დაგვიანებები გამოძახების დროს, 112-ზე შეტყობინება და ადგილზე სასწრაფო მანქანებზე ადრე მისული პატრული - ეს ბრალდებები გორის სასწრაფო სამედიცინო დახმარების სამსახურის მიმართ მოზღვავდა.
აღნიშნულ შეფასებებს გადაჭარბებულად მიიჩნევს სასწრაფო სამედიცინო რეგიონალური სამსახურის უფროსი თემურ თანიაშვილი და აცხადებს, რომ დაგვიანებებს ობიექტური და სუბიექტური მიზეზები აქვს.
"გამომძახებელი რომ რეკავს, ჰგონია, რომ იქ უნდა ვიდგე, რაც ასე არ არის. ქალაქი გადატვირთულია, გზის დამთმობი კი არავინ არის. ამიტომ სასწრაფოს მანქანას ლავირება უხდება და ხშირად ალტერნატიული გზით მისვლაც დანიშნულების ადგილზე. ამასთან, მანქანები მოძველებულია. 8 სასწრაფო სამედიცინო მანქანიდან 6 - უაზის ტიპისაა, ხოლო დანარჩენი 2 - "ჰიუნდაის" ფირმის. მათგან ერთი დაზიანებულია", - აცხადებს თემურ თანიაშვილი.
