, ამ დროს ძვირდება არა მარტო სასტუმრო, არამედ რესტორნებიც. ამ ხარჯებს გამოვიკვლევთ და ოფიციალურ ინფორმაციას მოგვიანებით მოგაწვდით. ამასთან, 2018 წელს ჩვენ ვიქნებით წიგნის ბაზრობის საპატიო სტუმარი, რაც ძალიან დიდი პატივია", - განაცხადა ოდიშარიამ.

მინისტრმა განმარტა, რომ სამინისტროს აუდიტის სამსახურს ხარჯებზე დეტალურ ინფორმაციას მოსთხოვს და მოგვიანებით გაავრცელებს.

"ასევე მინდა გითხრათ, რომ მე არც თუ იშვიათად ვმოგზაურობ საზღვარგარეთ და მეკუთვნის, თუმცა არასოდეს მისარგებლია ბიზნეს კლასით", - აღნიშნა ოდიშარიამ.

კულტურის მინისტრმა კომენტარი გააკეთა პრემიებთან დაკავშირებითაც. მინისტრის ინფორმაციით, პრემია მხოლოდ ორი თვის განმავლობაში მიიღო, ვინაიდან შემდეგ პრემიერ-მინისტრმა დანამატი დააწესა და მინისტრებს მოჭრილი ხელფასი აქვთ.

"მთავარია ის, როგორ გვქონდეს ერთი საერთო საზომი პრემიების სისტემასთან დკავშირებით", - აღნიშნა ოდიშარიამ.

ფრანკფურტში ვიზიტისას კულტურის მინისტრისა და მისი ორი მოადგილის სასტუმრო "ლე მერიდიენში" გატარებული 3 ღამე სახელმწიფო ბიუჯეტს 16 488 ლარი დაუჯდა. ამის შესახებ ინფორმაციას IDFI ავრცელებს.

იხილეთ ვიდეო

"ინტერპრესნიუსი"